စစ်​ကောင်စီကျူးလွန်တဲ့ ရေထွက်ရွာလူသတ်ပွဲ

ရှိန်း/People’s Spring

မြန်မာနှစ်ကူးပြီး တတိယ​မြောက်​နေ့(ဧပြီ ၁၉ရက်​နေ့) ဖြစ်ပါတယ်။ဧပြီလ​​နေ​ရောင်ဟာ ပူပြင်းလှပါတယ်။ သပိတ်ကျင်းမြို့နယ်၊ရေထွက်ကျေးရွာဇာတိကိုသန်းမြိုင်ရဲ့နားထဲမှာ လေယာဉ်ဝဲသံမကြာခဏ‌‌ကြား နေရပါတယ်။

အရင်ရက်ကမှ ရေထွက်ရွာလမ်းခွဲဘက်ကို စစ်တပ်က လေကြောင်းကနေ ဗုံးကြဲထားတာမို့သတိတော့ထားနေပါတယ်။‌ဒါ့အပြင်ဧပြီ ၁၈ရက်နေ့ကပဲ သပိတ်ကျင်းမြို့နယ်လိပ်ကျရွာကိုတိုက်​လေယာဥ်နဲ့ ဗုံးလို့ ပြည်သူ၁၃‌‌ဦး သေဆုံးထားခဲ့တာမို့ ကိုသန်းမြိုင် စိတ်ချလက်ချမနေရဲပါ။

ကိုယ်တိုင်သတိထားနေထိုင်သလို မိသားစုဝင် တွေကိုလည်း လှမ်းသတိပေးထားပါ​သေးတယ်။

ပူးပြင်လှတဲ့ ဧပြီ ၁၉ ရက်​​နေ့ မွန်းလွဲ ၁နာရီကျော်မှာတိုက်လေယာဉ်ခပ်နိမ့်နိမ့်ဝဲသံကြားရပါတယ်။ဗုံး​ကြောက်လို့မိသားစုနဲ့အတူဗုံးခိုကျင်းထဲအမြန်ဝင်​ပြေးခဲ့ကြပါတယ်။ဗုံးခိုကျင်းနဲ့ရောက်ချိန်မှာပဲ ကျယ်လောင်တဲ့ ပေါက်ကွဲသံကြီး ၂ ကြိမ်နဲ့အတူ မီးခိုးလုံးတွေအူထွက်လာပါ​တော့တယ်။

မျက်စိတမှိတ်အတွင်းမှာသွေးအလိမ်းလိမ်းနဲ့ပတ်ဝန်းကျင်တစ်ခုလုံးမီး​လောင်ကျွမ်း​ပေါက်ကွဲပြီး ကမ္ဘာပျက်သလိုဖြစ်​နေတာကိုသန်းမြိုင် မြင်တွေ့လိုက်ရပါတယ်။

“အပြစ်မရှိတဲ့ပြည်သူတွေကိုပဲ စကစကလုပ်နေတာလား။အပြစ်မရှိတဲ့ကလေးလေးတွေ ကျွန် တော်ရှေ့တင်သေသွားခဲ့တာ”လို့ ကိုသန်းမြိုင်ကပြောပါတယ်။

ကိုသန်းမြိုင်တို့မိသားစုဟာရေထွက်ရွာမှာ မုန့်နဲ့ ကုန်စုံဆိုင်ဖွင့်ထားတာပါ။စစ်​ကောင်စီ ​လေတပ်ကတိုက်လေယာဉ်ကဗုံးလာကြဲတဲ့အချိန်မှာ လမ်း လျှောက်တက်စ ကလေငယ်​လေးတွေအပါအဝင် ကလေး ၇ ယောက်လောက်ကအုပ်စုလိုက်ကိုသန်းမြိုင်တို့မုန့်ဆိုင်မှာ ဈေးဝယ်နေကြတာပါ။

တိုက်လေယာဉ်ကနေကြဲချလိုက်တဲ့ဗုံးဟာကိုသန်းမြိုင်တို့‌ ဆိုင်အနီးကပဲ ကုန်မာဆိုင်ပေါ်ကိုကျခဲ့တာပါ။ကုန်မာဆိုင်က ဝန်ထမ်းတွေအပါအဝင်​ဈေးဆိုင်ကတိုင်တွေပါမကျန်အကုန်အပျောက်ကုန်တာဖြစ်ပါတယ်။ကိုသန်းမြိုင်အိမ်ကနေ မုန့်ဝယ်ပြီးထွက်သွားတဲ့ ကလေးငယ်​လေး​တွေအုပ်စုဟာလည်း အခန္ဒာကိုယ်အပိုင်းပိုင်းပျက်ကုန်တာဖြစ်ပါတယ်။

