ဖမ်းဆီးခံရသည့် ပရာဒေါင်းဆွေမျိုးစုခေါင်းဆောင်များ ငါးရက်အကြာတွင် ပြန်လွတ်လာ

မေ ၂၀၊၂၀၂၅။ရဲခေါင်/People’s Spring

ဖမ်းဆီးခံထားရသည့် ပရာဒေါင်းဆွေမျိုးစုခေါင်းဆောင်များ ဖမ်းဆီးခေါ်ဆောင်ခံရပြီး ငါးရက်အကြာတွင် ပြန်လွတ်လာကြောင်း ဖယ်ခုံမြို့နယ်၊ သိကျိတ်ဒေသခံများက လူထုနွေဦးသို့ အတည်ပြုသည်။

ယနေ့(မေလ ၂၀ ရက်)နေ့လည် ၂နာရီတွင် ပြန်လွတ်လာည့် ဆွေမျိုးစုခေါင်းဆောင်များကို ကယန်းပြည်သစ်ပါတီ(KNLP)အခြေစိုက်ရာဆီဘူးဒေသသို့ သွားရောက်ခေါ်ဆောင်နေပြီဟုလည်း ဆိုသည်။

“ဒေသခံတွေရော၊ပရာဒေါင်းဆွေမျိုးစုတွေရော အကုန်သွားကြိုနေကြပါတယ်”ဟု သိကျိတ်ကျေးရွာသားတစ်ဦးက ပြောသည်။

Public Service Announcement

မေလ ၁၆ ရက် နေ့လယ်တွင် ပရာဒေါင်းဆွေမျိုးစု ဥက္ကဌ ခွန်းအောင်နိုင်စိုး၊ ဒုဥက္ကဌ ဦးဘမောင်၊ ပရာဒေါင်းဆွေမျိုးစု လူငယ်အတွင်းရေးမှူး ခွန်းခိုင်မင်းနိုင်နှင့် နာယက ဦးအားဒိုတို့ကို သိကျိတ်ကျေးရွာ၊ ငိန်းကယန်းထန် (ခ) ဦးရွှေအေးနေအိမ်တွင် လေးပွင့်ကြယ်ကုမ္ပဏီ၏လုံခြုံရေးတပ်ဖွဲ့က ဖမ်းဆီးခေါ်ဆောင်သွားခဲ့သည်။

ထိုဖြစ်စဥ်အတွက် ကယန်းဒေသတွင်းအရပ်ဘက်အဖွဲ့အစည်းများက ကန့်ကွက်ကြောင်းထုတ်ပြန်စာ များ ထုတ်ပြန်ကြေညာခဲ့ပြီး ငါးရက်အကြာတွင် ပရာဒေါင်းဆွေမျိုးစုဦးဆောင်သူများ ပြန်လွတ်လာခဲ့သည်။

ထို့အပြင် လေးပွင့်ကြယ်ကုမ္ပဏီနှင့် ပရာဒေါင်းဆွေမျိုးစုတို့အကြား ဖြစ်ပေါ်နေသည့် မကြေလည်မှုများကို နှစ်ဦးနှစ်ဖက်ပြေလည်သွားသည်အထိ ဆောင်ရွက်မည်ဟု ကယန်းပြည်သစ်ပါတီ KNLP ဗဟိုကော်မတီက ယမန့်နေ့ညပိုင်းတွင် ထုတ်ပြန်ထားသည်။

သိကျိတ်ကျေးရွာမြင်းမထိဒေသ၏ မူလပိုင်ရှင် ပရာဒေါင်းဆွေမျိုးစုနှင့်ဒေသခံများက ဒေသခံများ၏ ဆန္ဒမပါဝင်ဘဲ လေးပွင့်ကြယ်ကုမ္ပဏီနှင့် တရုတ်ကုမ္ပဏီတို့ပူးပေါင်း၍ မြင်းမထိတောင်၌ အကြီးစားသတ္တုတူးဖော်မည်ကို ကန့်ကွက်နေခြင်းဖြစ်သည်။

ပရာဒေါင်းဆွေမျိုးစုသည် ကယန်းလူမျိုး၊ ကဲဒေါ့မျိုးနွယ်စု၏ ဆွေမျိုးစုတစ်ခုဖြစ်ပြီး သိကျိတ်ကျေးရွာ မြင်းမထိဒေသတွင် ပရာဒေါင်းဆွေမျိုးစုများနေထိုင်သည်။

မြင်းမထိတောင်တွင် အကြီးစားသတ္တုတူးဖော်မှုကြောင့် အိမ်ခြေ ၃၀ကျော်ရှိသည့် စခန်းကြီးရွာ‌‌ဟောင်း ဒေသခံများမှာ ရွာလုံးကျွတ် ရွှေ့ပြောင်းခြင်း၊အိမ်ခြေ ၆၀ကျော်ရှိသည့် စခန်းကြီးရွာသစ်၊ အိမ်ခြေ ၃၀ခန့်ရှိသည့် ကုန်းဆုံကျေးရွာနှင့် အိမ်ခြေ ၄၀၀ခန့်ရှိသော သိကျိတ်ကျေးရွာတို့ကိုလည်း ဘေးဥပါဒ် ဖြစ်စေနိုင်ကြောင်း ပရာဒေါင်း ဆွေမျိုးစုက အသိပေးထားသည်။