ရဲခေါင်/People’s Spring
ကရင်နီပြည်နယ်၊ ဘောလခဲခရိုင်အတွင်းရှိ စစ်ကောင်စီစခန်းကုန်းအား တိုက်ခိုက်စဥ် ကျန်းမာရေးမကောင်း၍ CDM ရဲတပ်သား ဖေရယ်ကျဆုံးခဲ့ရကြောင်း ဘောလခဲပြည်သူ့ကာကွယ်ရေးတပ်ဖွဲ့(BPDF)က ယနေ့(နိုဝင်ဘာ ၇ ရက်)တွင် ထုတ်ပြန်သည်။
“ရှေ့တန်းတနေရာက နေမကောင်းလို့ နောက်တန်းဆေးရုံကို အရေးပေါ်ပို့ဆောင်ခဲ့ရပါတယ်။ ရောဂါအခြေနေကြောင့် ဆေးရုံပေါ်မှာပဲ ဒီလ ၄ရက်နေ့ မနက် ၁နာရီဝန်းကျင်မှာပဲ ကျဆုံးခဲ့ပါတယ်”ဟု BPDF တာဝန်ရှိသူက လူထုနွေဦးသို့ ပြောသည်။
အဆိုပါ စစ်ကောင်စီစခန်းကုန်းကို တော်လှန်ရေးမဟာမိတ်တပ်ပေါင်းစုများနှင့်အတူ BPDFက ပါဝင်တိုက်ခိုက်နေကြောင်းလည်း အသိပေးသည်။
Public Service Announcement
ရဲဘော်ဖေရယ်သည် ၂၀၂၄ မတ်လ ၃ရက်က စစ်ကောင်စီ၏ ရဲတပ်သားအဖြစ်မှ စွန့်လွှတ်ကာ CDMပြုလုပ်ပြီး BPDF တပ်ရင်းသို့ ဝင်ရောက်ခဲ့ပြီး ကျရာတာဝန်ကို ကျေပွန်စွာထမ်းဆောင်ခဲ့သည်ဟု ဆိုသည်။
နိုင်ငံတော်နှင့် လူမျိုးအတွက် စွမ်းစွမ်းတမံ တိုက်ပွဲဝင်ရင်း အသက်ပေးလှူခဲ့သော ရဲဘော် ဖေရယ်အား အာဇာနည်အဖြစ်အသိမှတ်ပြု၍ လေးစားဂုဏ်ယူစွာ ဦးညွှတ်အလေးပြုကြောင်း BPDF က ဖော်ပြသည်။
“ဘောလခဲမှာ ကျန်နေတဲ့ စကစ စခန်းနှစ်ခုမှာ ဝမ်မလန်းကို တိုက်နေကြတာ”ဟု ကရင်နီစစ်ရေးသတင်းရင်းမြစ်က လူထုနွေဦးသို့ ပြောသည်။
ဘောလခဲမြို့နယ်အတွက် အရေးပါသည့် စစ်ကောင်စီစခန်းကုန်း သုံးခုကို ကရင်နီတပ် ပေါင်းစုက ၂၀၂၄ နှစ်လယ်ကစ၍ သိမ်းပိုက်နိုင်ခဲ့ပြီး မယ်စလောင်းတောင် စစ်ကောင်စီစခန်း၊ရေကျော်စခန်းနှင့် ထူးချောင်းစခန်း တို့ပါဝင်သည်။
ကျန်ရှိနေသော (၁၂)မိုင် စခန်းကုန်းနှင့် ဝမ်မလန်း စခန်းကုန်းတို့ မကျရေးအတွက် စစ်ကောင်စီက လေကြောင်း ပစ်ကူရယူ၍ခုခံနေဆဲ ဖြစ်သည်။
