ဟာနာဆန်/People’s Spring
မကွေးတိုင်း၊ ရေစကြိုမြို့ပေါ်တွင် သန်းခေါင်စာရင်းကောက်နေသည့် စစ်ကောင်စီအုပ်စုအား ပစ်ခတ်တိုက်ခိုက်ရာ တစ်ဦးသေဆုံးကြောင်း ရေစကြိုမြို့နယ်ပြည်သူ့ကာကွယ်ရေးအဖွဲ့(ပကဖ)က ပြောသည်။
နိုဝင်ဘာ ၁၀ ရက် နံနက် ၁၁နာရီခန့်က ရေစကြိုမြို့၊ အမှတ်(၇)၊ ၅၀၀ ပြည့်ရပ်ကွက်တွင် သန်းခေါင်စာရင်းကောက်ရန် ရောက်ရှိနေသော အင်အား၅၀ခန့်ပါ စစ်ကောင်စီတပ်သားများနှင့် စစ်ကောင်စီဝန်ထမ်းများအား အနီးကပ်တိုက်ခိုက်ရာ ၁၅မိနှစ်ခန့် အပြန်အလှန်ပစ်ခတ်မှုဖြစ်ပွားခဲ့ကြောင်း ရေစကြိုပကဖ ပြန်ကြားရေးတာဝန်ခံက ပြောသည်။
ပစ်ခတ်မှုအတွင်း စစ်ကောင်စီဝင် တစ်ဦးသေဆုံးပြီး ၅ဦး ထိမှန်ဒဏ်ရာရရှိကြောင်း ရေစကြိုပကဖက ပြောသည်။
Public Service Announcement
“သူတို့နဲ့ သိပ်မဝေးဘူး။ ပေသုံးရာအကွာလောက်ပဲ။ တစ်ဦးဗိုက်ပွင့်သေတာက မျက်မြင် ပါ”ဟု ရေစကြိုပကဖ ပြန်ကြားရေးတာဝန်ခံက ပြောသည်။
သို့သော် စစ်ကောင်စီအုပ်စု၏ ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
စက်တင်ဘာ ၉ရက်ကလည်း ရေစကြိုမြို့မရဲစခန်းမှ မိုင်းရှင်းရန်ထွက်လာသော စစ်ကောင်စီတပ်သားများအား ရေစကြိုပကဖက အနီးကပ် တိုက်ခိုက်ခဲ့ရာ ထိခိုက်မှုများ ရှိခဲ့သည်။
ရေစကြိုမြို့ပေါ်ရှိ စစ်ကောင်စီတပ်သည် ပြည်သူများအား ဖမ်းဆီးခြင်း၊ လက်နက်ကြီးဖြင့်ရမ်းသမ်းပစ်ခတ်ခြင်းများပြုလုပ်နေပြီး ဒေသခံပြည်သူများထိခိုက်သေဆုံးမှုများလည်း ရှိနေသည်။
