အပြည်ပြည်ဆိုင်ရာ ရာဇဝတ်ခုံရုံး (ICC)ရဲ့ တရားသူကြီး ၄ ဦးကို ပိတ်ဆို့ အရေးယူမှုတွေ ပြုလုပ်သွားမယ်လို့ အမေရိကန် နိုင်ငံခြားရေး ဝန်ကြီးက ပြောကြားခဲ့ပါတယ်။
အစ္စရေးနဲ့ အမေရိကန်အပေါ် ICCက တရားလက်မဲ့ ပစ်မှတ်ထား ရန်လိုနေတာတွေကို တုံ့ပြန်ဖို့အတွက် အခုလို ဆုံးဖြတ်တာ ဖြစ်တယ်လို့ မာကို ရူဘီရိုက ဆိုပါတယ်။ ဝန်ကြီးချုပ် ဘင်ဂျမင် နေတန်ညာဟု အပါအဝင် အစ္စရေး အစိုးရ ထိပ်တန်း အရာရှိတွေကို ICCက ဖမ်းဝရမ်း ထုတ်ခဲ့တာ၊ အာဖဂန် နစ္စတန်မှာ အမေရိကန် စစ်တပ်က စစ်ရာဇဝတ်မှု ကျူးလွန်တယ်ဆိုတဲ့ စွပ်စွဲချက်အတွက် စုံစမ်းနေတာတွေကို အကြောင်းပြုပြီး ရူဘီရိုက အခုလို တုံ့ပြန်ဖို့ စီစဉ်ခဲ့တာ ဖြစ်ပါတယ်။
အမေရိကန်က ပိတ်ဆို့ အရေးယူဖို့ ရွေးချယ်ထားတဲ့ တရားသူကြီး ၄ ယောက်စလုံးဟာ အမျိုးသမီးတွေပါ။ ယူဂန္ဓာသူ ဆိုလိုမီ ဘာလွန်ဂီ ဘိုဆာ၊ ပီရူး နိုင်ငံသူ လုဇ်ဒယ်လ် ကာမန် အိုင်ဘာနက်ဇ် ကာရန်ဇာ၊ ဘီနင်နိုင်ငံသူ ရိန်နီ အဲဒလစ် ဆိုဖီ အလာပီနီ ဂန်ဆူနဲ့ ဆလိုဗေးနီးယားသူ ဘီတီ ဟိုဟ်လာတို့ဟာ အမေရိကန် နိုင်ငံခြားရေး ဝန်ကြီးဌာနရဲ့ အရေးယူ ပိတ်ဆို့မှု စာရင်းမှာ ပါဝင်နေပါတယ်။
ICCကတော့ အမေရိကန်ရဲ့ သဘောထားအတွက် ဝမ်းနည်းမိကြောင်း ကြေညာပြီး ICCရဲ့ လွတ်လပ်တဲ့ ရပ်တည်မှုကို ထိုးနှက်ဖို့ အားထုတ်တယ်လို့ ခံစားရကြောင်း ကြေညာချက် ထုတ်ပြန်ခဲ့ပါတယ်။
Public Service Announcement
အရေးယူ ပိတ်ဆို့မှု အစီအစဉ်အရ အဲဒီ တရားသူကြီးတွေရဲ့ အမေရိကန်မှာ ရှိနေသမျှ ပိုင်ဆိုင်မှု၊ အကျိုးစီးပွား အားလုံးကို တားမြစ်ပိတ်ပင်ပြီး ဘဏ္ဍာရေး ဝန်ကြီးဌာနဆီ အစီရင်ခံစေရမှာ ဖြစ်ပါတယ်။
နေတန်ညာဟုကတော့ ဒီကိစ္စနဲ့ ပတ်သက်လို့ ရူဘီရိုကိုရော၊ အမေရိကန် သမ္မတ ဒေါ်နယ်လ်ထရမ့်ကိုပါ ကျေးဇူးတင်ကြောင်း ပြောကြားခဲ့ပါတယ်။ အမေရိကန် အစိုးရဟာ အစ္စရေးရဲ့ အခွင့်အရေးတွေအတွက် မားမားရပ်ပေးခဲ့တာ ဖြစ်တယ်လို့ သူက ဆိုပါတယ်။
ရူဘီရိုရဲ့ ကြေညာချက်မှာတော့ ICC တရားသူကြီးတွေဟာ အစ္စရေးနဲ့ အမေရိကန်တို့ကို အခြေအမြစ် ကင်းမဲ့ပြီး တရားလက်မဲ့ဆန်တဲ့ ပစ်မှတ်ထားမှုတွေနဲ့ ထိုးနှက်နေတယ်လို့ စွပ်စွဲထားပါတယ်။ နောက်ပြီး တရားသူကြီးတွေရဲ့ လုပ်ဆောင်ချက်တွေဟာ အမေရိကန်၊ ပြီးတော့ အစ္စရေး အပါအဝင် မဟာမိတ်တွေရဲ့ အချုပ်အခြာ အာဏာ ပိုင်ဆိုင်မှုနဲ့ အမျိုးသား လုံခြုံရေးကို ခြိမ်းခြောက်နေတယ်လို့လည်း ဖော်ပြထားပါတယ်။
ICCဟာ နေတန်ညာဟုနဲ့ အစ္စရေး ကာကွယ်ရေး ဝန်ကြီးဟောင်း ယိုအက်ဗ် ဂဲလန့်တို့ကို ဂါဇာမှာ စစ်ရာဇဝတ်မှုတွေ ကျူးလွန်တယ်လို့ စွပ်စွဲပြီး မနှစ်တုန်းက ဖမ်းဝရမ်း ထုတ်ခဲ့တာ ဖြစ်ပါတယ်။
အမေရိကန် သမ္မတ ထရမ့်ဟာ ဖေဖော်ဝါရီလတုန်းကလည်း ICCရဲ့ ရှေ့နေချုပ် ကာရင်မ် ခန်း အပါအဝင် အရာရှိ တချို့ကို လုပ်ပိုင်ခွင့် အလွဲသုံးစား ပြုတယ်လို့ စွပ်စွဲပြီး ပိတ်ဆို့ အရေးယူမှုတွေ သတ်မှတ် ကြေညာခဲ့ပါတယ်။
ကိုးကား: BBC
