ဇန်နဝါရီ-၁၂၊၂၀၂၆။သတိုး/People’s Spring
နေပြည်တော် လယ်ဝေးမြို့နယ် အောင်ချမ်းသာကျေးရွာက စစ်ကောင်စီစစ်ဆေးရေးဂိတ်ကို ပြောက်ကျားဝင်တိုက်ခဲ့တာ စစ်သား တစ်ဦးသေဆုံးပြီး နှစ်ဦး ဒဏ်ရာရတယ်လို့ ဝရဇိန်အဖွဲ့ တာဝန်ရှိသူက ပြောပါတယ်။
“ ပြောက်ကျားဝင်ပစ်တာပါ။ ထိတွေ့မှုက ၁၀မိနစ်ကျော်ပဲ ကြာပါတယ်။ တစ်ယောက်သေ ၊ နှစ်ယောက် ဒဏ်ရာရတယ်။ နေပြည်တော်ကုတင်တစ်ထောင်ကို ပို့လိုက်တယ်” လို့ စစ်ဆင် ရေးနဲ့ ပတ်သက်ပြီး ပြောပါတယ်။
အဲဒီစစ်ဆင်ရေးကို ဇန်နဝါရီ ၁၀ရက် ည ၇နာရီလောက်မှာ လုပ်ဆောင်ခဲ့တာဖြစ်ပြီး ပြည်သူတွေရဲ့ တိုင်ကြားမှုတွေကြောင့် တိုက်ခိုက်ခဲ့တာလို့ ဆိုပါတယ်။
Public Service Announcement
“ အကြောင်းမဲ့စစ်ဆေးတာ။ လူသုံးကုန်အနည်းငယ် မိသားစုအတွက်သယ်ယူတာလောက်တောင် ဟိုတောင်း ဒီတောင်း လုပ်တာ။ အခန့်မသင့်ရင် အကြောင်းမဲ့ဖမ်းထားတာတွေလုပ်ပါတယ်။ ဒီကောင်တွေ အရက်မူးရင် ပိုဆိုးပါတယ်” လို့ စစ်ကောင်စီဂိတ်ရဲ့ ရမ်းကားမှုတွေကို ဝရဇိန်တပ်ဖွဲ့က ရှင်းပြပါတယ်။
အဲဒီဖြစ်စဉ်မှာ စစ်ကောင်စီဘက်က ထိခိုက်မှုနဲ့ ပတ်သက်ပြီး လူထုနွေဦးအနေနဲ့ သီးခြားအတည်မပြုနိုင်ပါဘူး။
ဝရဇိန်တပ်ဖွဲ့အနေနဲ့ ထပ်မံလုပ်ဆောင်မယ့် စစ်ဆင်ရေးတွေအတွက် အချိန်ယူကာပြင်ဆင်မှုတွေပြုလုပ်နေပြီး ပြည်သူတွေအနေနဲ့လည်း ယုံယုံကြည်ကြည်ထောက်ပို့ပေးဖို့ တောင်းဆိုထားပါတယ်။
“ ပြည်သူရဲ့ လူနေမှုဘဝ လုံခြုံအေးချမ်းဖို့ ဆောင်ရွက်နေပါတယ်” လို့ ဝရဇိန်အဖွဲ့က ပြည်သူတွေကို သတင်းစကားပါးပါတယ်။
