ဩဂုတ်-၆၊၂၀၂၅။တေဇ/People’s Spring
မြန်မာပလာဇာတွင် ယမန်နေ့ညနေက လူသတ်မှုဖြစ်ပြီးနောက် ကားပါကင်အပါအဝင် အရေးကြီးနေရာများ၌ လုံခြုံရေးတိုးမြှင့်ကာ လုံခြုံရေးစနစ်များကိုလည်း ချက်ချင်းအကောင်အထည်ဖော်ထားသည်ဟုပလာဇာကယနေ့သတင်းထုတ်ပြန်သည်။
“ဒီနေ့ သွားပါတယ် ဘာလုံခြုံရေးမှ မတိုးမြင့်ပါဘူးအရင်အတိုင်းပါပဲ။မှောင်တဲ့နေရာမှောင်ပါတယ်။တပါတ်၂ရက် ခလေး တွေကျောင်းပို့နေရတာအခုသတင်းကြားပီး safeမဖြစ်တော့ဘူးလို့ ခံစားရတယ်။ ဒါပင်မဲ့ မသွားမဖြစ်သွားနေရအုံးမှာပဲ။”ဟု အမျိုးသမီးတစ်ဦးက ယင်းထုတ်ပြန်ချက်အောက်၌ မှတ်ချက်ရေးသားထားသည်။
ဩဂုတ် ၅ ရက် ညနေ ၅ နာရီခန့်တွင် မြန်မာပလာဇာ ကားပါကင်၌ အမျိုးသမီးတစ်ဦးကို အမျိုးသားနှစ်ဦးက ဓားဖြင့်ထိုးခဲ့သောကြောင့် အမျိုးသမီးကို ဆေးရုံသို့ပို့ဆောင်ခဲ့သော်လည်း သေဆုံးသွားကြောင်းနှင့် ယင်းဖြစ်စဉ်အပေါ် ဝမ်းနည်းကြောင်း ဩဂုတ် ၆ ရက်ညတွင် မြန်မာပလာဇာက လူမှုကွန်ရက်၌ ကြေညာခဲ့သည်။
Public Service Announcement
အဆိုပါဖြစ်စဉ်သည် ဈေးဝယ်စင်တာ၏ လုံခြုံရေးပိုင်းအားနည်းသောကြောင့် ဖြစ်ခြင်းဖြစ်ပြီး သေဆုံးသူအတွက် ဝမ်းနည်းကြောင်းသာပါဝင်ကာ တောင်းပန်ကြောင်းမပါဝင်သည့်အပေါ် ဖေ့စ်ဘွတ်ခ်အသုံးပြုသူများက ထောက်ပြထားသည်။
“နေလိုက်ပါတော့လုံခြုံရေးဝန်ထမ်းတွေရပ်ကြည့်နေတယ်ဆိုတာ ထည့်ရေးလေ။ဘာလုံခြုံမူရှိလို့လဲ ၊အနီးစပ်ဆုံးကြားရသလောက်တော့ ambulance တောင်မခေါ်ပေးဘူးလို့သိရပါတယ်၊ taxi ပဲခေါ်ပေးတယ်taxi လာတော့လဲလူနာတောင် taxi ပေါ်ကို ဝိုင်းမတင်ပေးတဲ့ လုံခြုံရေးတွေပါ ။နေလိုက်ပါတော့ မြန်မာပလာဇာဆို လှည့်ကိုမကြည့်ချင်တော့ပါဘူး” ဟု အမျိုးသမီးတစ်ဦးက မှတ်ချက်ပြုသည်။
အထက်ပါသေဆုံးမှုနှင့်ပတ်သက်၍လည်း လူသတ်မှုကျူးလွန်သူများကိုဖမ်းဆီးရမိရေးအတွက် သက်ဆိုင်ရာနယ်မြေရဲစခန်းနှင့် ပူးပေါင်းလုပ်ဆောင်နေသည်ဟု မြန်မာပလာဇာကဆိုသည်။
ထိုအပြင် အဆိုပါဖြစ်စဉ်နှင့်ပတ်သက်၍ သတင်းထုတ်ပြန်သည့် အချိန်နောက်ကျသည့်အပေါ်တွင်လည်းဖေ့စ်ဘွတ်ခ်အသုံးပြုသူများကဝေဖန်ထားသည်။
“အမျိုးသမီး တစ်ဦးတည်းမဟုတ်ပါဘူးဗျ၊အသက် ၃၀အမျိုးသားတစ်ဦးပါသေးတယ်။သူကတော့ ဒဏ်ရာတွေနဲ့ ဆေးရုံမှာပါ။အမျိုးသမီးကို အဓိက လုပ်တာပါ လုံခြုံရေးဝန်ထမ်းတွေက ရပ်ကြည့်နေပါတယ် ဘာကူညီမူမှမရပါ ဒီလောက် သွေးတွေထွက်နေတာကို ambulance တောင်မခေါ်ပေးပဲ Taxi ပဲခေါ်ပေးတာပါတဲ့ Taxi ပေါ်တောင် မတင်ပေးဘူးလို့သိရပါတယိ မြန်မာပလာဇာက တော်တော်ကို မသွားသင့်တဲ့နေရာပါ လုံခြုံမူလုံးလုံးမရှိပါဘူး” ဟု အမျိုးသားတစ်ဦးကလည်း ဆိုသည်။
အဆိုပါဖြစ်စဉ်နှင့်ပတ်သက်၍ ဈေးဝယ်သူများက မြန်မာပလာဇာ၏ ကားပါကင်သည် အလင်းရောင် ကောင်းကောင်းမရခြင်း၊ကားပါကင်ကြေးကောက်ခံသည့်နေရာ၌သာ လူရှိပြီး အခြားနေရာများ၌ မရှိခြင်း စသဖြင့် ၎င်းတို့ကြုံရသည့် အကြောင်းအရာများကို ယင်းထုတ်ပြန်ချက်အောက်၌ မှတ်ချက်များရေးသားထားသည်။
“မင်းတို့က ပိုက်ဆံကောက်တဲ့နေရာမှာပဲ လုံခြုံရေးခန့်ထားတာ၊ကားတွေ ပါကင်ဘယ်လိုအဆင်ပြေအောင် လုပ်ပေးမယ်ဆိုတဲ့ အတွေးနဲ့ ဝန်ထမ်းမခန့်ထားဘူး၊ B1ပဲဖြစ်ဖြစ် B2ပဲဖြစ်ဖြစ် ကားရပ်စရာနေရာကိုယ့်ဘာသာရှာရတာ။ဒီလောက်ခေတ်မီအဆောက်အအုံကြီးမှာ အချက်ပြစံနစ်တွေလည်း ပြည့်စုံအောင်မစီစဉ်ကြဘူး၊” ဟု ဈေးဝယ်သူတစ်ဦးကမှတ်ချက်ရေးသားထားသည်။
မြန်မာပလာဇာ ဈေးဝယ်စင်တာတွင် ပြီးခဲ့သည့် ၂၀၂၁ တွင် အာဏာရှင်ဆန့်ကျင်ရေး ဆန္ဒထုတ်ဖော်သည့် လူငယ်များကို ယင်းစင်တာလုံခြုံရေးများက ရိုက်နှက်ဖမ်းဆီးမှုများပြုလုပ်ခဲ့သောကြောင် သပိတ်မှောက်ခံခဲ့ရသည်။ သို့သော်လည်း ၂၀၂၂ တွင် ဈေးဝယ်သူများဖြင့် ပြန်လည်စည်ကားလာခဲ့သည်။