ဒါ့အပြင်အိမ်နီးနားချင်းမိတ်​​ဆွေမိသားစု ၇ ယောက်ရယ် ၊သားအမိနှစ်ယောက်ထဲနေထိုင်တဲ့သူတွေရယ်၊ ကွမ်းယာဆိုင်က ဆယ်ကျော်သက်အရွယ်အမျိုးသမီးငယ်လေးတွေရယ် အားလုံး စစ်တပ်ရဲ့ လေယာဉ် ဗုံးကြောင့် စက္ကန့်ပိုင်းအတွင်းသေဆုံးသွားကြပါတယ်။

“ဈေးဆိုင်တွေဆိုတော့ဓာတ်ဆီတွေလည်းရောင်းကြတယ်အကုန်ပေါက်ကွဲထွက်ပြီးမီးတွေပါလောင်ကုန်တာ၊”လို့ ဒေသခံတဦးက ပြောပါတယ်။

ဒါအပြင်လက်နက်ကြီးစထိမှန်ပြီးမီးလောင်ပျက်စီးကုန်တဲ့ အိမ်တွေထဲမှာ ကိုသန်းမြိုင်တို့ မုန့်နဲ့ ကုန်စုံဆိုင်ဖွင့်ထားတဲ့တိုက်ကလေး လည်းပါဝင်ပါတယ်။

“ဒါက ပျောက်သွားတဲ့ကွမ်းယာဆိုင်၊ဒါကကျွန် တော်တိုက်လေး ။နေမဖြစ်တော့လို့ဘူဒိုဇာနဲ့ဖြိုချထားတာ”လို့ ကိုသန်းမြိုင်က သူ့အိမ်နေရာလေး‌‌ကိုလက်ညှိုးထိုးပြရင်းရင်ဖွင့်ပါတယ်။

ရေထွက်ကျေးရွာဟာမန္တလေး- မိုးကုတ်လမ်းမကြီးကနေ တဆင့်တောင်တွေဘက်ကိုသွားရတဲ့ နေရာပါ။လမ်းမပေါ်မှာရှိတဲ့ရွာမဟုတ်ဘဲ အထဲအထိဝင်ရတာမို့ သွားရ ၊ လာရတာ အရမ်းအဆင် ပြေတဲ့နေရာတော့မဟုတ်ပါဘူး။

ဒါပေမယ့် ထာဝရကုမ္ပဏီအပါအဝင်နာမည်ကြီး ရွှေကုမ္ပဏီတွေရှိသလို ရွှေလုပ်ကွက်ရှိတဲ့နေရာမို့ ဒေသခံတွေဟာချမ်းသာကြသလိုစည်ကားတဲ့ရွာ​လေးဖြစ်ပါတယ်။

ဒီလိုသာယာစည်ကားနေတဲ့ဈေးဟာစစ်တပ်ရဲ့ဗုံးဒဏ်ကြောင့်မိနစ်ပိုင်းအတွင်းမှာသွေးသံတရဲရဲနဲ့သစ်ပင် တွေတက်ချိတ်နေတဲ့ခန္ဓာကိုယ်အစိတ်အပိုင်းတွေ၊အသားတုံး​တွေအဖြစ်ပဲကျန်ခဲ့တဲ့ ခန္ဒာကိုယ်အစိတ်အပိုင်း​တွေ ၊မီးလောင်ထားပြီး ခန္ဓာကိုယ်အပိုင်းပိုင်းပြတ်နေတဲ့ကလေးငယ်တွေ၊သွေးညှီနံ​​တွေ ခပ်ပုတ်ပုတ်အနံ့‌ တွေထွက်​နေတဲ့ တစပြင်အဖြစ်​ပြောင်းလဲသွားပါတယ်။

တကယ်​တော့ သပိတ်ကျင်းမြို့နယ်ဟာလည်းစစ်ကိုင်းငလျင်ဒဏ်ခံခဲ့ရတဲ့​ဒေသဖြစ်ပါတယ်။ဒါအပြင်စစ်တပ်က ​မြေငလျင်အ​ရေး​ပေါ်ကယ်ဆယ်​ရေးနဲ့ ပြန်လည်ထူ​​ထောင်​ရေး​တွေလုပ်ဖို့ ယာယီအပစ်ရပ်ထားတယ်လို့​​​​ကြေညာထားတဲ့ရက်မှာပဲဗုံးကြဲတာဖြစ်ပါတယ် ။ပိုဆိုးတာက မြန်မာနှစ်ဆန်း၁ ရက်​​နေ့ကပဲ အာဏာသိမ်း​ခေါင်း​ဆောင်ကပြည်သူ​တွေ ​ဘေးဘယာကင်း​ဝေးကြပါ​စေ ​ပြောပြီး၂ ရက်အကြာမှာ က​လေးငယ်​တွေပါမချန် ပြည်သူ​တွေအစုလိုက်အပြုံလိုက်​သေ​အောင် ​ပေါင် ၅၀၀ ဗုံး နှစ်လုံးကြဲသတ်ဖြတ်ခဲ့တာဖြစ်ပါတယ်။

