ဇွန်-၁၆၊ ၂၀၂၅။ ဇော်ရမ်း/People’s Spring
မကွေးတိုင်း၊ စလင်းမြို့နယ်အတွင်း ကျေးရွာအချို့၌ စစ်ရေးတင်းမာနေစဉ် တညောင်တိုက်နယ်စခန်းမှူးသည် စလင်းပကဖထံ အလင်းဝင်ခဲ့သည်။
ဒုရဲမှူးအဆင့်ရှိ အဆိုပါ စခန်းမှူး အလင်းဝင်လာကြောင်းကို စလင်းပကဖက ယနေ့(ဇွန်လ ၁၆ရက်)ညနေ၌ သတင်းထုတ်ပြန်ထားသည်။ အလင်းဝင်ရောက်ပြီး တရားသောဘက်သို့အတူပူးပေါင်းခဲ့သူဟု ထုတ်ပြန်ချက်၌ဖော်ပြထားသည်။
အဆိုပါစခန်းမှူးသည် စလင်းမြို့နယ်မှူးရုံးတွင် ဒု-မြို့နယ်မှူးအဖြစ် ၂နှစ်ခန့် တာဝန်ထမ်းဆောင်ခဲ့ပြီး ၂၀၂၅ ဇွန်လအစောပိုင်းတွင် တညောင်တိုက်နယ်စခန်းမှူးအဖြစ် ပြောင်းရွှေ့လာသူဟု ဆိုသည်။
Public Service Announcement
စစ်ကောင်စီ၏လက်အောက်တွင် တာဝန်မထမ်းဆောင်လို၍ အလင်းဝင်လာသူဖြစ်ပြီး စလင်းမြို့နယ်အတွင်းကျန်ရှိသော စစ်ကောင်စီလက်ခံ စစ်တပ်သားများနှင့် ရဲတပ်များအနေဖြင့်လည်း ပြည်သူနှင့်အတူပူးပေါင်းရန် စလင်းပကဖက တိုက်တွန်းထားသည်။
လက်နက်ခဲယမ်းများဖြင့်အလင်းဝင်ရောက်ပါက ထိုက်တန်သောဆုကြေးငွေ ချီးမြှင့်မည်ဟု အသိပေးထားသည်။
စလင်းမြို့နယ်တွင် ပြီးခဲ့သည့် မေလမှစတင်၍ တိုက်ပွဲများ ပိုပြင်းထန်လာခဲ့ပြီး စစ်ကောင်စီ၏ လေကြောင်းနှင့် လက်နက်ကြီးပစ်ခတ်မှုများ၊ နေအိမ်မီးရှို့မှုများကြောင့် ဂွေးကုန်းကျေးရွာ၊ စနေချောင် ကျေးရွာတို့၌ ပျက်စီးမှုရှိခဲ့သည်။
