သြဂုတ်-၂၇၊ ၂၀၂၅။ သရဖူ/People’s Spring
စစ်ကိုင်းတိုင်း၊ ဝက်လက်မြို့နယ် ရုံးပင်ကုန်းရွာကို ယနေ့ ညနေပိုင်းတွင် စစ်ကောင်စီက ဂျက်ဖိုက်တာဖြင့် ဗုံးကြဲပြီး စက်သေနတ်ဖြင့် ပစ်ခတ်သွား၍ စစ်ဘေးရှောင် ငါးဦးသေဆုံးကြောင်း မြို့ခံများက ပြောသည်။
ဝက်လက်မြို့နယ် အရှေ့ခြမ််းရှိ ရုံးပင်ကုန်းရွာကို ညနေ ၅နာရီ၂၅မိနစ်တွင် လေကြောင်းတိုက်ခိုက်သွားခြင်းဟု သိရသည်။
” ဗုံးသုံးလုံးကြဲပြီး စက်လက်နဲ့ပါပစ်တာ။ စစ်ရှောင် ငါးဦးသေဆုံးတယ်လို့ ကြားတယ်။ တိုက်ပွဲမရှိဘဲ ပစ်ချသွားတာပါ”ဟု ဝက်လက်မြို့ခံတစ်ဦးက ပြောသည်။
Public Service Announcement
ယခုရက်ပိုင်းအတွင်း ဝက်လက်မြို့အရှေ့တောင်ခြမ်း နေရာအချို့၌ တိုက်ပွဲဖြစ်ပွားနေသော်လည်း ယခုဗုံးကြဲသည့်ရွာနှင့် အလွန်ဝေးကြောင်း ဒေသခံများက ပြောသည်။ လေကြောင်းတိုက်ခိုက်မှုနှင့်ပတ်သက်၍ ဝက်လက်မြို့နယ်ပြည်သူ့ကာကွယ်ရေးအဖွဲ့အား ဆက်သွယ်သော်လည်း မရသေးပေ။
“တိုက်ပွဲတွေဖြစ်နေတာက စဉ့်ကိုင်ရွာဘက်မှာပါ။ စစ်ရေးတင်းမာနေတာကြာပါပြီ။ ဒီနေ့ညနေလေကြောင်းတိုက်ခိုက်မှုကတော့ ဘာမှမဆိုင်တဲ့နေရာကိုပစ်တာပါ”ဟု ကာကွယ်ရေးရဲဘော်တစ်ဦးကပြောသည်။
စစ်ကောင်စီသည် ယခုရက်ပိုင်းတွင် စစ်ကိုင်းတိုင်း၊ ကရင်နီပြည်နယ်၊ ရှမ်းပြည်နယ်မြောက်ပိုင်း၊ မန္တလေးတိုင်း၊ ကချင်ပြည်နယ်နှင့် ရခိုင်ပြည်နယ်တို့ကို ပိုမိုပစ်မှတ်ထားကာ လေကြောင်းတိုက်ခိုက်မှု ပြုလုပ်နေသည်။
ဩဂုတ်၂၅ရက်ညက ရခိုင်ပြည်နယ်၊ မြောက်ဦးမြို့ကို ဗုံးကြဲရာ ကလေးငယ် (၅) ဦးအပါအဝင် အရပ်သားပြည်သူ (၁၂) ဦး သေဆုံးပြီး (၂၀) ဦးဒဏ်ရာရရှိခဲ့သည်ဟု အာရက္ခတပ်တော်(AA)က သတင်းထုတ်ပြန်သည်။ ယမန်နေ့ကလည်း ကချင်ပြည်နယ်၊ ဝိုင်းမော်မြို့ကို လေကြောင်းတိုက်တိုက်ခဲ့သည်။
ရှမ်းပြည်နယ်မြောက်ပိုင်း ကျောက်မဲမြို့နယ်၊ နောင်ပိန်ရွာကိုလည်း လေကြောင်းမှ ဗုံးကြဲတိုက်ခိုက်နေပြီး ကွတ်ခိုင်မြို့တွင်လည်း လေကြောင်းမှ ကင်းထောက်နေ၍ စာသင်ကျောင်းများပိတ်ထားရသည်။
