ပြည်တွင်းကလိုအပ်နေတဲ့နေရာတွေမှာ အသုံးပြုဖို့ တစ်ကိုယ်တော်ဖျော်ဖြေပွဲ တွေ ပြုလုပ်နေတဲ့ တော်လှန်အနုပညာရှင် ဖြူဖြူကျော်သိန်းရဲ့ တတိယမြောက်တစ်ကိုယ်တော်ပွဲကို ဩစတေးလျ နိုင်ငံမှာ ပြုလုပ်မှာဖြစ်ပါတယ်။
“ဧပြီ ၅ ရက်နေ့မှာ Phyu Phyu in Sydney နဲ့ စဖွင့်ပါမယ်။ Riverside Theatre Paramatta ဆိုတဲ့ လှပ တဲ့လူ ၇၅၀ ဆံ့ ကဇာတ်ရုံကြီးမှာ လုပ်မှာဖြစ်ပါတယ်။ ” လို့ Phyu Phyu in Australia ဖျော်ဖြေပွဲနဲ့ ပတ်သက်ပြီး အသိပေးထားပါတယ်။
ဒီပွဲကို ဩစတေးလျနိုင်ငံရောက် မြန်မာလူငယ်တွေက စီစဉ်တာဖြစ်ပြီး လက်မှတ်တွေကို မတ် ၁၃ ရက်မှာစတင်ရောင်းချသွားမယ်လို့ ကြေညာထားပါတယ်။
Public Service Announcement
ပွဲမတိုင်ခင်မှာလည်း ပရိသတ်တွေနဲ့ သီးသန့်တွေ့ဆုံတဲ့ အစီအစဉ် ပြုလုပ်မှာဖြစ်ပြီး အဲဒီ့ပွဲအတွက်တော့ လူ ၅၀ စာ လက်မှတ်ရောင်းချသွားမယ်လို့ ဆိုပါတယ်။
ဖျော်ဖြေပွဲ လက်မှတ်ဈေးနှုန်းတွေကို ကြေညာထားတာမတွေ့ရပေမယ့် ပရိသတ်နဲ့တွေ့ဆုံပွဲကိုတော့ ဩစတေးလျဒေါ်လာ ၁၅၀ သတ်မှတ်ထားတယ်လို့ ကြေညာထားပါတယ်။
နွေဦး တော် လှန်ရေးကာလမှာ ဖြူဖြူကျော်သိန်းက ပြည်တွင်းကလိုအပ်နေတဲ့နေရာတွေကို ကူညီနိုင်ဖို့ တစ်ကိုယ်တော်ဖျော်ဖြေပွဲတွေပြုလုပ်နေတာဖြစ်ပြီး လန်ဒန် နဲ့ ကိုရီးယားမှာ ဖျော်ဖြေပွဲတွေပြုလုပ်ခဲ့ပါတယ်။
ရှေ့ပွဲနှစ်ပွဲစလုံးက ပရိသတ်အားပေးမှုနဲ့ အောင်မြင်တဲ့ ဖျော်ဖြေပွဲတွေဖြစ်ခဲ့ပြီး ဖြူဖြူကျော်သိန်းက အနုပညာကြေးမယူပဲ ဖျော်ဖြေပေးနေတာဖြစ်ပါတယ်။
ပြီးခဲ့တဲ့ မတ် ၁ ရက်က ပြုလုပ်ခဲ့တဲ့ ကိုရီးယား ဖျော်ဖြေပွဲက မြန်မာငွေ သိန်း ခြောက်ထောင့်ရှစ်ရာ ခန့်ရရှိခဲ့ပါတယ်။
ဩစတေးလျနိုင်ငံရဲ့ မြို့ လေးမြို့မှာ ငါးပွဲဖျော်ဖြေပေးဖို့ ဖိတ်ခေါ်ခံခဲ့ရပေမယ့် သူမရဲ့ကျန်းမာရေးအခြေအနေအရ နှစ်ပွဲသာဖျော်ဖြေနိုင်မယ်လို့ ပြီးခဲ့တဲ့ရက်က အသိပေးထားပါတယ်။
ဖြူဖြူကျော်သိန်းက တစ်ကိုယ်တော်ဖျော်ဖြေပွဲတွေကို သူမရဲ့ ကျန်းမာရေးအခြေအနေပေါ်မူတည်ပြီး လုပ်ဆောင်သွားမယ်လို့ အသိပေးထားပါတယ်။
