ဩဂုတ် -၃၁၊၂၀၂၅။ ထားမြတ်/People’s Spring
ကချင်ပြည်နယ်၊ဝိုင်းမော်မြို့နယ်၊လမြန်ဒေသ၌ အာဏာသိမ်းစစ်ကောင်စီတပ်က ထိုးစစ်ဆင် လာ၍ တကျော့ပြန်တိုက်ပွဲများ ဆက်တိုက် ဖြစ်ပွားနေပြီး ဒေသတွင်းသို့ လေကြောင်း တိုက်ခိုက်ခဲ့သည်ဟု ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနက ယမန်နေ့(ဩဂုတ် ၃၀ရက်) ညတွင် သတင်းဖော်ပြသည်။
စစ်ကောင်စီတပ်ကလမြန်အနီးတဝိုက်သို့ဩဂုတ်၂၇ရက်ကစတင် ထိုးစစ်ဆင်လာ၍ တိုက်ပွဲဖြစ်ပွားခဲ့ရာ ဩဂုတ် ၂၉ရက်ထိ စစ်ကောင်စီတပ်နှင့် KIA ပူးပေါင်းတပ်များအကြား တိုက်ပွဲဆက်လက်ဖြစ်ပွားနေကြောင်း ဖော်ပြသည်။
ဩဂုတ်၃၀ရက်မနက်ပိုင်းတွင်စစ်ကောင်စီတပ်ကလေကြောင်းတိုက်ခိုက်ခဲ့ကြောင်း၊ထို့ပြင် ဝါးရှောင်၌လည်းလေကြောင်း၂ကြိမ်တိုက်ခိုက်ခဲ့ကြောင်း ၊ ဩဂုတ်၂၈ရက်ညနေပိုင်းကလည်းလမြန်ဒေသသို့လေကြောင်းတိုက်ခိုက်မှု ၂ကြိမ်ပြုလုပ်ခဲ့ကြောင်း အသိပေးသည်။
Public Service Announcement
ထို့ပြင်မြစ်ကြီးနားအခြေစိုက်မြောက်ပိုင်းတိုင်းစစ်ဌာနချုပ်(မပခ)ကလည်းလမြန်ဘက်သို့ လက်နက်ကြီး ပစ်ခတ်မှုများ ရှိခဲ့ကြောင်း ဖော်ပြသည်။
KIA သတင်းပြန်ကြားရေး၏ဖော်ပြချက်တွင် တိုက်ပွဲ၌ ထိခိုက်ကျဆုံး အခြေအနေများ မပါရှိပေ။
ကချင်သတင်းရင်းမြစ်အချို့ကမူ လမြန်ဒေသ တိုက်ပွဲ၌ စစ်ကောင်စီတပ် စွဲရာနေရာအချို့နှင့် စစ်သုံ့ပန်းများ၊လက်နက်ခဲယမ်းများ သိမ်းပိုက်ရရှိခဲ့ကြောင်း ဩဂုတ် ၂၈ရက်က ပြောပြထားသည်။
ကချင်ပြည်နယ် ဗန်းမော်မြို့တွင်လည်း KIAနှင့် အာဏာသိမ်းစစ်တပ်အကြား တိုက်ပွဲများ တကျော့ပြန်ဖြစ်ပွားလျက်ရှိသကဲ့သို့ ဖားကန့်မြို့နယ်တွင်လည်း တိုက်ပွဲဖြစ်ပွားလျက်ရှိသည်။
စစ်ကောင်စီတပ်၏ ဖားကန့်မြို့ တပ်မကုန်းမှ လက်နက်ကြီးများ ရမ်းသန်းပစ်ခတ်မှု လုပ်ဆောင်နေသကဲ့သို့ လေကြောင်း တိုက်ခိုက်မှုများလည်းရှိခဲ့ကြောင်း ဒေသခံသတင်းရင်းမြစ်အချို့က အသိပေးထားသည်။
