ဇွန်-၄၊၂၀၂၅။ထားမြတ်/People’s Spring
ကချင်ပြည်နယ်ဖားကန့်မြို့အခြေစိုက် စစ်ကောင်စီတပ်သို့ လူလာခေါ်သည့် စစ်တပ်ရဟတ်ယာဉ်ကို ကချင်လွတ်လပ်ရေးတပ်မတော်(KIA) ပူးပေါင်းတပ်က ပစ်ခတ်ခဲ့ကြောင်း ကချင်သတင်းရင်းမြစ် တဦးက ပြောကြားသည်။
ဇွန်လ ၄ရက်နေ့လည်ပိုင်းက ဖားကန့် တပ်မကုန်းသို့ ရဟတ်ယာဉ် ၁ စီး ဆင်းသက်သက်ရန် အခြား ရဟတ်ယာဉ် ၁ စီးဖြင့် ပတ်ပတ်လည်ကို ပစ်ခတ်ခဲ့သည်ဟု ကချင်စစ်ရေးသတင်းရင်းမြစ်တဦးက လူမှုကွန်ရက်တွင် အသိပေးထားသည်။
“ဖိုက်တာကပစ်ကူပေးပြီးလူလာခေါ်သွားတယ်” ဟုအခြားကချင်သတင်းရင်းမြစ်တစ်ဦးက ပြောသည်။
Public Service Announcement
စစ်ကောင်စီက ရဟတ်ယာဉ်ဖြင့် လူလာခေါ်သည့် အခြေအနေ ကို စုံစမ်းနေဆဲဖြစ်ပြီး ကချင်သတင်းရင်းမြစ်အချို့၏ အသိပေးချက်တွင် တပ်မ(၃၃) တပ်မမှူး ဗိုလ်မှူးချုပ် ကျော်ဆက်မြင့်အား မြောက်ပိုင်းတိုင်း စစ်ဌာနချုပ်သို့ ခေါ်ဆောင်သွားခြင်းဖြစ်သည်ဟု ဆိုသည်။
ရဟတ်ယာဉ်လာရောက်သည့် ရုပ်သံမှတ်တမ်းကိုလည်းတွေ့ရပြီး ပစ်ခတ်သံအချို့ကိုလည်း ကြားရသည်။ သို့သော် ရဟတ်ယာဥ်ထိမှန်ပျက်ကျခြင်းမရှိပေ။ KIA သည် စစ်တပ်အာဏာသိမ်းပြီးနောက်ပိုင်းစစ်တပ် ရဟတ်ယာဥ်၊လေယာဥ် စုစုပေါင်း ၅ စီးကိုပစ်ချထားသည်။
“သူပစ် ကိုယ်ပစ် ပစ်ကြတယ်။အရပ်သားထိခိုက်မှု ရှိတယ်။တပ်မမှူးကို လာဘ်စားမှုအမိန့်မနာခံမှုနဲ့လာဖမ်းတယ်။မြေပြင်မှာထပ်မီးရှို့တယ်။ “ ဟုကချင်သတင်းရင်းမြစ်တစ်ဦးက လူမှုကွန်ရက်၌ ရေးသားပြီး ရဟတ်ယာဉ် လာရောက်သည့် ရုပ်သံကို ဖော်ပြသည်။
အခြားသတင်းရင်းမြစ်တစ်ဦးကမူ တပ်မမှူးကို လာခေါ်ခြင်းမှာ ဇွန် ၃ ရက်နေ့က ဖားကန့်ဒေသ ပေါက်ကွဲမှုနှင့် ဆက်စပ်သည်ဟု ဆိုသည်။ စစ်ကောင်စီတပ်က ဖားကန့်မြို့နယ်ကို ပြန်လည်ထိန်းချုပ်နိုင်ရေး စစ်ကြောင်းထိုး ဝင်ရောက်လာရာ ဇွန်လ ၂ရက်၊၃ရက်နှင့် ၄ရက်နေ့များတွင် လုံးခင်းဒေသ မှော်စီစာရှိ လုပ်ကွက်များအတွင်း ယာဥ် များကို မီးရှို့ဖျက်ဆီးခဲ့သည်။ထို့အပြင် မှော်စီစာ ရှိ တင်အောင်ကြိုင်လုပ်ကွက်၌ လက်နက်ကြီး ကျည်သို့မဟုတ် ဒရုံးဗုံး ကျခဲ့ပြီးနောက် ယမ်းဂိုဒေါင်ဟု ယူဆရသည့် နေရာတွင် ကြီးမားသောပေါက်ကွဲမှု ဖြစ်ပွားခဲ့ရာ လူထိခိုက်သေဆုံးမှုများ ရှိခဲ့သည်။
ရုပ်သံ-Naw Tu Awng
