မေလ ၂၁၊၂၀၂၅။ထားမြတ်/People’s Spring
ကရင်အမျိုးသားအစည်းအရုံး(KNU) တပ်မဟာ(၇)နယ်မြေ ထိုင်း − မြန်မာနယ်စပ် သောင်ရင်းမြစ်အခြေစိုက် စစ်ကောင်စီတပ်စခန်း ၈ခုကို တိုက်ခိုက်သိမ်းပိုက်ခဲ့ကြောင်း KNU ဗဟိုကထုတ်ပြန်ပြီး တိုက်ပွဲဝင် တပ်ဗိုလ် ၊တပ်မှူးများနှင့် ရဲဘော်ရဲဘက်များအား ယနေ့(မေလ ၂၁ရက်)တွင် ဂုဏ်ပြုအခမ်းအနား ကျင်းပခဲ့သည်။
တပ်မဟာ(၇)အတွင်းရှိ သောင်ရင်းမြစ်အခြေစိုက်သော စစ်ကောင်စီတပ်စခန်း (၈)လုံးကို ၂၀၂၄ ဒီဇင်ဘာ ၁၆ရက်မှ ၂၀၂၅ မေလ ၁၉ ရက်အထိ ငါးလအတွင်း တိုက်ခိုက်သိမ်းပိုက်နိုင်ခဲ့ခြင်းဖြစ်သည်။
ထိုင်း-မြန်မာ နယ်စပ်ရှိ မော်ဖိုးခီး(မော်ဖိုးကေ)စခန်းအပြင် မော်ဖားသူး၊ တာလယ်၊ တခေါ်ဘီခွီး၊ ပူလူးတူ၊ ခလယ်ဒေး၊ မော်ကွီးလုနှင့် လေးဝေါ်စသည့် စစ်ကောင်စီခြေကုပ်စခန်း ၈ ခုကို သိမ်းပိုက်ခဲ့ခြင်း ဖြစ်သည်။
Public Service Announcement
တိုက်ခိုက်မှုကို ကရင်အမျိုးသားလွတ်မြောက်ရေး တပ်မတော်-KNLA တပ်မဟာ(၇) စစ်ရေးကွပ်ကဲမှု လက်အောက်ရှိ တပ်ရင်း (၂၂)တပ်ရင်းမှူး ဦးဆောင်၍ ကရင်အမျိုးသားလွတ်မြောက်ရေး တပ်မတော်-KNLA ၊ ကရင်အမျိုးသားကာကွယ်ရေးတပ်ဖွဲ-KNDO တပ်ဗိုလ်၊ တပ်မှူးများနှင့် ရဲဘော်၊ရဲဘက်များမှ တိုက်ခိုက်သိမ်းပိုက်ခဲ့ခြင်းဖြစ်သည်ဟု ဖော်ပြသည်။
အဆိုပါ တပ်ဗိုလ်၊ တပ်မှူးများနှင့် ရဲဘော်၊ရဲဘက်များမှ တိုက်ပွဲများတွင် စွမ်းစွမ်းတမံ တိုက်ပွဲဝင်၍ စခန်းများသိမ်းပိုက်နိုင်မှုကြောင့် သောင်းရင်းမြစ် ဘေးရှိ ရွာသူ၊ရွာသားများ အကြောက်တရား ကင်းလွတ်စွာဖြင့် လွတ်လပ်စွာသွားလာ၍ လုပ်ကိုင်စားသောက်နိုင်ပြီဖြစ်ကြောင်း ထုတ်ပြန်သည်။
ထို့ကြောင့် ဘားအံခရိုင် တပ်မဟာ(၇)ရှိ တာဝန်ရှိခေါင်းဆောင်များ၊ ဗဟိုနှင့် ဖားအံခရိုင်ကရင်အမျိုးသမီးအစည်းအရုံး(KWO)၊ ဒေသခံ ရွာသူရွာသားများက စခန်းသိမ်းတိုက်ပွဲများအား ရဲစွမ်းသတ္တိဖြင့် စွမ်းစွမ်းတမံ တိုက်ပွဲဝင်ခဲ့ကြသော တပ်ဗိုလ်၊ တပ်မှူးများနှင့် ရဲဘော်၊ရဲဘက်များကို ဂုဏ်ပြုခြင်းအစီအစဉ်အား ယနေ့ပြုလုပ်ခဲ့ဟု အသိပေးပြီး ဂုဏ်ပြုပွဲ ရုပ်သံမှတ်တမ်းကို ဖော်ပြသည်။
ယင်းရုပ်သံတွင် အောင်ပွဲရရဲဘော်များကို ပြည်သူများက ပန်းကုံးစွပ် ကြိုဆိုဂုဏ်ပြုကြသည်ကို တွေ့ရသည်။
