ဖားကန့်၊ မှော်စီစာရွာအနီးတိုက်ပွဲ ပိုပြင်းထန်လာ

ဇွန်-၁၇၊၂၀၂၅။ဇော်ရမ်း/People’s Spring

ဖားကန့်မြို့နယ်၊ မှော်စီစာကျေးရွာအနီး၌ တိုက်ပွဲပိုပြင်းထန်ထားပြီး စစ်တပ်က ဗျူဟာကုန်းမှနေ၍ လက်နက်ကြီးများပစ်ခတ်နေသဖြင့် ပြည်သူများ လက်နက်ကြီးနှင့်လေကြောင်းအန္တရာယ်သတိပြုကြရန် တော်လှန်ရေးအင်အားစုများကသတိပေးသည်။

မှော်စီစာကျေးရွာအနီး၌ယနေ့နံနက်မှ ၉နာရီခန့်စ၍ တိုက်ပွဲဖြစ်ခဲ့ပြီး ပိုမိုပြင်းထန်လာသည်ဟု ဒေသခံအချို့ကပြောသည်။

“မှော်စီစာကျောင်းနားလက်နက်ကြီးကျတယ်။ ကျောင်းတွေလည်း ပိတ်လိုက်ပါပြီ။ဒေသခံတွေဟာအိမ်တွေထဲမှာပိတ်မိနေပါတယ်။ ဗျူဟာကုန်းကနေ လက်နက်ကြီးလှမ်းပစ်နေတယ်။ တိုက်ပွဲက ပိုပြင်းထန်လာတယ်”ဟုဒေသခံတစ်ဦးကပြောသည်။

Public Service Announcement

စစ်ကောင်စီသည် တိုက်ပွဲဖြစ်ရာနေရာတို့ ဖားကန့်ဗျူဟာကုန်းမှနေ၍ လက်နက်ကြီးများပစ်ခတ်နေပြီးလေကြောင်းမှလည်း တိုက်ခိုက်လာနိုင်သည့်အတွက် သတိပြုကြရန် KIAနှင့်နီးစပ်သည့်သတင်းရင်းမြင့်က ပြောသည်။

“ဒီကောင်တွေမြေပြင်မှအခြေအနေမဟန်ရင် လေကြောင်းလာနိုင်တယ်။ စစ်ကြောင်းက အင်အားများတယ်။ဒေသခံအချင်းချင်းကူညီပြီးသတင်းတွေမျှဝေပေးနေတယ်” ဟု ၎င်းကပြောသည်။

စစ်တပ်ကလက်နက်ကြီးပစ်ခတ်မှုကြောင့် နေအိမ်ပျက်စီးမှုများနှင့် အရပ်သားထိခိုက်မှုများ ရှိနေပြီး အရေးပေါ် အကူအညီလိုအပ်နေသည့်အခြေအနေဖြစ်ကြောင်း ဖားကန့်ဒေသခံတစ်ဦးကပြောသည်

ရွာအတွင်းပိတ်မိနေသူများအနေဖြင့် စစ်ကြောင်းအခြေအနေကိုကြည့်၍ ထွက်ခွာကြရန်နှင့် မထွက်နိုင်သေးပါက ဗုံးခိုကျင်းအတွင်းနေထိုင်ကြရန် KPDF နှင့် နီးစပ်သူကသတိပေးသည်။

စစ်ကောင်စီစစ်ကြောင်း၌ အင်အား ၁၀၀ခန့်ပါဝင်ပြီး KIA၊KPDF ပူးပေါင်းတပ်ကို ဖယ်ရှားခိုင်းရာမှ ထိပ်တိုက်ရင်ဆိုင်တိုက်ပွဲဖြစ်ပွားခြင်းဟုသတင်းရရှိသည်။မှော်စီစာရွာတွင် ဇွန်လ၉ရက်နှင့် ၁၀ရက်ကလည်း တိုက်ပွဲအပြင်းအထန်ဖြစ်ခဲ့ပြီး စစ်ကောင်စီတပ်ဖွဲ့ဘက်မှ ထိခိုက်သေဆုံးမှုများပြားခဲ့သည်။ စစ်ကောင်စီတပ်သည်မှော်စီစာဘုန်းကြီးကျောင်း၌ဆက်လက်တပ်စွဲထားခဲ့ပြီးဇွန် ၁၇ ရက်တွင် စစ်ကြောင်းလိုက်ထွက်လာခြင်းဖြစ်သည်ဟု သိရသည်။

ဇွန် ၁၆ ရက်ညကလည်း ဖားကန့်မြို့နယ်၊ မှော်ဝမ်းလေးနှင့် မှော်ဝမ်းကြီးရွာ၌ တိုက်ပွဲပြင်းထန်ခဲ့ပြီး လက်နက်ကြီးထိမှန်၍ အရပ်သား ၁ ဦး​သေဆုံးခဲ့ကာ ၆ဦးဒဏ်ရာရခဲ့ကြောင်းသတင်းရရှိသည်။

စစ်ကောင်စီတပ်သည် မေလ ၂၇ရက်ကလုံးခင်းကျေးရွာအုပ်စုကို စတင်ဝင်ရောက်စဉ် KIA၊KPDF က တိုက်ခိုက်ပြီး‌နောက်ပိုင်း ဆက်လက်တိုက်ခိုက်ပါက နေအိမ်များကိုမီးရှို့မည်ဟု ခြိမ်းခြောက်ကာ ဖားကန့်သို့စစ်ကြောင်းထိုးလာခဲ့ခြင်းဟုသိရသည်။

ဖားကန့်ရောက်စစ်ကောင်စီစစ်ကြောင်းကို KIAနှင့် KPDF ပူးပေါင်းတပ်က ဇွန်လ ၅ရက်၊ဇွန်လ ၉ရက်နှင့်ဇွန်လ ၁၀ရက်၌ တိုက်ခိုက်ခဲ့ပြီး ယ‌နေ့အထိ စစ်ရေးဆက်လက်တင်းမာနေသည်။ စစ်ကောင်စီက လက်နက်ကြီးဖြင့်ပစ်ခတ်ခြင်း၊ စစ်ကြောင်းထိုးစဥ်သတ်ဖြတ်ခြင်းများကြောင့်မေလ၂၈ ရက်​နေ့မှ ယနေ့အထိအရပ်သားသေဆုံးသူ၃၀ ဦးနီးပါး ရှိလာပြီဖြစ်သည်။

ဖားကန့်၌ တိုက်ပွဲဆက်လက်ပြင်းထန်နိုင်၍ ဒေသခံများစစ်ဘေးရှောင်နိုင်ရေးအတွက် ဦးစားပေးကြိုတင်ပြင်ဆင်ပေးကြရန် ဒေသခံများနှင့် လူမှုကူညီရေး လုပ်ဆောင်သူများကတောင်းဆိုနေကြသည်။

၂၀၂၄ခုနှစ် ဇူလိုင်လကဖားကန့်မြို့နယ်၊ဆိုင်းတောင်ရဲစခန်းကို KIA၊KPDF ပူးပေါင်းတပ်ကကတိုက်ခိုက်သိမ်းယူစဉ် စစ်ကောင်စီကဆိုင်းတောင်ရွာကို လက်နက်ကြီးဖြင့်ပစ်ခတ်ကာလေကြောင်းမှ လည်းဗုံးကြဲခဲ့၍ အရပ်သားထိခိုက်သေဆုံးမှုများရှိခဲ့သည်။