ဇွန်၁၈၊၂၀၂၅၊မေ၊ကိုဘီဂျီ/People Spring
စစ်ကိုင်းတိုင်း၊ပုလဲမြို့နယ်၊ကန့်ဒေါင့်နယ်ရွာနယ် မြေရဲစခန်းသိမ်းတိုက်ပွဲ ဆက်လက်ပြင်းထန် နေပြီး ဒီနေ့စစ်တပ်က ရဟတ်ယာဉ် လေးစီးနဲ့အင်အားဖြည့်တင်းထားတယ်လို့ တော်လှန်ရေးတပ် တွေဆီကနေ သိရပါတယ်။
ဇွန်လ၁၈ ရက်မနက်၆နာရီ လောက်ကတည်းက ကန်ဒေါင့်ရွာနယ်မြေရဲစခန်းသိမ်းတိုက်ပွဲ ဆက်လက်ပြင်းထန် နေတာဖြစ်ပြီး စစ်တပ်က ဇွန် ၁၇ ရက်နဲ့ ၁၈ ရက်နေ့မှာ Mi17နဲ့ လေးကြိမ် အင်မထီးပျူစောထီးရွာကို စစ်ကူတွေပို့နေတာလို့သိရပါတယ်။
အင်မထီးရွာကနေ ကန့်ဒေါင့်ရွာကို စစ်ကူသွားဖို့အတွက် ဇွန် ၁၈ ရက်မနက်ပိုင်းကနေ နေ့ခင်းပိုင်းအထိ နှစ်ရွာ ကြားထဲကို စစ်တပ်ကဆက်တိုက် လေကြောင်းတိုက်ခိုက်နေတယ်လို့ သိရပါတယ်။
Public Service Announcement
“ချတာက အင်မထီးပျူရွာကိုချတာလေးစီးလုံး။ကန့်ဒေါင့်စစ်ကူအတွက်ပါ။တချို့တော့ကန့်ဒေါင့်ထဲကိုဝင်သွားနိုင်ပြီ။တချို့လည်းမဝင်နိုင်သေးဘူး”လို့ တော်လှန်ရေးတပ်ဖွဲ့ဝင်တဦးကပြောပါတယ်။
ဒါအပြင် ဇွန် ၁၈ ရက်နေ့ မနက်ပိုင်းကနေ နေ့ခင်း ၁၂နာရီကျော်အထိ စစ်ကောင်စီရဲ့ တံတားဦး လေတပ်က နေ စုစုပေါင်း ဗုံးအလုံးရေ ၅၀ကျော် ကြဲချခဲ့ပါတယ်။ဒါ့အပြင် လေကြောင်းတိုက်ခိုက်မှု ဆက်လက်ပြုလုပ်နေဆဲဖြစ်တယ်လို့ အခြားရဲဘော်တဦးက ပြောပါတယ်။
“တိုက်ပွဲကအင်မထီးအားဖြည့်တာကိုပိတ်ထားတာနဲ့ ဇီးဖြူကုန်းပျူရွာကို ဝိုင်းပတ်ထားတာရယ်၊ကန်ဒေါင့် ဝိုင်းတာတွေရယ် ဖြစ်နေပါတယ်”လို့ အထက်ပါရဲဘော်က ပြောပါတယ်။
ပုလဲမြို့နဲ့ (၁၀)မိုင်ကျော်အကွာမှာရှိတဲ့ အင်မထီး၊ဇီးဖြူကုန်း နဲ့ ကန့်ဒေါင့်ကျေးရွာတွေမှာ တိုက်ပွဲတွေဖြစ်နေတာပါ။ အဲဒီကျေးရွာတွေကို စစ်ကောင်စီက လေကြောင်းကနေ အင်အားပို့ဆောင်ပြီး Y-12 ၊MI-35တို့နဲ့ ပစ်ခတ်ခုခံပေးနေတယ်လို့ ပုလဲဒေသက တော်လှန်ရေးတပ်ဖွဲ့တွေက ပြောပါတယ်။
” မနေ့က လေကြောင်းက လာပစ်နေတာ။ အခုလည်း တမနက်လုံး ဒီသုံးရွာနားကို လာပစ်နေတယ်။ စစ်ဇုန်က ကျယ်နေတော့ အခြေနေအားလုံးကို မသိရသေးဘူး”လို့ ပုလဲဒေသ တော်လှန်ရေးတပ်ဖွဲ့တစ်ဖွဲ့က ဦးဆောင်သူက ပြောပါတယ်။