အခု​တော့​ရေထွက်ရွာဟာ က​လေးငယ်​တွေ ရုတ်တရက်​ပျောက်ကုန်လို့ ​ဖြေဆည်းမရဖြစ်ပြီးပူ​ဆွေးစွာငို​ကြွေ​နေတဲ့မိဘ​တွေ၊ သားငယ်​၊သမီးငယ်လေး​​သေဆုံး သွားလို့ နေရာမှာတင်တက်သွားတဲ့အမျိုးသမီးတွေ၊ ဝမ်းနည်းပူ​လောင် ‌‌‌‌‌‌‌‌‌‌‌‌‌‌‌‌‌‌လွန်းလို့အသံ​တောင်မထွက်​နိုင်​တော့ပဲ ​ကြောင်တက်တက်ဖြစ်သွားသူ​တွေ၊ကြောက်လန့်တအား ‌‌‌‌‌‌‌‌‌‌‌‌‌‌‌ငိုနေတဲ့အသံတွေဟာ မီးခိုးတလူလူနဲ့ ပတ်ဝန်းကျင်ကို ပဲ့တင်နေပါတယ်။

“ဖြစ်ပြီးမိနစ်၂၀လောက်အကြာမှာကျွန်တော်ရောက်သွားတယ်။မီးသတ်ကားတွေမီးငြိမ်း နေကြတယ်။အကုန်မီးလောင်နေတယ်”လို့သပိတ်ကျင်းမြို့နယ်ပကဖတာဝန်ခံ ကိုနဂါးနီကပြောပါတယ်။

ကိုနဂါးနီအဲဒီကို ရောက်တဲ့အချိန်မှာမိုးလည်းရွာ နေပါတယ်။ဒဏ်ရာရထားတဲ့ အမျိုးသမီးကိုဆေးရုံပို့ဖို့ခေါ်သွားတဲ့ကားဟာ ဒီအမျိုးသမီးလမ်းမှာတင်ဆုံးပါး သွားပါတယ် ။ဒါ​ကြောင့် ကားကိုပြန်‌‌ခေါ်လာတဲ့ဘေးမှာငိုကြွေး​နေတဲ့သူ့အမျိုးသားကိုလည်းကား​ဘေးမှာ ကိုနဂါးနီစတွေ့ ရပါတယ်။

အဲဒီနောက် ကလေးငယ်နှစ်‌ယောက် ပျောက်​နေလို့ မိုးရွာထဲမှာ အပူတပြင်းလိုက်ရှာနေတဲ့ အမျိုးသမီးကိုလည်း တွေ့မိတယ်။မေးမြန်းကြည့်ပြီး မီးစွဲနေတဲ့ သွပ်တွေအောက် လှန်လှောပြီး ရဲဘော်တွေ လိုက်လံရှာဖွေပေးခဲ့ပါတယ်။

ဒါပေမယ့် လက်ကလေးပဲကျန်တဲ့၂နှစ်ကျော်အရွယ်ကလေးငယ်တဦး၊ ခေါင်းမပါခြေမပါဘဲ ခန္ဓာကိုယ်တပိုင်းသာကျန်တဲ့ ကလေးငယ်တဦးရဲ့မီးစွဲထားတဲ့ အပိုင်းအစကို သာ ရရှိခဲ့ပါတယ်။

“တော်တော်ကို ဆိုးရွားတယ်။ခြေပျက်၊လက်ပျက် ခါးပျက်အပိုင်းပိုင်းပျက်ထွက်နေတာတွေကောက်ပြီး မိုးကာနဲ့ အုပ်ထားတယ်” လို့ ကိုနဂါးနီကဖွင့်ပါတယ်။

သိပ်မကြာခင်မှာပဲ ဒဏ်ရာရလူနာကိုသွားပို့တဲ့ လူနာတင်ကားဟာကွမ်းယာဆိုင်ကဆယ်ကျော်သက်အရွယ်မိန်းက လေးရဲ့ ရုပ်အလောင်းကိုတင်ပြီး​တော့ ပြန် ရောက်လာပြန်ပါတယ်။

“ကတုတ်ကျင်းထဲဝင်နိုင်တဲ့သူတွေလောက်ပဲလွတ်တာ”လို့ ကိုနဂါးနီကပြောပါတယ်။

အဲဒီနေ့က မီးငြိမ်းသတ်ပြီးချိန်မှာနေအိမ်​ပေါင်း ၂၄လုံး မီး လောက်ပြာကျခဲ့ပါတယ်။က​လေး​လေး​တွေအပါအဝင် ပြည်သူ ၃၂ ဦး​သေဆုံးခဲ့ပါတယ်။

