ဇန်နဝါရီ-၂၁၊ ၂၀၂၆။ People’s Spring
ရှမ်းပြည်နယ်၊ မောက်မယ်မြို့နယ် ကဒူးကြီးကျေးရာအုပ်စုက ကျေးရွာတစ်ရွာကို အာဏာသိမ်းစစ်ကောင်စီ လက်အောက်ခံ ပြည်သူ့စစ်တပ်ဖွဲ့ဖြစ်တဲ့ PNOက ရွာလုံးကျွတ် မီးရှို့ဖျက်ဆီးခဲ့တယ်လို့ ဒေသခံတွေက ထွက်ဆိုတဲ့ ရုပ်သံကို ပအိုဝ်းအမျိုးသားလွတ်မြောက်ရေးတပ်မတော်(PNLA) သတင်းပြန်ကြားရေးဌာနက ထုတ်ပြန်ပါတယ်။
ဒေသခံတွေက ကျေးရွာမီးရှို့ခံရတဲ့ ဖြစ်စဉ်ကို ပအိုဝ်း ဘာသာနဲ့ ပြန်ပြောပြတဲ့ ရုပ်သံကို ပြီးခဲ့တဲ့ ရက်ပိုင်းမှာ PNLA က ဖော်ပြခဲ့ရာ PNLA ပြောရေးဆိုခွင့်ရှိသူ ခွန်ရိန်းယံက ဘာသာပြန် ရှင်းပြပေးပါတယ်။ ကျေးရွာမီးရှို့ခံရတာဟာ ဇန်နဝါရီ ပထမပတ်ထဲမှာ ဖြစ်ခဲ့တာလို့ ဆိုပါတယ်။
အိမ်ခြေ ဆယ်ဂဏန်းသာရှိတဲ့ ကဒူးကြီးဒေသက ခြိင်းနင် အမည်ရှိတဲ့ရွာက ဒေသခံတွေဟာ စစ်ကောင်စီနဲ့ PNO ရဲ့ ရန်ကြောင့် စစ်ရှောင်နေတာကို PNOက ရွာကို ပြန်ဖို့ အမိန့်ပေးလို့ ပြန်လာတဲ့အချိန် PNO တပ်ဖွဲ့ကပဲ ဒရုန်းဗုံးနဲ့ကြဲတာ နေအိမ်တွေကို မီးရှို့တာ လုပ်ဆောင်ခဲ့တယ်လို့ ဒေသခံတွေ ပြောပြတာကို ခွန်ရိန်းယံက ရှင်းပြပါတယ်။
Public Service Announcement
“ဒရုန်းဗုံးကြဲတဲ့အချိန်မှာ အစီအစဉ်တကျ မဟုတ်ဘဲ ခြေဦးတည့်ရာ ကိုယ့်အစီအစဉ် နဲ့ကိုယ် ပြေးကြသလိုမျိုးဖြစ်နေတော့ ဒရုန်းဗုံးကြဲတဲ့ဟာက အိမ်တွေကို ထိတာတော့ သိတယ်။ ဒါပေမဲ့ လူကို ထိလား မထိဘူးလား ဆိုတာတော့ သူတို့ သေချာလည်းမသိဘူးပေါ့ ပြည်သူလူထုရဲ့ ပြောစကားအရပေါ့” လို့ ခွန်ရိန်းယံက ပြောပါတယ်။
PNO ရဲ့ ဒရုန်းနဲ့တိုက်ခိုက်မှုကြောင့် ဒေသခံတွေထိခိုက်မှုရှိနိုင်သလို ဖမ်းဆီးခံထားရတဲ့သူတွေလည်း ရှိနိုင်တယ်လို့ ခွန်ရိန်းယံက ခန့်မှန်းပါတယ်။
စစ်ကောင်စီနဲ့ PNO ဟာ အခု ဇန်နဝါရီလအတွင်းမှာ PNLA တပ်ရှိရာကို ထိုးစစ်ဆင်နေတာဖြစ်ပြီး ဒေသခံတွေကို လူသားဒိုင်းအဖြစ် ဖမ်းဆီးတာတွေလုပ်ဆောင်ခဲ့တယ်လို့ဆိုပါတယ်။ အဲဒီလို ထိုးစစ်ဆင်လာလို့ တိုက်ပွဲတွေလည်းရှိနေပြီး စစ်ကောင်စီနဲ့ ပြည်သူ့စစ်ဘက်က သေဆုံးထိခိုက်တာ လက်နက်နဲ့ အလောင်းအချို့ရတာ ရှိထားတယ်လို့ PNLAက ဇန်နဝါရီ ၈ရက်မှာ ထုတ်ပြန်ထားပါတယ်။
