“ငလျင်ဘေး အလှူငွေနဲ့ ပြည်သူကို ဗုံးကြဲနေတာရပ်” စာသားနဲ့ စစ်ကိုင်းတိုင်းမှာ ဆန္ဒပြ

သြဂုတ် ၄၊၂၀၂၅။ သုည/People’s Spring

စစ်ကိုင်းတိုင်းအတွင်းသပိတ်အဖွဲ့တွေ၊ ဒေသခံပြည်သူတွေက ဒီကနေ့ (သြဂုတ် ၄)မှာ “ငလျင်ဘေး အလှူငွေနဲ့ ပြည်သူကို ဗုံးကြဲနေတာရပ်” စာသားနဲ့ အာဏာသိမ်းစစ်ကောင်စီကို ဆန့်ကျင်တဲ့ ဆန္ဒပြမှုတွေ အသီးသီး ပြုလုပ်ခဲ့ပါတယ်။

စစ်ကိုင်းတိုင်း ကလေးမြို့နယ်မှာ လူထုတိုက်ပွဲဦးဆောင်ကော်မတီနဲ့ ဒေသခံ လူထုက ပူးပေါင်းပြီး “ငလျင်ဘေးအလှူငွေတွေနဲ့ ပြည်သူကို ဗုံးကြဲနေတာ ရပ်” စာသားနဲ့ စစ်အာဏာရှင်ရဲ့ လုပ်ရပ်တွေအပေါ် ဆန့်ကျင်ရှုတ်ချကြောင်း ဆန္ဒပြခဲ့ပါတယ်။

ဒါ့အပြင်စစ်ကောင်စီအပေါ် ယုံကြည်ကိုးစားပြီး အကူအညီတွေပေးနေတဲ့ နိုင်ငံတကာက သိအောင် “ငလျင်ကပ်ဘေး အကူအညီ ပြည်သူတွေကို သတ်ဖို့ မဟုတ်ဘူး” ၊ “နိုင်ငံတကာ အကူအညီ ပြည်သူတွေကို သတ်ဖို့ မဟုတ်ဘူး” ၊ “စစ်ကောင်စီကို လေယာဉ်ဆီတင်သွင်းမှုရပ်”တို့ကိုလည်း ကြွေးကြော်ဆန္ဒပြခဲ့ပါတယ်။

Public Service Announcement

ယင်းမာပင်မြို့နယ်မှာလည်း ပြည်သူ့အားမာန် သပိတ်စစ်ကြောင်းနဲ့ ရွာပေါင်းစုံ သပိတ် စစ်ကြောင်းကော်မတီဝင်တို့ ပူးပေါင်းကာ အကြမ်းဖက် ဖက်ဆစ်စစ်တပ် ဆန့်ကျင်ရေး ချီတက် ဆန္ဒပြခဲ့ပါတယ်။

ယင်းမာပင်မြို့နယ်မြောက်ခြမ်းမှာလည်း အောင်လံလွှင့်မည် ရွှေရေကြည် သပိတ်စစ်ကြောင်းက ဒေသခံပြည်သူတွေနဲ့အတူစစ်အာဏာရှင်ကျရှုံးရေးဆန္ဒပြသပိတ်ကိုဒီနေ့မှာပြုလုပ်ခဲ့ကြပါတယ်။

ဆားလင်းကြီးမြို့နယ်မှာလည်း တော်လှန်ပုန်ကန်ဒေါင်းတို့အားမာန် သပိတ်စစ်ကြောင်းဟာ ဒေသခံပြည်သူတွေနဲ့ ပူးပေါင်းပြီးစစ်အာဏာရှင်ဆန့်ကျင်ရေး သပိတ်စစ်ကြောင်းကို ပြုလုပ်ခဲ့ကြပါတယ်။

ဓာတ်ပုံ – စစ်ကိုင်းဒေသသပိတ်အင်အားစု၊ ရွာပေါင်းစုံသပိတ်၊ ကလေးမြို့လူထုသပိတ်