လေကြောင်းတိုက်ခိုက်မှုကြောင့် လူထိခိုက်သေဆုံးမှု မသိရသေးပေမယ့် နေအိမ်တွေ ပျက်စီးမှုရှိတယ်လို့လည်း သူက ဆက်ပြောပါတယ်။
ပုလဲမြို့နယ် ကန့်ဒေါင့်ရဲစခန်းကို ပြည်သူ့လွတ် မြောက် ရေးတပ်မ တော်(PLA)ကဇွန်လ၂ရက် နေ့ကစပြီး ဦးဆောင်တိုက်ခိုက်နေတာဖြစ်ပါတယ်။ အခြားတော်လှန်ရေးတပ်ဖွဲ့တွေက စစ်ကူတွေ မလာနိုင်အောင် ဖြတ်တောက်ပိတ်ဆို့တိုက်ခိုက်နေတာပါ။
စစ်ကောင်စီတပ် အခိုင်အမာတပ်စွဲထားတဲ့ ကန့်ဒေါင့်ကျေးရွာက ရဲစခန်းကို တော်လှန်ရေးတပ်ဖွဲ့တွေကဇွန်လ ၁၂ ရက်နေ့ကတည်းက ဝိုင်းဝန်းပိတ်ဆို့ထားတယ်လို့ ပြည်သူ့လွတ်မြောက်ရေးတပ်မတော် – PLAရဲ့ ပြောရေးဆိုခွင့်ရှိသူက လူထုနွေဦးကို ပြောပါတယ်။
တိုက်ပွဲဖြစ်နေတဲ့ ကန့်ဒေါင့်စခန်းဟာ ပုလဲမြို့ကနေ မကွေးတိုင်း၊ ဂန့်ဂေါမြို့ကိုသွားတဲ့ လမ်းပိုင်းပေါ်မှာရှိပြီး ပုလဲမြို့နဲ့ (၁၄)မိုင်ကွာဝေးပါတယ်။ အဲဒီကျေးရွာက နယ်မြေရဲစခန်းကို စစ်ကောင်စီက တပ်စွဲပြီး အခိုင်အမာပြုလုပ်ထားကာ အင်အား ၁၀၀ခန့်ရှိနေတယ်လို့ PLAရဲ့ပြောရေးဆိုခွင့်ရှိသူက ပြောပါတယ်။
ကန့်ဒေါင့်ရွာအရှေ့မြောက်ဘက် (၆) မိုင်ခန့်အကွာမှာရှိတဲ့ ဇီးဖြူကုန်းရွာက ပျူစစ်စခန်းကို NUG၊MOD အောက်က PDF ခရိုင်ရင်းတွေ ၊ပကဖ တွေကက ဇွန်လ ၁၀ရက်မှာ စတင်တိုက်ခဲ့ပါတယ်။
” တိုက်ပွဲဖြစ်တာတွေက မတူကြဘူး။ အဖွဲ့တွေက ဝင်တိုက်ကြတာ။ ဒါပေမယ့် အားလုံးက ဒီလထဲမှာဘဲ စကြတာ”လို့ ပုလဲဒေက တော်လှန်ရေးရဲဘော်တစ်ဦးက ပြောပါတယ်။
၂၀၂၃ ဇန်နဝါရီကလည်း ကန့်ဒေါင့်ရွာရဲစခန်းကို တော်လှန်ရေးတပ်တွေက တိုက်ခိုက်ခဲ့ပေမယ့် အပြီးသတ် မသိမ်းပိုက်နိုင်ခဲ့ပါဘူး။ အဲဒီနောက်ပိုင်းမှာလည်း တိုက်ပွဲတွေ မကြာခဏဖြစ်နေတာကြောင့် ကန့်ဒေါင့်ရွာအပါအဝင် အနီးအနားက ကျေးရွာတွေက ပြည်သူတွေဟာ ဘေးလွတ်ရာတိမ်းရှောင်နေကြရပါတယ်။
ပြီးခဲ့တဲ့ ဇွန်လ ၁၀ရက်ကလည်း တိုက်ပွဲဖြစ်ရာနေရာတွေကို လေကြောင်းလာတိုက်ခိုက်တဲ့ စစ်ကောင်စီရဲ့ ဂျက်ဖိုက်တာလေယာဉ်ကို PLAနဲ့ ပူးပေါင်းအဖွဲ့တွေကပစ်ခတ်ခဲ့ရာ ပုလဲမြို့အနောက်ဘက် (၇)မိုင်ခန့်အကွာမှာရှိတဲ့ စပါးစေ့ကျေးရွာမှာ ပျက်ကျခဲ့ပါတယ်။ နေအိမ်တစ်အိမ်အတွင်း တိုက်လေယာဉ်ရဲ့အပိုင်းအစတွေ ကျရောက်ခဲ့လို့ အရပ်သားလေးဦး သေဆုံးခဲ့ရပါတယ်။
