ဇွန်-၃၊၂၀၂၅။ တေဇ/People’s Spring
ငလျင်ဘေးအတွက် နိုင်ငံတကာမှ ပေးပို့သော လူသားချင်းစာနာမှူ အကူအညီများကို စစ်ကောင်စီက နိုင်ငံရေး စစ်ရေးလက်နက်အတွက် အသုံးပြုခြင်းမှကာကွယ်နိုင်ရန် “လူသားချင်းစာနာမှု အကူအညီများအား လက်နက်အနေဖြင့် အသုံးချမှု ရပ်” (STOP WoA) လှုပ်ရှားမှုကို ပြုလုပ်မည်ဟု ပြည်တွင်း၊ပြည်ပ တော်လှန်ရေးနှင့် အရပ်ဘက်အဖွဲ့အစည်း ၅၅ခု ယနေ့ ထုတ်ပြန်ကြေညာသည်။
“နိုင်ငံတကာ အစိုးရများနှင့် အဖွဲ့အစည်းများမှ ပေးပို့သော လူသားချင်း စာနာအကူအညီများကို ငလျင်ဒဏ် ထိခိုက်ခံရသော ပြည်သူများထံ အမှန်တကယ် မျှတစွာ တိုက်ရိုက် ရောက်ရှိစေရန် ပြည်တွင်း၊ ပြည်ပ အဖွဲ့အစည်များနှင့်အတူ ပြည်သူလူထုအနေဖြင့် ယခု “STOP WoA” လူထု လှုပ်ရှားမှုတွင် မိမိတို့ ပါဝင်နိုင်မည့် နည်းလမ်းမျိုးစုံဖြင့် ပူးပေါင်းဆောင်ရွက်ရန် နှိုးဆော် တိုက်တွန်းအပ်ပါသည်” ဟု သတင်းထုတ်ပြန်ထားသည်။
ယင်းလှုပ်ရှားမှုကို အဖွဲ့အစည်း ၅၅ ဖွဲ့က ပူးပေါင်း အကောင်အထည်ဖော်မည်ဖြစ်ပြီး ဇွန်လတစ်လလုံးပြုလုပ်မည်ဟု ဆိုသည်။
Public Service Announcement
“အထူးသဖြင့်လွတ်မြောက်နယ်မြေဖြစ်ပြီး သူတို့(စစ်ကောင်စီ)ရဲ့ ထိန်းချုပ်မှုမရှိတဲ့ဒေသတွေမှာဆိုရင် သူတို့တွေက ပြည်သူတွေဆီကိုမပေးဘဲ ထားထားနေပြီး တမင်သက်သက်ကို လက်နက်သဖွယ်အသုံးချပြီး အညှိုးတကြီးနဲ့ လူထုဆီမရောက်အောင်ပိတ်ထားတဲ့ကိစ္စတွေ။ ဒါတွေကို ကျွန်မတို့ဖော်ထုတ်ဖို့လိုတယ်။ နိုင်ငံတကာသိအောင် ပြောဖို့လိုတယ်။ ကျွန်မတို့ပြည်သူတွေသိအောင်လည်း ပြောပြရမယ် “ဟု ပူးတွဲကြေညာချက်တွင်ပါဝင်သော Progressive Voice ဥက္ကဋ္ဌ ဒေါ်ခင်ဥမ္မာက ပြောသည်။
လူသားချင်းစာနာမှု အကူအညီအတွက် စစ်အုပ်စုထံသို့ ပေးအပ်ခြင်းသည် ပြည်သူများထံသို့ ရောက်ရှိခြင်းမရှိကြောင်း နိုင်ငံတကာအစိုးရများနှင့် အဖွဲ့အစည်းများကိုအသိပေးရမည်ဖြစ်ကြောင်း ၎င်းက ဆက်ပြောသည်။
နာဂစ် ၊ မိုခါ ၊ ရာဂီ စသည့် သဘာဝဘေးများတွင် ပြည်သူများအတွက်ကူညီမှုများကို စစ်ကောင်စီကအမြတ်ထုတ်ခဲ့သကဲ့သို့ လက်ရှိကြုံခဲ့ရသည့် စစ်ကိုင်းငလျင်ကြီး အတွက်ကူညီမှုများကို လည်း ယင်းကဲ့သို့အသုံးမပြုနိုင်ရန် ရည်ရွယ်လုပ်ဆောင်ခြင်းဖြစ်ကြောင်း အရပ်ဘက်အဖွဲ့များက ပူးတွဲကြေညာသည်။