အပြင်းအထန်ဒဏ်ရာရသူတွေအပါအဝင် ပြည်သူ ၄၀ကျော်အထိ ထိခိုက်ဒဏ်ရာတွေရခဲ့ပါတယ်။

“မင်းအောင်လှိုင်ကိုလည်းကျွန် တော်မေးခွန်းထုတ်ချင်တယ်။အရပ်သားပြည်သူတွေကိုပဲ အခုကသူကတိုက်ခိုက် နေသလို ကျွန် တော်တို့ခံစားရတယ်။ဇရှိရင် ကျွန် တော်တို့ကိုလာကြဲလိုက်။ကျွန်တော်တို့ သေသွားလည်း ဘာမှမဖြစ်ဘူး။ကျွန်တော်တို့ကိုယ်တိုင် ဒီတော်လှန်ရေး ရည်ရွယ်ချက်က အသက်ပေးပြီး ဝင်ခဲ့ကြတာပဲ။ပြိုင်ဘက်အချင်းချင်းပဲကောင်းပါတယ်။ပြည်သူတွေကို အဲဒီလောက် မလုပ်သင့်ဘူးလို့”လို့ ကိုနဂါးနီက ပြောပါတယ်။

စစ်ကောင်စီတပ်ကတော့ မတ်လနောက်ဆုံးပတ်က နေစပြီးမန္တလေးတိုင်းအတွင်းကစစ်ကောင်စီမထိန်းချုပ်နိုင်တဲ့ မြို့နယ်တွေထဲကနေရာ​တွေကို အညှိုးတကြီး ဗုံးကြဲသတ်ဖြတ်နေတာဖြစ်ပါတယ် ။ မန္တလေးတိုင်းမှာဆို တပတ်အတွင်းပြည်သူ ၅၀ကျော်အထိ သေဆုံးခဲ့ပါတယ်။

ဒီလေကြောင်းတိုက်ခိုက်မှုကို မိတ္ထီလာရှမ်းတဲလေတပ်က အများဆုံးပြုလုပ် နေပြီး တံတားဦး ​လေတပ်မှာတိုက်ခိုက် ရေးလေယာဉ်တဝက် ကျော်ပြုပြင် နေရတာမို့ ၃နာရီခြားတခါ လေယာဉ်၂စီးနဲ့ ဗုံးကြဲတိုက်ခိုက် ‌​နေတာလို့သိရပါတယ်။

စစ်တပ်က ပြည်သူ​တွေကိုရည်ရွယ်ချက်ရှိရှိ ဗုံးကြဲ​နေတဲ့အ​ပေါ် PDF တစ်ဦးကလည်း “အခုဟာက သူတို့(စစ်​ကောင်စီ) က ပြည်သူ​တွေနဲ့ ကျွန်​တော်တို့ကြားမှာရန်တိုက်​ပေး​တာ ။မင်းတို့ PDF ​တွေထိန်းချုပ်ထားလို့ ငါတို့ကပစ်တယ် ဆိုပြီး​တော့ကျွန်​တော်တို့ PDF နဲ့ပြည်သူကိုရန်တိုက်​ပေးတဲ့သ​​ဘောဗျ”လို့​ပြောပါတယ်။

အဆိုပါ PDF ကပဲ “ကျွန်​တော်ကအဲလိုမဖြစ်​စေချင်ဘူး ။တကယ့်တရားခံကိုပြည်သူကသိရမယ် ။အဲဒီတရားခံကိုပဲ နာကျည်းရမယ်၊မုန်းတီးရမယ် ၊​တော်လှန်လိုစိတ်​တွေ​မွေးဖွားရမယ်။အဲဒါမျိုးပဲဖြစ်​စေချင်တယ်ကျွန်​တော်က”လို့သူရဲ့အမြင်ကိုဖွင့်ဟပါတယ်။

​ရေထွက်ရွာက ကိုသန်းမြိုင်ကလည်း အခုဖြစ်ရပ်ကြီးအတွက်သူရင်ထဲမှာ ​မေးခွန်းတစ်ခု​မေးချင်စိတ်ပြင်းပြ​နေပါတယ် ။

“အပြစ်မရှိတဲ့ က​လေး​လေး​တွေ က​လေး​ပေါက်စ​လေး​တွေကိုပဲ စကစ ကလုပ်​နေတာလား။ကျွန်​တော့​ရှေ့တင် အကုန်လုံး”လို့သူက​မေးခွန်းထုတ်လိုက်ပါတယ် ။ ။