ဇူလိုင်-၁၃၊၂၀၂၅။တေဇ/People’s Spring
ထိုင်းနိုင်ငံ စာမွတ်ခွန်ဆာမြို့နယ်ရှိ ကော်ဇွန်းထုတ်စက်ရုံတွင်အလုပ်သမား အခွင့်အရေး ချိုးဖောက်ခံနေရသည့် မြန်မာအလုပ်သမားများက အကူအညီတောင်းသောကြောင့် ထိုင်းအလုပ်သမားရုံးသို့ တိုင်ကြားခဲ့ရာ စက်ရုံကိုစစ်ဆေးမှုများပြုလုပ်တော့မည်ဖြစ်ကြောင်း မြန်မာအလုပ်သမားများအရေး ကူညီစောင့်ရှောက်ပေးနေသည့် AAC မဟာမိတ်မှ ကိုရဲမင်းကပြောသည်။
“သူတို့ရုံးဘက်ကလည်း အခုလို တိုင်ကြားမှုတွေပြုလုပ်မှ စက်ရုံတွေထဲကို ဝင်စစ်လို့ရတာတွေရှိတယ်။အခုစစ်ဆေးပြီး ဆုံးရှုံးနစ်နာမှုတွေကို အချိန်တစ်ခုအတွင်းမှာပြန်လည်ရရှိအောင်ဆောင်ရွက်ပေးမယ်လို့ အာမခံတယ်” ဟု ၎င်းကပြောသည်။
အလုပ်သမားများ၏အကူအညီတောင်းခံမှုကြောင့် 𝐌.𝐇.𝐀.𝐂 မဟာမိတ်အဖွဲ့ နှင့် အမျိုးသားညီညွှတ်ရေးအစိုးရ ၊အလုပ်သမားဝန်ကြီးဌာန မှ တာဝန်ရှိသူတို့ပူးပေါင်း၍ မဟာချိုင်ဆဝါဒီကန်ဌာနသို့ လိုက်ပါဆောင်ရွက်ပေးခဲ့သည်ဟု ၎င်းကဆိုသည်။
Public Service Announcement
ကော်ဇွန်းစက်ရုံမှ မြန်မာလုပ်သား ၅၀ ဦးသည် လုပ်ငန်းခွင်အတွင်း အလုပ်ရှင်၏ ဖိနှိပ်မှုခံနေရသည်မှာ နှစ်နှစ်ခန့်ရှိပြီဖြစ်ကြောင်း၎င်းကပြောသည်။
“အချက်လေးချက်ပေါ့။ အလုပ်ချိန်ပိုခိုင်းပြီး လုပ်ခကို အပြည့်အဝမပေးတာ ၊ အလုပ်သမားသုံးယောက်လောက်အလုပ်လုပ်ရမယ့်နေရာမှာ အလုပ်သမားနှစ်ယောက်နဲ့လုပ်ခိုင်းတာ ၊ ထိုင်းနိုင်ငံရဲ့ အစိုးရရုံးပိတ်ရက်တွေမှာ ခိုင်းပြီးတော့ လုပ်ခလစာမပေးတာ ၊ နောက်ပြီး လုပ်ငန်းခွင်အတွင်းထိခိုက်မှုတွေရှိရင်လည်း တာဝန်ယူဆောင်ရွက်ပေးတာတွေမရှိတာ။အဲဒီလိုကိစ္စတွေကို တိုင်ကြားရင်လည်း အလုပ်ဖြုတ်ခံရတာ ” ဟုအလုပ်သမားများ ၏ ဖိနှိပ်ခံရမှုအပေါ် ၎င်းကပြောသည်။
ထိုင်းနိုင်ငံရှိ အချို့စက်ရုံများသည် မြန်မာနိုင်ငံ၏ နိုင်ငံရေးအခြေအနေကိုသိရှိသောကြောင့် လုပ်ငန်းခွင်အတွင်းဖိနှိပ်မှုများလုပ်နေခြင်းဖြစ်ပြီး အလုပ်သမားများအနေဖြင့် ယင်းအခြေအနေမျိုး ကြုံရပါက စုပေါင်း၍ တိုင်ကြားမှုများပြုလုပ်သင့်ကြောင်း ကိုရဲမင်းကပြောသည်။
“နိုင်ငံရေးအခြေအနေအရ လက်ရှိ စစ်အာဏာသိမ်းထားတဲ့အပေါ်မှာ ကာကွယ်ပေးမယ့်သူမရှိဘူးဆိုတာ ကောင်းကောင်းသိထားတဲ့ အခြေအနေမှာ အလုပ်ရှင်တွေက အခွင့်ကောင်းယူကြတာ” ဟု ၎င်းကပြောသည်။
