ဇန်နဝါရီ ၃၁၊ ၂၀၂၆။ ထားမြတ်/People’s Spring
အာဏာသိမ်းစစ်ကောင်စီရဲ့ အာဏာတည်မြဲရေးအတွက် ကြိုးပမ်းနေတဲ့ လုပ်ရပ်ဟာ လုံး၀ လက်ခံလို့ မရဘဲ ပြတ်သားစွာဆန့်ကျင်ဖို့ ကရင်အမျိုးသားအစည်းအရုံး(KNU) ဥက္ကဋ္ဌ ပဒိုစောကွယ်ထူးဝင်းက ပြောပါတယ်။
ဒီကနေ့ ဇန်နဝါရီ ၃၁ရက်မှာ ကျရောက်တဲ့ (၇၇) နှစ်မြောက် ကရင်အမျိုးသားတော်လှန်ရေးနေ့သို့ ပြောကြားတဲ့ ဥက္ကဋ္ဌ ပဒိုစောကွယ်ထူးဝင်းရဲ့ မိန့်ခွန်းမှာ အာဏာသိမ်းစစ်တပ်က ဆန့်ကျင်လှုပ်ရှားမှုတွေကို ရှိသမျှအားနဲ့ ဖြိုခွဲချေမှုန်းနေသလို အာဏာတည်မြဲရေးအတွက် နိုင်ငံတကာရဲ့ တရားဝင် အသိအမှတ်ပြုမှု ရရှိရေး နည်းပရိယာယ်အမျိုးမျိုးသုံး ရွေးကောက်ပွဲ လုပ်ဆောင်နေမှု အခြေအနေတွေကို ပြောပြပါတယ်။
” ၂၀၀၈ ဖွဲ့စည်းပုံအခြေခံဥပဒေ ဆက်လက်တည်မြဲရန်နှင့် နိုင်ငံအပေါ်တွင် စစ်တပ်အာဏာ ဆက်လက် ကြီးစိုးရန် အတွက်ဖြစ်သောကြောင့် လုံးဝဥဿုံ လက်ခံ၍မရပါ၊ ကျွန်ုပ်တို့ ပြတ်ပြတ်သားသား ဆန့်ကျင်ရမည် ဖြစ်သည်” လို့ KNU ဥက္ကဋ္ဌက ပြောပါတယ်။
Public Service Announcement
တိုင်းပြည်တည်ငြိမ်အေးချမ်းပြီး ဖွံ့ဖြိုးတိုးတက်ဖို့အတွက် အရေးကြီးဆုံးလုပ်ဆောင်ရမယ့် အရာဟာ စစ်အာဏာရှင်ကို အမြစ်ပြတ်ချေမှုန်းရေးနဲ့ စစ်အာဏာရှင်စနစ်ယန္တရားအားလုံးကို တိုက်ဖျက်ပြီး ဒီမိုကရေစီ အရေး၊ လွတ်လပ်မှု၊ အမျိုးသားတန်းတူရေးနဲ့ ကိုယ်ပိုင်ပြဌာန်းခွင့်ကို အပြည့်အဝ အာမခံချက်ပေးနိုင်တဲ့ ဖက်ဒ ရယ်ဒီမိုကရေစီပြည်ထောင်စု တည်ဆောက်ရေးသာလျှင် ဖြစ်တယ်လို့ ပဒိုစောကွယ်ထူးဝင်းက ပြောပါတယ်။
မြန်မာနိုင်ငံရဲ့ နိုင်ငံရေးအခြေအနေအရ ကိုယ်ပိုင်ပြဌာန်းခွင့်အပြည့်အဝရှိတဲ့ ပြည်နယ်တွေနဲ့ စုဖွဲ့ထားတဲ့ ပြည်ထောင်စုကြီး ကို တည်ဆောက်ရမှာလို့လည်း ပြောပါတယ်။
