■PDF တွေက BNRA စခန်းကိုကျောဘက်ကလာဝိုင်းတာမှာဆင်ကိုရှေ့ကထားမိုင်းကာစဥ်ထိခိုက်မိတာလို့ ဗိုလ်နဂါးပြော
ဇန်နဝါရီ-၁၅၊၂၀၂၆။အိမ်သွင်/People’s Spring
ဗိုလ်နဂါးဦးဆောင်တဲ့BNRAတပ်ဖွဲ့က အလောင်တော်ကဿဖသစ်တောကြိုးဝိုင်းအတွင်း CDMလုပ်ထားတဲ့ဆင်မတစ်ကောင်ကိုသတ်ဖြတ်မီးရှို့ခဲ့တယ်လို့ ဒေသခံတွေကပြောပါတယ်။
အလောင်းတော်ကဿသစ်တောကြိုးဝိုင်းအတွင်း ဗမာအမျိုးသားတော်လှန်ရေးတပ်မတော်-BNRA စခန်းရှိတဲ့တစ်နေရာမှာဆင်မတစ်ကောင်ကို သတ်ဖြတ်မီးရှို့ခဲ့တာလို့ ဒေသခံတစ်ဦးကပြောပါတယ်။
Public Service Announcement
“ နဂါးရဲ့စခန်းတွေကိုခရိုင်ရင်းတွေကမဖမ်းခင်တစ်ရက်ကအသတ်ခံရတာ။နဂါးရဲ့ တပည့် မျက်လုံးဆိုတဲ့သူက ဦးဆောင်သတ်တာပါ။ မိုင်းထိပြီး ဒဏ်ရာရတာကို အလောင်းဖျောက်တာလို့ သိရတယ်။ သူတို့(BNRA)စခန်းနဲ့ အနီးလေးမှာ သတ်ထားတာ” လို့ ဒေသခံသတင်းရင်းမြစ်ကပြောပါတယ်။
အသတ်ခံရတဲ့ဆင်ဟာ CDM ဆင်ဖြစ်ပြီး ပိုးအိစံလို့ အမည်ပေးထားတာပါ။မီးကျွန်းနေတဲ့ အရိုးစုတွေကိုသာ ပြန်တွေ့ရတယ်လို့သိရပါတယ်။
CDM ဆင်မပိုးအိစံကို BNRA တပ်ခွဲဗိုလ်မျက်
လုံး အဖွဲ့က သတ်ဖြတ်ပြီး အလောင်းဖျောက်ဖျက်ထားခဲ့မှုကို အရေးယူပေးဖို့အမျိုးသားညီညွတ်ရေးအစိုးရ(NUG)ကို ဒေသခံတွေက တိုင်ကြားထားတယ်လို့ သတင်းရရှိပါတယ်။
“ မိုင်းတွေထောင်တယ်။ဆင်တွေကို ဆေးကုမယ့်အဖွဲ့တွေကိုတားတယ်။ဆင်ကိုသတ်တယ်။ အရမ်းနှမြောဖို့ကောင်းတယ်။ ဆင်က ဘာအပြစ်လုပ်နေလို့လဲ။ ဒါကို ဘယ်လို အရေးယူမှာလဲ” လို့ ကနီမြို့ခံတစ်ဦးကပြောပါတယ်။
ဒါပေမယ့် BNRA ခေါင်းဆောင် ဗိုလ်နဂါးက PDF တွေက စခန်းကိုနောက်ကျောကနေလာဝိုင်းချိန်ဆင်တွေကိုရှေ့ကကာထားတာမို့ထိခိုက်သေဆုံးခဲ့တာလို့ တုံ့ပြန်ပါတယ် ။
“ ဗိုလ်မျက်လုံးတို့က ဆင်ကိုပစ်သတ်တာမဟုတ်ပါဘူး။မျက်လုံးစခန်းနောက်ကျောဘက်ကနေ ဆင်တွေကို ရှေ့က မိုင်းကာထားပြီး လာဝိုင်းရာမှာ ထိခိုက်သေဆုံးတာမျိုးပါ။” လို့ ဗိုလ်နဂါးကပြောပါတယ် ။
ဒါပေမယ့် PDF တဦးက ဗိုလ်နဂါးရဲ့ ပြောဆိုချက်ဟာ လိမ်လည်တာဖြစ်တယ်လို့ ပြောပါ။
“ သက်သက်လိမ်တာ။ သူတို့စခန်းကို မစီးခင်ကတည်းက ဆင်ကိုပစ်သတ်ထားပြီးသား။ယုတ္တိရှိရှိလိမ့်တာ” လို့ ဒေသခံPDFတဦးကပြောပါတယ်။
BNRAကပုလဲမြို့နယ်အတွင်းမှာဂိတ်တချို့ဖွင့်ပြီး ငွေကောက်ခံနေတာကိုယင်းမာပင်ခရိုင်ထဲက PDFတပ်ရင်းတွေက အရေးယူဖို့ ပြင်ဆင်နေချိန်မှာ နှစ်ဘက်တင်းမာမှုဖြစ်ခဲ့တာပါ။
