လူအေး၊ရဲခေါင်/People’s Spring
မကွေးတိုင်း၊ ထီးလင်းမြို့နယ်တွင် စစ်ရေးတင်းမာနေစဉ် မြို့ပေါ်၌ တာဝန်ကျနေသည့် ပျူစောထီးတစ်ဦးသည် သေနတ်သုံးလက်နှင့် ခဲယမ်းများ ယူဆောင်လာပြီး ပြည်သူ့ကာကွယ်ရေးတပ်ဖွဲ့(PDF)ထံ အလင်းဝင်လာခဲ့သည်။
ထီးလင်းမြို့ ရွှေထီးခန်းမ၌ လုံခြုံရေးတာဝန်ကျနေသော ပျူစောထီးတစ်ဦးသည် G-3 သေနတ် နှစ်လက်၊ M-79 တစ်လက်၊ G-3 ကျည်ဘောက် နှစ်ဘောက်၊7.62 ကျည် (၃၈)တောင့် ၊M-79 အသီးငါးလုံး နှင့် icon-5 Rတစ်လုံး ယူဆောင်လာပြီး အောက်တိုဘာ ၂၀ ရက်တွင် ထွက်ပြေးလာခြင်းဖြစ်သည်။
Public Service Announcement
“သူ ကင်းကျတဲ့ချိန် ကျန်တဲ့ လူတွေရဲ့သေနတ်ကိုပါ ယူခဲ့တာ”ဟု Yaw National Revolution Force တာဝန်ရှိသူက လူထုနွေဦးသို့ ပြောသည်။
ဂန့်ဂေါခရိုင်အမှတ် (၁၈)တပ်ရင်း(Yaw National Revolution Force)ထံ ဆက်သွယ် အလင်းဝင်လာခဲ့ရာ ၎င်းအား အောက်တိုဘာ ၂၄ရက်တွင် ဆုငွေကျပ်သိန်းတစ်ရာ ချီးမြင့်ခဲ့ကြောင်း ပြည်သူ့ကာကွယ်ရေးရဲဘော်တစ်ဦးကပြောသည်။
စက်တင်ဘာ ၁၁ ရက်ကလည်း ထီးလင်းမြို့မှ စစ် ကောင်စီတပ်သား ထက်လင်းအောင်သည် MA 3 တစ်လက်နှင့် ကျည်များ ယူလာပြီး Yaw National Revolution Forceထံ အလင်းဝင် လာသည်။
မကွေးတိုင်း၊ ယောဒေသ၊ ထီးလင်းမြို့အပါအဝင် ဂန့် ဂေါခရိုင်အတွင်းမြို့နယ်များကို စစ်ကောင်စီက အောက်တိုဘာလဆန်းမှစ၍ စစ်ကြောင်းထိုးနေပြီး လေကြောင်းမှလည်း တိုက်ခိုက်နေသည်။
” မြို့တွေနဲ့ ၅မိုင်၆မိုင်ပတ်ချာလည်ကို ပြန်ထိန်းချုပ်မယ်ဆိုပြီး စစ်ကြောင်းထိုးနေလို့ စစ်ရေးတင်းမာနေပါတယ်။ ဒီအခြေအနေမှာ သူတို့အမှားကိုသူတို့သိပြီး အလင်းဝင်လာသူတွေလည်းရှိပါတယ်”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
အောက်တိုဘာ ၂၂ရက်က ထီးလင်းမြို့နယ်၊အိုင်းမကျေးကျေးရွာနှင့်ချောင်းပေါက်လမ်းဆုံကို စစ်ကောင်စီက လေကြောင်းမှ တိုက်ခိုက်ခဲ့ရာဒေသခံတစ်ဦး သေဆုံးပြီး ခြောက်ဦးဒဏ်ရာရခဲ့သည်။
