မေ-၃၁၊၂၀၂၅။ဆဏ်း/People’s Spring
မြေပြင်အတွက် ပံ့ပိုးနိုင်ဖို့ ရည်ရွယ်ပြုလုပ်တဲ့ တော်လှန်အနုပညာရှင် ဖြူဖြူကျော်သိန်းရဲ့ တစ်ကိုယ်တော်ဖျော်ဖြေပွဲ ငါးပွဲကနေ ရန်ပုံငွေ သိန်း သုံးသောင်းခွဲကျော်ရရှိခဲ့ပါတယ်။
ဖြူဖြူကျော်သိန်းရဲ့ တစ်ကိုယ်တော်ပွဲတွေကို လန်ဒန်၊ ကိုရီးယား၊ ဩစတေးလျ နဲ့ ဂျပန်နိုင်ငံတို့မှာ ပြုလုပ်ခဲ့တာပါ။
ဒီဖျော်ဖြေပွဲတွေထဲမှာ မေ ၂၅ ရက်က ဂျပန်နိုင်ငံမှာပြုလုပ်ခဲ့တဲ့ တစ်ကိုယ်တော်ဖျော်ဖြေပွဲကနေ ယန်း သန်း ၇၀ ကျော် ( မြန်မာငွေကျပ် သိန်း နှစ်သောင်းခန့်) ရရှိခဲ့တယ်လို့ Phyu Phyu in Japan က အသိပေးထားပါတယ်။
Public Service Announcement
ဒီပွဲက လာရောက်ကြည့်ရှုသူ ခုနစ်ထောင်ကျော်ရှိခဲ့တာဖြစ်ပြီး သူမရဲ့ပွဲတွေထဲမှာ ရန်ပုံငွေ အများဆုံးရရှိခဲ့တဲ့ပွဲပါ။
ဧပြီလက ဩစတေးလျနိုင်ငံ ဆစ်ဒနီ နဲ့ မဲလ်ဘုန်းမှာ ပြုလုပ်တဲ့ ဖျော်ဖြေပွဲနှစ်ပွဲမှာတော့ ဩစတေးလျ ဒေါ်လာ သုံးသိန်းကျော် ( မြန်မာငွေကျပ်သိန်း ၈၄၀၀ခန့်)ရရှိခဲ့ပြီးမတ်လက ကိုရီးယားနိုင်ငံမှာပြုလုပ်တဲ့ ပွဲမှာတော့ ကိုရီးယားဝမ် သိန်း နှစ်ထောင့်သုံးရာခန့် (မြန်မာငွေကျပ် သိန်း ၆၈၀၀ ခန့်) ရရှိခဲ့တယ်လို့ သက်ဆိုင်ရာအဖွဲ့တွေက ထုတ်ပြန်ထားပါတယ်။
ပထမဆုံးပွဲအနေနဲ့ ပြီးခဲ့တဲ့နှစ် နိုဝင်ဘာ ၂ ရက်က ပြုလုပ်တဲ့ Phyu Phyu in London ပွဲက ရရှိတဲ့ ရန်ပုံငွေကို ထုတ်ပြန်ထားခြင်းမရှိပေမယ့် ပြီးခဲ့တဲ့ ငလျင်အတွက် ဒီပွဲကရရှိတဲ့ ငွေထဲကနေ သိန်းတစ်ထောင် လှူဒါန်းခဲ့တယ်လို့ ဖျော်ဖြေပွဲကျင်းပတဲ့ Myanmar Event in UK က အသိပေးထားပါတယ်။
ဒါကြောင့် ဖြူဖြူကျော်သိန်းရဲ့ တစ်ကိုယ်တော်ဖျော်ဖြေပွဲတွေက မြန်မာငွေကျပ်သိန်းပေါင်း သုံးသောင်းခွဲကျော်ရရှိခဲ့တယ်လို့ အကြမ်းဖျဉ်းတွက်ချက်လို့ရပါတယ်။
ဒီပွဲတွေကို ဖြူဖြူကျော်သိန်းက အနုပညာကြေးမယူပဲ မေတ္တာနဲ့သွားရောက်ဖျော်ဖြေပေးခဲ့တာဖြစ်ပြီး လတ်တလောမှာတော့သူမရဲ့ ကျန်းမာရေး အခြေအနေအရ ဖျော်ဖြေပွဲ ပြုလုပ်မှုကို ခေတ္တရပ်နားထားမယ်လို့ အသိပေးထားပါတယ်။