အဆိုပါလှုပ်ရှားမှုနှင့်ပတ်သက်၍ နိုင်ငံတကာ အစိုးရများ၊ အာဆီယံ၊ ယူအန် အေဂျင်စီများနှင့် နိုင်ငံတကာ အစိုးရမဟုတ်သော အဖွဲ့အစည်းများ (INGOs) များကို စည်းရုံးလှုံဆော် တိုက်တွန်းသွားမည် ဟုဆိုသည်။
ပြီးခဲ့သည့် မေလကလည်း ယခု ၅၅ဖွဲ့ထဲတွင် ပါဝင်သော သွေးစွန်းငွေအဖွဲ့က ငလျင်ဘေးလူသားချင်းစာနာမှုအကူအညီများ နိုင်ငံရေးနှင့်စစ်ရေးအတွက်မဖြစ်စေရန် WOA( Weaponization Of Aid) ကမ်ပိန်းလုပ်ခဲ့သည်။
စစ်ကောင်စီသည် လက်ရှိငလျင်ဘေးအတွက် နိုင်ငံတကာ နှင့်ပြည်တွင်းမှ လှူဒါန်းသည့် အလှူငွေကျပ် ၁၁၅ ဘီလျံကျော် နှင့် ကန်ဒေါ်လာ နှစ်သန်းကျော်ရရှိသည်ဟု ထုတ်ပြန်ထားသော်လည်း ငလျင်ဒဏ်သင့်ပြည်သူများထံသို့ ပြန်လည်လှူဒါန်းသည့် ပမာဏသည် အလွန်နည်းကြောင်း ပြည်သူများက ဝေဖန်ထားသည်။
မတ်လ ၂၈ ရက်က စစ်ကိုင်းမြို့အနီးကို ဗဟိုပြု၍ လှုပ်ခတ်ခဲ့သည့် စစ်ကိုင်းငလျင်ကြီးကြောင့် သေဆုံးသူ လေးထောင်ကျော်အထိ ရှိခဲ့ပြီး စစ်ကောင်စီဘက်မှ အလှူငွေများရရှိထားသော်လည်း နှစ်လကျော်ကြာသည် အထိ ပြန်လည်ထူထောင်ရေးအစီအစဉ်များကို ထိထိရောက်ရောက်လုပ်ဆောင်ခြင်းမတွေ့ရပေ။
သို့သော်လည်း စစ်ကောင်စီက မတ်လ ၂၉မှ မေ ၂၂ အတွင်း ငလျင်ဘေးဒဏ် ခံစားရသည့် မန္တလေး၊ စစ်ကိုင်း၊ ပဲခူး (အရှေ့)နှင့် ရှမ်း(တောင်) အပါအဝင် ဒေသ ၁၅ခု၌ အရပ်သားပြည်သူများကို ပစ်မှတ်ထားသော လေကြောင်းဗုံးကြဲတိုက်ခိုက်မှု အကြိမ်ရေ အနည်းဆုံး ၄၁၄ ကြိမ် တိုက်ခိုက်ခဲ့ပြီး အရပ်သားကလေးငယ် ၅၉ ဦး အပါအဝင်လူဦးရေ ၃၅၀ ခန့်သေဆုံးခဲ့သည်ဟု အရပ်ဘက်အဖွဲ့များက မှတ်တမ်းတင်ထားသည်။
“စစ်အုပ်စုမှ တဆင့် ပေးပို့နေသော လူသားချင်း စာနာထောက်ထား အကူအညီ ငွေကြေးများသည် သွေးစွန်းငွေများ မဖြစ်လာစေရန် နိုင်ငံတကာ အသိုင်းအဝိုင်းမှ အထူး သတိထားရန် လိုအပ်နေပါကြောင်း မိမိတို့မှ စိုးရိမ်ကြီးစွာ သတိပေးလိုပါသည်။” ဟု အရပ်ဘက်အဖွဲ့များက သတိပေးထားသည်။
