ဧပြီ ၂၆၊၂၀၂၅။ဒီဒီး၊ဇော်ရမ်း/People’s Spring
ရန်ကုန် − ထားဝယ်ကားလမ်းပေါ်မှာရှိတဲ့ ထားဝယ်မြို့နယ် မောင်မယ်မယ်ရှောင်ကျေးရွာက ဟားလီးကွေ့ စစ်ကောင်စီတပ်စခန်းကို တော်လှန်ရေးပူးပေါင်းတပ်တွေက ဒီကနေ့(ဧပြီ ၂၆ရက်) ညနေပိုင်းမှာ သိမ်းပိုက်ခဲ့ပါတယ်။
ဒီကနေ့ နံနက် ၆နာရီလောက်က စတင်တိုက်ခိုက်ခဲ့တဲ့ ဒေသအရပ်အခေါ် ဟားလီးကွေ့စစ်ကောင်စီတပ်စခန်းကို ညနေ ၅နာရီလောက်မှာ သိမ်းပိုက်ရရှိခဲ့တာလို့ ထားဝယ်ခရိုင်က တော်လှန်ရေးရဲဘော်တစ်ဦးက ပြောပါတယ်။
” စခန်းကို မီးရှို့ခဲ့တယ်။ လက်နက်တွေလည်းရတယ်”လို့ ထားဝယ်ခရိုင်က တော်လှန်ရေးရဲဘော်တစ်ဦးက ပြောပါတယ်။
Public Service Announcement
အင်အား ၂၀လောက်သာရှိတဲ့ ဟားလီးကွေးစခန်းသိမ်းတိုက်ပွဲမှာ စစ်ကောင်စီတပ်သား ၁၆ဦးက အလံဖြူထောင်လက်နက်ချခဲ့တယ်လို့ စုံစမ်းသိရပါတယ်။ တိုက်ပွဲအတွင်းမှာ စစ်ကောင်စီတပ်သား လေးဦး သေဆုံးခဲ့ပြီး စခန်းရဲ့အကြီးအကဲ ဗိုလ်ကြီးကတော့ စခန်းသိမ်းပိုက်ခံရအပြီးမှာ သူ့ကိုယ်သူ သေနတ်နဲ့ ပစ်သတ် အဆုံးစီရင်သွားတယ်လို့ ထားဝယ်ခရိုင်က တော်လှန်ရေးရဲဘော်တစ်ဦးက ပြောပါတယ်။
” လေးယောက်က တိုက်ပွဲမှာ သေတာ။ ဗိုလ်ကြီးတော့ အဖမ်းခံရမှာကြောက်လို့ထင်တယ် သူ့ကိုယ်သူ သေနတ်နဲ့ ပစ်သတ်သေသွားတယ်”လို့ ထားဝယ်ခရိုင်က တော်လှန်ရေးရဲဘော်တစ်ဦးက ပြောပါတယ်။
တိုက်ပွဲဖြစ်နေစဉ် ဒီကနေ့ နေ့လည်ပိုင်းမှာ စစ်ကောင်စီက လေကြောင်းကနေ ဗုံးလာကြဲလို့ ဇဟာကျေးရွာဘုန်းကြီးကျောင်းအနီး ဗုံးကျလို့ အရပ်သားနှစ်ဦး သေဆုံးပြီး ဘုန်းကြီးနှစ်ပါးလည်း ဒဏ်ရာရခဲ့တယ်လို့လည်း သူက ပြောပါတယ်။
ကရင်အမျိုးသားလွတ်မြောက်ရေးတပ်မတော်(KNLA)၊ ထားဝယ်ပြည်သူ့လွတ်မြောက်ရေးတပ်-TPLF၊ ဓတယ်အမျိုးသားလွတ်မြောက်ရေးတပ်တော်(DNLA)အပါအဝင် တော်လှန်ရေးပူးပေါင်းတပ်တွေက စုပေါင်းတိုက်ခိုက်ခဲ့တာလို့ စုံစမ်းသိရပါတယ်။
ပြီးခဲ့တဲ့ ဧပြီ ၁၉ရက်ကလည်း ထားဝယ်ခရိုင်အတွင်း တပ်မဟာ(၄)နယ်မြေက စစ်ကောင်စီရဲ့ ဗျုဟာစခန်းတစ်ခုဖြစ်တဲ့ ထီးထစခန်းကို ကရင်အမျိုးသားလွတ်မြောက်ရေးတပ်မတော်(KNLA) နဲ့ ပူးပေါင်းအဖွဲ့တွေက သိမ်းပိုက်ခဲ့ပါတယ်။ အဲဒီစခန်းက ဗျူဟာမှူးကိုလည်း အသေဖမ်းမိတယ်ပါတယ်။