BNRA ခေါင်းဆောင် ဗိုလ်နဂါးက သူ့ကို NUG အစိုးရရဲ့ယင်းမာပင်ခရိုင်တပ်ရင်းတချို့က တိုက်ခိုက်ဖို့ပြင်နေလို့ ပြန်ပြီးတိုက်ခိုက်မယ်လို့ ဇန်နဝါ
ရီလ ၈ရက်မှာ ထုတ်ပြန်ခဲ့ပါတယ်။
ဇန်နဝါရီ ၉ ရက်မနက်ပိုင်းမှာတော့ ပုလဲမြို့နယ်
ပုပ္ပါးရွာနဲ့ ချင်ပစ်ရွာမှာ ဂိတ်တွေဖွင့်ပြီး ခရီးသွားတွေဆီက ငွေကောက်ခံနေတဲ့ BNRA ဂိတ်နှစ်ခုကို PDF ရဲဘော်တွေက ဝင်စီးနင်းပြီး ပိတ်သိမ်းခဲ့ပါတယ်။လက်နက်အချို့ကိုလည်း PDF တွေကသိမ်းဆည်းသွားပါတယ် ။လက်နက်အချို့ကို BNRA တပ်ဖွဲ့ထံPDFတွေကပြန်လွှဲပေးလိုက်ပြီဖြစ်ပါတယ် ။ သိမ်းဆည်းခံရတဲ့အထဲက စက်
လက်တစ်လက်ပြန်မရသေးဘူးလို့ ဗိုလ်နဂါးကဆိုပါတယ် ။
“ ပြန်လည်ပေးအပ်ဖို့ညှိုနှုင်းဖို့ဆက်သွယ်ပေမယ့် သူတို့ဘက်ကလက်မခံပါဘူး” လို့ သူကဆက်ပြောပါတယ် ။
BNRA ဂိတ်နှစ်ခုပို PDFတွေက စီးနင်းပိတ်သိမ်းပြီးနောက်တစ်နေ့မှာ အဲ့ဒီပတ်ဝန်းကျင်ကို စစ်တပ်ကလေကြောင်းကနေ နှစ်ကြိမ်ဗုံးကြဲခဲ့တယ်လို့ ဒေသခံတွေကပြောပါတယ်။
လက်ရှိမှာတော့ အခြေအနေငြိမ်သက်နေပြီး ဆင်မပိုးအိစံသတ်ဖြတ်အလောင်းဖျောက်ဖျက်ခံရမှုကို NUG အစိုးရ က ဘယ်လိုအရေးယူမလဲဆိုတာ စောင့်ဆိုင်းနေတယ်လို့ ဒေသခံတစ်ဦးက ပြောပါတယ်။
အလောင်းတော်ကဿပ နယ်မြေဟာ စစ်ကိုင်းတိုင်း၊ ယင်းမာပင်နဲ့ ကနီမြို့နယ်အစပ်မှာ ရှိပါတယ်။သစ်ထုတ်လုပ်ရေးမှာ အသုံးပြုခဲ့တဲ့ အစိုးရပိုင်နဲ့ ပုဂ္ဂလိကပိုင် ဆင်တွေဟာ စစ်တပ်အာဏာသိမ်းပြီးနောက်ပိုင်းမှာ ဆင်ဦးစီးတွေက အစိုးရယန္တရားမှာ ဆက်လက်အလုပ်မလုပ်လိုတော့ဘဲ ဆင်တွေကိုပါ ခေါ်ဆောင်ပြီး ဘေးကင်းရာ တောတောင်တွေထဲကို တိမ်းရှောင်လာခဲ့ပြီး CDM လုပ်ခဲ့ကြတာပါ။ အလောင်းတော်ကဿဖသစ်တောကြိုးဝိုင်းအတွင်း CDM လုပ်ထားတဲ့ဆင်ဦးစီးတွေနဲ့အတူ ဆင် အကောင်ရေ ၄၀ နီးပါးရှိနေပါတယ်။
CDMဆင်ဦးစီးတွေနဲ့ ဆင်တွေဟာအစားအစာနဲ့ ဆေးဝါးအကူအညီလိုအပ်နေသလို စစ်ကောင်စီရဲ့ လေကြောင်းတိုက်ခိုက်မှုနဲ့ ဒေသတွင်းတိုက်ပွဲတွေကြောင့် နေထိုင်ရှင်သန်ရေး အခက်အခဲတွေ ရှိနေပါတယ်။
ထပ်မံရရှိတဲ့သတင်းတွေအရ ဇန်နဝါရီ ၉ ရက်မနက်က စီးနင်းပိတ်သိမ်းခဲ့တဲ့ ပုပ္ပါးရွာနဲ့ ချင်ပစ်ရွာက ဂိတ်တွေကို BNRAက ပြန်ဖွင့်နေတယ်လို့လည်း ဒေသခံတွေကပြောပါတယ်။လက်ရှိမှာ ပုလဲမြို့နယ်အတွင်း BNRA ကဂိတ်သုံးဂိတ်ဖွင့်ထားတယ်လို့သိရပါတယ်။
