ဇူလိုင်-၁၄၊၂၀၂၅။ရဲခေါင်/People’s Spring
ကရင်နီပြည်နယ်၊ ဖားဆောင်းမြို့သိမ်းတိုက်ပွဲ နောက်ဆုံးလက်ကျန် ခလရ(၁၃၅)တပ်ရင်း၏ ကာကင်းနေရာများကို ဆက်လက်သိမ်းပိုက်နေပြီး ဖမ်းဆီးရမိသည့် စစ်ကောင်စီတပ်သားအချို့ရှိကြောင်း အလယ်ပိုင်းတိုင်းအထူးစစ်ဆင်ရေးတပ်ဖွဲ့ တာဝန်ရှိသူက လူထုနွေဦးသို့ ပြောသည်။
ဖားဆောင်းမြို့ကိုသိမ်းနိုင်ရန် တစ်ခုတည်း ကျန်ရှိနေသည့် ခလရ(၁၃၅)တပ်ရင်းနှင့် စစ်ဆိုင် ထားရဆဲဖြစ်ကြောင်းလည်း အသိပေးသည်။
“ကာကင်းတွေ သိမ်းရတယ်။ ဆိုင်လည်းဆိုင်ထားတုန်းပဲ။ဖမ်းမိတဲ့ စကစ တပ်သားတွေက ဒီလ ၇ ရက်နေ့က”ဟု အထက်ပါတာဝန်ရှိသူက ဖားဆောင်း မြို့တိုက်ပွဲအခြေအနေကို ရှင်းပြသည်။
Public Service Announcement
ဖားဆောင်းမြို့သိမ်းတိုက်ပွဲ နောက်ဆုံးလက်ကျန်ခလရ(၁၃၅)တပ်ရင်း ၏ ကာကင်းနေရာများကို တော်လှန်ရေးတပ်ဖွဲ့များ သိမ်းပိုက်ရစဉ်။ ဓာတ်ပုံ – Screen Grab 
ဖားဆောင်းမြို့သိမ်းတိုက်ပွဲ နောက်ဆုံးလက်ကျန်ခလရ(၁၃၅)တပ်ရင်း ၏ ကာကင်းနေရာများကို တော်လှန်ရေးတပ်ဖွဲ့များ သိမ်းပိုက်ရစဉ်။ ဓာတ်ပုံ – Screen Grab 
ဖားဆောင်းမြို့သိမ်းတိုက်ပွဲ နောက်ဆုံးလက်ကျန်ခလရ(၁၃၅)တပ်ရင်း ၏ ကာကင်းနေရာများကို တော်လှန်ရေးတပ်ဖွဲ့များ သိမ်းပိုက်ရစဉ်။ ဓာတ်ပုံ – Screen Grab
ဖားဆောင်းမြို့သိမ်းတိုက်ပွဲအတွင်း အလယ်ပိုင်းတိုင်းအထူးစစ်ဆင်ရေးတပ်ဖွဲ့မှ ရဲဘော် ၁၀ဦးထိခိုက်ဒဏ်ရာရရှိထားသည်။
“အနီးကပ်တိုက်ပွဲဆိုတော့ 79နဲ့ ၆၀ မမတွေထိတာ”ဟု အလယ်ပိုင်းတိုင်းအထူးစစ်ဆင်ရေး တပ်ဖွဲ့ တာဝန်ရှိသူက ပြောသည်။
ဖားဆောင်းမြို့သိမ်းတိုက်ပွဲအတွင်း ရွပ်ရွပ်ချွံချွံတိုက်ပွဲ၀င်ခဲ့သော ညီနောင်မဟာမိတ်တပ်ပေါင်းစုများမှ ကျဆုံးရဲဘော်များကို အလေးပြုကြောင်းအလယ်ပိုင်းတိုင်းအထူးစစ်ဆင်ရေးတပ်ဖွဲ့က ထုတ်ပြန်ထားသည်။
“လေကြောင်းကနေ နေ့တိုင်းလောက်လာကြဲနေတယ်။အခုလောလောဆယ်အထိ အလုပ်လုပ်နေကြတုန်းပဲ”ဟု ဖားဆောင်းမြို့သိမ်းတိုက်ပွဲမှ ရဲဘော်တစ်ဦးက ပြောသည်။