ပြည်နယ်အားကောင်းရေးမှသည် ပြည်ထောင်စု အားကောင်းရေးကို ဦးတည်တဲ့ စစ်မှန်တဲ့ ဖက်ဒရယ်ဒီမိုကရေစီပြည်ထောင်စု ပေါ်ထွန်းလာရေးအတွက် ကိုယ့်ကြမ္မာကိုယ်ဖန်တီးတဲ့ ကရင်ပြည်(ခေါ်)ကော်သူးလေ ကို သက်ဆိုင်သူတွေအားလုံးနဲ့ တွေ့ဆုံဆွေးနွေးပြီး တဆင့်ချင်းစီ တည်ဆောက်လျက်ရှိကြောင်း KNU ဥက္ကဋ္ဌက အသိပေးပြီး အခြားသော ပြည်နယ်တွေဟာလည်း ဖက်ဒရယ်ယူနစ်တွေအဖြစ် ဖက်ဒရယ်ဒီမိုကရေစီပြည်ထောင်စုကို တည်ဆောက်ယူရမှာ ဖြစ်တယ်လို့ ဖော်ပြပါတယ်။
“ (၇၇)နှစ်မြောက် ကရင်တော်လှန်ရေးနေ့တွင် အဓိကပြောချင်သည့်အရာသည် အေး ချမ်းဖွံ့ဖြိုးပြီး အမျိုးသားတန်းတူရေးရှိသည့် ကော်သူးလေနှင့် ဖက်ဒရယ်ဒီမိုကရေစီ ပြည်ထောင်စု တည်ဆောက် ဖို့ရန် ကျွန်ုပ်တို့ အဖွဲ့အစည်းတစ်ခုထဲဖြင့် တည်ဆောက်၍ ရနိုင်မည်မဟုတ်ပါ၊ တော်လှန်ရေး အင်အားစုများ စည်း လုံးညီညွတ်စွာ ပူးပေါင်းဆောင်ရွက်မှသာလျှင် ကျွန်ုပ်တို့မျှော်မှန်းသည့် ဖက်ဒရယ်ဒီမိုကရေစီ ပြည်ထောင်စုကိုတည် ဆောက်နိုင်မည်ဖြစ်ပါသည်” လို့ KNU ဥက္ကဋ္ဌ မိန့်ခွန်းမှာ ဖော်ပြထားပါတယ်။
ကော်သူးလေအပါအဝင် ပြည်ထောင်စုတခုလုံး အာဏာရှင်စနစ်နဲ့တကွ အာဏာရှင် ယန္တရားအားလုံး မှ လွတ်မြောက်ဖို့ လိုအပ်ကြောင်း KNU ဥက္ကဋ္ဌက ပြောပါတယ်။
အနာဂတ်ပြည်ထောင်စုမှာ တိုင်းရင်းသားပြည်သူလူထုအားလုံးရဲ့ ကောင်းကျိုး စီးပွားနဲ့ အခြေခံ ရပိုင်ခွင့်တွေကို အာမခံ ပေးနိုင်ရမှာ ဖြစ်ပြီး မျိုးဆက်တွေကို ငြိမ်းချမ်းခြင်း၊ ကဏ္ဍပေါင်းစုံမှဖွံ့ဖြိုးတိုးတက်သော လူမှုဘဝမျိုးကို လက်ဆင့်ကမ်းပေးရမှာ ဖြစ်လို့ ကရင်အမျိုးသားအဖွဲ့အစည်းအားလုံးနဲ့ တော်လှန်တိုက်ပွဲဝင် နေကြတဲ့ သက်ဆိုင်ရာ အဖွဲ့အစည်းတွေ တိုင်းသူပြည်သားတွေအနေနဲ့ စည်းလုံးညီညွတ်စွာ အားသွန်ခွန်စိုက် ဆက်လက်ကြိုးပမ်းအားထုတ်ပြီး တိုက်ပွဲဝင်သွားကြဖို့ KNU ဥက္ကဋ္ဌက တိုက်တွန်းနှိုးဆော်ထားပါတယ်။
