İranda prezident seçkilərinin ikinci turu keçirilir

Gununsesi.info bu ölkənin mətbuatına istinadla xəbər verir ki, bu barədə İranın daxili işlər naziri Əhməd Vahidi paytaxt Tehranda keçirdiyi mətbuat konfransında səsvermə prosesinin başladığını açıqlayıb.

Seçkilərdə islahatçı namizəd, Təbriz deputatı və keçmiş səhiyyə naziri Məsud Pezeşkian və mühafizəkar namizəd, Ali Milli Təhlükəsizlik Şurasının keçmiş katibi Səid Cəlili yarışır.

Daxili İşlər Nazirliyinin Seçki Mərkəzinin məlumatına görə, 88 milyon əhalisi olan ölkədə 59 mindən çox mərkəzdə yaradılmış seçki qutularında təxminən 62 milyon seçici səs verə biləcək.

Bundan əlavə, ölkədən kənarda olan İran vətəndaşları 95 ölkədə yaradılmış seçki mərkəzlərində səsverməyə gələ biləcəklər.

Yerli vaxtla saat 08.00-da başlayan səsvermə prosesi saat 18.00-da başa çatacaq, lakin zəruri hallarda Daxili İşlər Nazirliyinə tabe olan Seçki Mərkəzinin qərarı ilə bu müddət uzadıla bilər.

Seçkilərin nəticələri ilə bağlı ilk məlumatların gecə yarısı açıqlanması, yekun nəticələrin isə sabah səhər açıqlanması gözlənilir.

Xatırladaq ki, İranda seçilən prezident 4 il fəaliyyət göstərir və ardıcıl olaraq maksimum iki dəfə seçilə bilər.