နောင်ချို သုံးဆယ်ရွာ စစ်တပ်ဗုံးကြဲ၊ ဒေသခံသုံးဦးသေဆုံး၊ တစ်ဦးဒဏ်ရာရ

ဇူလိုင်-၁၊ ၂၀၂၅။ People’s Spring

တိုက်ပွဲပြင်းထန်နေတဲ့ ရှမ်းပြည်နယ်မြောက်ပိုင်း၊ နောင်ချိုမြို့နယ်က သုံးဆယ်ကျေးရွာကို စစ်တပ်က လေကြောင်းကနေ ဗုံး (၁၁)လုံး ကြဲချတိုက်ခိုက်လို့ ဒေသခံပြည်သူ သုံးဦး သေဆုံးပြီး တစ်ဦး ထိခိုက်ဒဏ်ရာရရှိခဲ့တယ်လို့ တအာင်းအမျိုးသားလွတ်​မြောက်​ရေးတပ်မတော်(TNLA)က ထုတ်ပြန်ပါတယ်။

စစ်ကောင်စီတပ်ဟာ ဇူလိုင် ၁ ရက်နေ့လယ် ၃နာရီ ၁၅မိနစ်မှာ တစ်ကြိမ်၊ ၃နာရီ ၁၆မိနစ်မှာ တစ်ကြိမ်၊ ၃နာရီ ၂၀ မိနစ်မှာ တစ်ကြိမ်၊ ၃နာရီ ၂၃မိနစ်အချိန်မှာ တစ်ကြိမ် စုစုပေါင်း လေးကြိမ်မှာ ဗုံး ၁၁လုံး လာရောက်ကြဲချတိုက်ခိုက်ခဲ့တာလို့ အသိ​ပေးထားပါတယ်။

ဗုံးကျပေါက်ကွဲမှုကြောင့် အမျိုးသားသုံးဦး သေဆုံးခဲ့ပြီး အမျိုးသား တစ်ဦး ထိခိုက်ဒဏ်ရာရရှိကာနေအိမ်နှစ်လုံးနဲ့ ဘုန်းကြီးကျောင်းနှစ်ကျောင်းလည်း ထိမှန်ပျက်စီးခဲ့တယ်လို့ ဆိုပါတယ်။

Public Service Announcement

ပြည်သူတွေအနေနဲ့စစ်ကောင်စီတပ်ရဲ့တိုက်ခိုက်မှုတွေ ရှောင်ရှားနိုင်ဖို့ စစ်ရေးသတိအမြဲရှိဖို့ လိုအပ်ပြီး လေကြောင်းရန်က ကာကွယ်နိုင်ဖို့ လေကြောင်းရန်ကာကွယ်ရေးဆိုင်ရာနည်းလမ်းတွေ လိုက်နာဆောင်ရွက်ဖို့လည်း တိုက်တွန်းထားပါတယ်။

စစ်ကောင်စီဟာ TNLA သိမ်းယူထားတဲ့ နောင်ချိုမြို့ကိုပြန်သိမ်းဖို့ ထိုးစစ်ဆင်​နေတာမှာ နောင်ချိုမြို့ပေါ်နဲ့ ၄ မိုင်ကျော်သာသာပဲဝေးတော့တဲ့ မျက်ချင်းနုရွာနဲ့ နောင်ဩရွာကိုမနေ့ (ဇွန်လ ၃၀ရက်)မှာ သိမ်းယူလာနိုင်ပြီလို့ ဒေသခံတွေဆီက သိရပါတယ်။

ပြီးခဲ့တဲ့ ရက်ပိုင်းတွေက မျက်ချင်းနုရွာနဲ့ နောင်သြရွာတို့မှာ TNLA နဲ့ စစ်တပ်ကြား တိုက်ပွဲတွေ ပြင်းထန်ခဲ့ပြီး အခုတော့ TNLA က အဲဒီရွာတွေကိုလက်လွှတ်ပေးလိုက်ရတာပါ။

TNLAရဲ့ ပြောရေးဆိုခွင့်ရှိသူ လွေးယေဦးက TNLA အနေနဲ့ ​နောင်ချိုမြို့ကို ပြန်​ပေးမှာ မဟုတ်ဘဲ အပစ်ရပ်​ကြေညာထားတာမို့ ခုခံ တိုက်ခိုက်တာပဲရှိပြီး တန်ပြန်ထိုးစစ်ဆင်တာ မရှိ​သေးဘူးလို့​ ဇွန်လ ၂၆ ရက်က People’s Spring ကို ပြောထားပါတယ် ။

TNLA အပါအဝင် မြောက်ပိုင်းညီနောင်မဟာမိတ်သုံးဖွဲ့ဟာ စစ်ကိုင်းငလျင်ကြီးဘေးကြောင့် ပြန်လည်ထူ​​ထောင်​ရေးလုပ်ငန်း​တွေလုပ်ဖို့ ဇွန်လကုန်အထိ တစ်ဖက်သတ်အပစ်ရပ်တယ်လို့ကြေညာထားပါတယ်။ ဒါ​ကြောင့် မနေ့က အပစ်ရပ်နောက်ဆုံးနေ့ဖြစ်ပါတယ်။

ဇွန်လဆန်းက ပြုလုပ်တဲ့ သတင်းစာရှင်းလင်းပွဲမှာလည်း TNLA ​ပြော​ရေးဆိုခွင့်ရှိသူက စစ်တပ်က ထိုးစစ်ဆင်လာ​ပေမယ့် ပြည်သူ​တွေ မစိုးရိမ်ကြဖို့ ၊ TNLAက စစ်ဗျူဟာအတိုင်းလုပ်​နေတာလို့​ဖြေကြားခဲ့ပါတယ်။

ဒါ​ပေမဲ့ စစ်တပ်ထိုးစစ်ဟာ မြို့နဲ့ တဖြည်းဖြည်းနီးလာပြီး လေ​ကြောင်းပစ်ကူအများအပြားသုံးတဲ့အပြင် ​မြေပြင်က အင်အား​ထောင်ချီသုံးထိုးစစ်ဆင်​​နေတာလို့ ဓနုလွတ်မြောက်ရေးတပ်မတော် DPLA ကတာဝန်ရှိသူက​ပြောထားပါတယ်။ ​တော်လှန်​ရေးတပ်​တွေက အ​ကောင်းဆုံးခုခံ​နေတယ်လို့ DPLA ကတာဝန်ရှိသူကလည်း ဇွန်လ၂၅ ရက်​က ပြောထားပါတယ်။

စစ်တပ်ရဲ့ ထိုးစစ်ကို TNLA ၊ DPLA နဲ့ မဟာမိတ်​တွေက ခုခံတိုက်ခိုက်​နေတာလို့သိရပါတယ်။ စစ်ကောင်စီတပ်ဟာ ဆုံးရှုံးထားတဲ့ ရှမ်းပြည်မြောက်ပိုင်းကို ပြန်လည်ရရှိဖို့အတွက် ပြီးခဲ့တဲ့ လပိုင်းတွေကတည်းက နောင်ချိုမြို့ဆီကို စစ်ကြောင်းသုံးကြောင်းနဲ့အပြင်းအထန် ထိုးစစ်ဆင်​​နေတာ​ကြောင့် တိုက်ပွဲ​တွေ ​နေ့စဥ်ပြင်းထန်​ခဲ့ပါတယ်။