မတ်-၂၇၊၂၀၂၅။ဆဏ်း / People’s Spring
တစ်ကိုယ်တော်ဖျော်ဖြေပွဲပြုလုပ်ဖို့ ဩစတေးလျ နိုင်ငံကို ရောက်ရှိနေတဲ့ ဖြူဖြူကျော်သိန်းက New South Wales Parliament House မှာ မိန့်ခွန်းပြောခွင့်ရခဲ့ပြီး Unshaken Spirit Heart Award ကိုလက်ခံခဲ့ရတယ်လို့ အသိပေးထားပါတယ်။
“Unshaken Spirit Heart Award ဆိုတဲ့ Community Award ကိုလည်း ဂုဏ်ယူစွာ လက်ခံယူခဲ့ပါတယ်။ ဒီဆုလေးဟာ ဒီ ၄ နှစ်တာမှာ ပြည်သူ့ဖက်ရပ်တည်တဲ့ အနုပညာရှင်ကို မြန်မာ community က ပထမဆုံးပေးတဲ့ဆုလေးပါ။ ခုလို အသိအမှတ်ပြုမှုအတွက် Heart Beams Rising ကိုလည်း ကျေးဇူးတင်ပါတယ်” လို့ ဖြူဖြူကျော်သိန်းက ပြောပါတယ်။
New South Wales Parliament House မှာ မိန့်ခွန်း ပြောခဲ့ချိန်မှာတော့ ပါလီမန် အမတ်များတွေ မြန်မာ့အရေးတက်ကြွလှုပ်ရှားသူများနဲ့အတူ ပါမောက္ခ Sean Turnell လည်း တက်ရောက်ခဲ့တယ်လို့ဆိုပါတယ်။
Public Service Announcement
“ဒီနေ့ ဖြူဖြူနဲ့အတူ သယ်ဆောင်လာတာက မြန်မာနိုင်ငံတနှံ့တလျား တောတောင်နယ်စပ် အသီးသီး နဲ့ ကမ္ဘာအရပ်ရပ်မှာ ခိုလှုံနေရတဲ့ မြန်မာပြည်သူပရိသတ်တွေနဲ့ ဖြူဖြူ့ရဲ့အနုပညာ လုပ်ဖော်ကိုင်ဖက်တစ်ယောက်ချင်းစီရဲ့ ရင်တွင်းက စကားသံလေးတွေပါ” လို့ သူမရဲ့ မိန့်ခွန်းနဲ့ပတ်သက်ပြီး ပြောထားပါတယ်။
သူမရဲ့ မိန့်ခွန်းကို နားထောင်ခဲ့တဲ့ ပါလီမန်အမတ်တစ်ယောက်က “ဪ…ငါတို့သိတဲ့ ဒီမိုကရေစီဆိုတာ သူ့အလိုအလျောက် ရှင်သန်နေနိုင်တာ မဟုတ်ပါလား၊ ဒါက ကာကွယ် ထိန်းသိမ်းရမယ့်အရာပါလား” လို့တွေးမိတယ်လို့ ပွဲအပြီးမှာပြောခဲ့တဲ့အကြောင်း ဖြူဖြူက ပြန်လည်မျှဝေထားပါတယ်။
ဖြူဖြူကျော်သိန်းက ဩစတေးလျ နိုင်ငံမှာ တစ်ကိုယ်တော်ဖျော်ဖြေပွဲ နှစ်ပွဲပြုလုပ်မှာဖြစ်ပြီး ဧပြီ ၅ ရက်မှာ ဆစ်ဒနီမြို့ နဲ့ ဧပြီ ၁၂ ရက်မှာ မဲလ်ဘုန်း မြို့တို့မှာပြုလုပ်မှာဖြစ်ပါတယ်။
ဖြူဖြူကျော်သိန်းက တစ်ကိုယ်တော်ဖျော်ဖြေပွဲတွေကို တော်လှန်ရေးအတွက်ထောက်ပို့ နိုင်ဖို့ ပြုလုပ်နေတာဖြစ်ပြီး သူမရဲ့ အနုပညာကြေးမယူပဲ ဖျော်ဖြေပေးနေတာပါ။
ပထမဆုံးပွဲအနေနဲ့ လန်ဒန်မြို့မှာ ပြုလုပ်ခဲ့ပြီး ဒုတိယပွဲကိုတော့ ကိုရီးယားနိုင်ငံမှာ ပြုလုပ်ခဲ့တာဖြစ်ပါတယ်။
