တိုက်ပွဲအတွင်း စစ်သုံ့ပန်း ၂၅ ဦးနှင့် လက်နက်ခဲယမ်းများ သိမ်းရ၊ တော်လှန်ရေးရဲဘော် ၉ဦး ကျဆုံး
ဇေအောင်/People’s Spring
ပုလဲမြို့သိမ်းတိုက်ပွဲအတွင်း စစ်ကောင်စီ၏ လေကြောင်းမှပစ်ကူပေးခြင်းနှင့် စစ်ကူပေးခြင်းအား ဖြတ်တောက်ရန်ခက်ခဲ၍ မြို့ပေါ်မှပြန်ဆုတ်ခဲ့ခြင်းဖြစ်ပြီး စစ်သုံ့ပန်း ၂၅ဦးနှင့် လက်နက်ခဲယမ်းများ သိမ်းဆည်းရမိခဲ့ကြောင်း ဗမာအမျိုးသားတော်လှန်ရေးတပ်မတော် (BNRA)က ယနေ့ (နိုဝင်ဘာ ၁၇ရက်)တွင် အသိပေး ထုတ်ပြန်သည်။
နိုဝင်ဘာ ၁၁ ရက် နံနက် ၄ နာရီခွဲခန့်ကစ၍ စတင်ခဲ့သည့် ပုလဲမြို့သိမ်းစစ်ဆင်ရေး၌ စတင်ပြီး ၄၈နာရီခန့် အကြာတွင် ပုလဲမြို့ပေါ်ရှိ စစ်ကောင်စီနောက်ဆုံးခံတပ်ဖြစ်သော မြို့နယ်ထွေအုပ်ရုံးနှင့် မြို့မရဲစခန်းတို့ကို ထိန်းချုပ်နိုင်ခဲ့ပြီး ပုလဲမြို့အား သိမ်းပိုက်နိုင်ခဲ့သည်ဟု BNRAက အသိပေးသည်။
လေကြောင်းပစ်ကူများကြားမှ အချိန်တိုအတွင်းထိန်းချုပ်နိုင်ခဲ့ခြင်းဖြစ်ပြီး ဆက်လက်ထိန်းချုပ်ထားနိုင်ရန် အဘက်ဘက်မှ ပြင်ဆင်ခဲ့ကြောင်း၊ စစ်ကောင်စီလက်အောက်ခံ နမခ ၊ တံတားဦးလေတပ်၊ ရှမ်းတဲလေတပ်၊ မကွေး ကလခ တို့မှ လေကြောင်းပစ်ကူအခေါက်ရေ ၇၀ကျော် ပစ်ကူပေးသည့်ကြားမှ ပုလဲမြို့အား တိုက်ခိုက်သိမ်းပိုက်ထိန်းချုပ်နိုင်ခဲ့ခြင်းဖြစ်သည်ဟု BNRAက ဆိုသည်။
Public Service Announcement
ထို့အပြင် မြေပြင်စစ်ကူဖြတ်တောက်ခြင်းလုပ်ငန်းများကို အဘက်ဘက်မှပြင်ဆင်နိုင်ခဲ့သော်လည်း ဝေဟင်ဖြင့်တပ်အင်အား စစ်ကူချခြင်း၊ ဝေဟင်မှ ပစ်ကူပေးခြင်းများကို ဖြတ်တောက်ရန်ခက်ခဲသောကြောင့် စစ်ဆင်ရေး လေးရက်မြောက်သည့် နိုဝင်ဘာ၁၄ ရက် ညနေပိုင်းတွင် မြို့ပေါ်မှ ပြန်လည်ဆုတ်ခွာပေးခဲ့ကြောင်း BNRAက ထုတ်ပြန်သည်။
ပုလဲမြို့သိမ်းစစ်ဆင်ရေးအတွင်းတွင် စစ်ကောင်စီဘက်မှ သုံ့ပန်း ၂၅ ဦး ဖမ်းဆီးရမိခဲ့ပြီးအများစုမှာ ထိခိုက်ဒဏ်ရာများကြောင့် ဆေးကုသမှုခံယူနေရကြောင်း BNRAက အသိပေးသည်။
စစ်ဆင်ရေးအတွင်း MA1 (၅)လက် ၊ MA2 (၂)လက်၊ MA3 (၄)လက်၊MA4ထောက်တွဲ (၁) လက်၊ G3(၆)လက်၊ G4(၂)လက်၊ ပစ္စတို MA5 (၁)လက်နှင့် ကျည်ခဲယမ်းများ သိမ်းဆည်းရမိခဲ့ကြောင်း BNRA၏ ထုတ်ပြန်ချက်တွင် ဖော်ပြသည်။
ထို့အပြင် စစ်ဆင်ရေးအတွင်း BNRAမှ ရဲဘော် ၉ ဦးကျဆုံးပြီး BNRA ရဲဘော် ၁၀ဦးနှင့် GZAမှ ရဲဘော် တစ်ဦးထိခိုက်ဒဏ်ရာ ရရှိခဲ့ကြောင်း ထပ်မံ အသိပေးသည်။
ပုလဲမြို့သိမ်းစစ်ဆင်ရေးကို ဗမာအမျိုးသားတော်လှန်ရေးတပ်မတော် (BNRA) မှ ဦးဆောင်၍ အညာညီနောင်ဖြစ်သော Generation Z Army (GZA) နှင့် ရေစကြိုမှ ဗိုလ်အောင်မောင်း၏ Southern Yesagyo (SYSO) တို့ ပူးပေါင်း၍ ချင်းညီနောင်စစ်ဆင်ရေး (CB Operation)နှင့်ချိတ်ဆက်ကာ Coordinated Movement အဖြစ်လုပ်ဆောင်ခဲ့သည်ဟု သိရသည်။
ပုလဲမြို့သိမ်းစစ်ဆင်ရေးအတွင်း ကျန်းမာရေးစောင့်ရှောက်မှုအပါအဝင် လိုအပ်သည်များပူးပေါင်းကူညီသော ပုလဲမြို့နယ် ပကဖ ဒုတာဝန်ခံ ဒေါက်တာနန်းဝင်းအား အထူးကျေးဇူးတင်ကြောင်း BNRAက ထုတ်ပြန်ခဲ့သည်။
ပုလဲမြို့ပေါ်တိုက်ပွဲအတွင်း စစ်ကောင်စီ၏ လေကြောင်းတိုက်ခိုက်မှုများကြောင့် ပြည်သူတစ်သောင်းနီးပါး ထွက်ပြေးတိမ်းရှောင်နေရပြီး စားနပ်ရိက္ခာနှင့် ဆေးဝါးများ အရေးပေါ်လိုအပ်နေကြောင်း သတင်းရရှိသည်။