၂၀၂၄နှစ်ကုန်ပိုင်းမှစ၍ ဘောလခဲနှင့် ဖားဆောင်း စစ်ဒေသများတွင် ဒေသခံညီနောင်မဟာ မိတ်တပ်ဖွဲ့များနှင့် စစ်ရေးပူးပေါင်းလုပ်ဆောင်နေပြီး ယမန်နှစ်ကုန်ပိုင်းရက်က အလယ်ပိုင်းတိုင်း အထူးစစ်ဆင်ရေးတပ်ဖွဲ့မှ ရဲဘော်တစ်ဦးကျဆုံးခဲ့သည်။
လက်ရှိ ဖားဆောင်းမြို့သိမ်းတိုက်ပွဲ ပြင်းထန်နေဆဲဖြစ်ကြောင်း ကရင်နီပြည်ပြည်သူ့လွတ်မြောက်ရေးတပ်မတော်၊ ဗဟိုစစ်ဦး၊ တပ်ရင်းအမှတ် ၆၂၆ (KPLA- B 626) တာဝန်ရှိသူက လူထုနွေဦးသို့ ပြောထားသည်။
ဇွန်လ၂၅ ရက်တွင် ဖားဆောင်းမြို့နယ်၏ စစ်ကောင်စီ၏ နောက်ဆုံးလက်ကျန်တပ်စခန်းဖြစ်သော ခလရ(၁၃၄)နှင့် (၁၃၅)တပ်ရင်းကို ထိုးစစ်ဆင်ခဲ့ကြောင်း ကရင်နီတပ်ပေါင်းစုံစစ်ဦးစီးအဖွဲ့ -JCS က ဇူလိုင် ၃ရက်တွင် ထုတ်ပြန် ထားသည်။
ဇွန်လ ၃၀ ရက်တွင် ခလရ(၁၃၄)တပ်ရင်းကို ရရှိခဲ့ပြီး ခလရ(၁၃၅)ကို ဆက်လက်ထိုးစစ်ဆင်နေဆဲ ဖြစ်သည်။
ဖားဆောင်းမြို့မှ တပ်ရင်းနှစ်ရင်းကို ထိုးစစ် စတင်သည့်နေ့မှစ၍ ဂျက်ဖိုက်တာများအပြင် Y 12၊ Y8၊ FTC 2000 G နှင့် Military Transport Aircraft ဖြင့် လေကြောင်းပစ်ကူများဖြင့် စစ်ကောင်စီက အပြင်းအထန် တိုက်ခိုက်နေသည်။
ဇူလိုင် ၂ရက်နံနက် ၁နာရီခန့်တွင် ဖားဆောင်းမြို့ တိုက်ပွဲသို့ ဗုံးကြဲတိုက်ခိုက်ရန်လာသည့် စစ်ကောင်စီက ဂျက်လေယာဥ် လေးစီးကို ကရင်နီတပ်ပေါင်းစုံ တော်လှန်ရေးတပ်များက ပစ်ခတ်တိုက်ခိုက်ရာ တရုတ်နိုင်ငံထုတ် FTC 2000 G တိုက်လေယာဥ်တစ်စီးကို ပစ်ချနိုင်ခဲ့သည်။
ဖားဆောင်းမြို့နယ်၏ အရှေ့ဘက်ခြမ်းတွင် က ရင်နီတပ်ပေါင်းစုက သိမ်းပိုက်ထားပြီးဖြစ်သော မယ်စဲ့မြို့နယ်ရှိကာ အနောက်ဖက်ခြမ်းတွင် ကရင် ပြည်နယ်သံတောင်ကြီး၊တောင်ဘက်ခြမ်းတွင် ဖာပွန်နှင့် မြောက်ဘက်ခြမ်းတွင် ဘောလခဲ မြို့နယ်တို့ရှိသည်။
၂၀၂၄ ဖေဖော်ဝါရီ ၂၉ရက်ကစ၍ ဖားဆောင်းမြို့သိမ်းတိုက်ပွဲ၌ စစ်ကောင်စီတပ်စခန်း ၉ခုနှင့် ကာကင်းနေရာသုံးခုကို ကရင်နီတပ်ပေါင်းစုက ယမန်နှစ်ကတည်းက သိမ်းပိုက်နိုင်ခဲ့သည်။
