နှစ်နိုင်ငံ စစ်ရေး ပဋိပက္ခကြောင့် အိန္ဒိယရော၊ ပါကစ္စတန်ဖက်မှာပါ ထိခိုက်သေဆုံးမှုတွေက မြင့်တက်လာကြောင်း သိရပါတယ်။
နှစ်နိုင်ငံကြား ပိုင်ဆိုင်မှု အငြင်းပွားနေရာ ကက်ရှ်မီးယား ဒေသရဲ့ အိန္ဒိယ ထိန်းချုပ်ထားရာ အပိုင်းမှာ ပြီးခဲ့တဲ့လက ဖြစ်ပွားတဲ့ အကြမ်းဖက် ပစ်ခတ်မှု တစ်ခုအတွင်း ခရီးသွားဧည့်သည် ၂၆ ဦး သေဆုံးခဲ့တဲ့ ဖြစ်စဉ်ကို လက်တုံ့ပြန်တဲ့ အနေနဲ့ မေလ ၇ ရက် မနက်ပိုင်းမှာ အိန္ဒိယဟာ နယ်စပ်ဖြတ်ကျော်ပြီး ပါကစ္စတန် ပိုင်နက်ထဲကို လေကြောင်း တိုက်ခိုက်မှုတွေ လုပ်ဆောင်ခဲ့ပါတယ်။
ဧပြီ ၂၂ ရက်နေ့က ပစ်ခတ်မှု နောက်ကွယ်မှာ ပါကစ္စတန် အစိုးရ ပါဝင်ပတ်သက်နေကြောင်း အိန္ဒိယက စွပ်စွဲထားပြီး ပါကစ္စတန်ကတော့ အစဉ်တစိုက် ငြင်းဆိုထားခဲ့ပါတယ်။
မေလ ၇ ရက် မနက်ပိုင်းမှာ အိန္ဒိယဟာ ကက်ရှ်မီးယားရဲ့ ပါကစ္စတန် ထိန်းချုပ်ထားရာ အစိတ်အပိုင်းတွေအပြင် ပါကစ္စတန် ပိုင်နက်ထဲကိုပါ ဒုံးကျည်တွေနဲ့ ပစ်ခတ်ခဲ့တာ ဖြစ်ပါတယ်။ ဆင်ဒူးစစ်ဆင်ရေးလို့ နာမည်ပေးထားတဲ့ အဲဒီ တိုက်ခိုက်မှုဟာ ပါကစ္စတန် အခြေစိုက် အကြမ်းဖက် အဖွဲ့အစည်းတွေရဲ့ စခန်းတွေကို ချေမှုန်းခဲ့တာလို့ အိန္ဒိယ စစ်တပ်က ကြေညာပါတယ်။
Public Service Announcement
ပါကစ္စတန်ကတော့ အိန္ဒိယရဲ့ လုပ်ရပ်ဟာ စစ်ကြေညာမှုမြောက်တယ်လို့ စွပ်စွဲပြီး လက်တုံ့ပြန်မယ်လို့ ကြုံးဝါးထားပါတယ်။ ပြီးတော့ အစ္စရေး တိုက်လေယာဉ် ၅ စီးကို ပစ်ချနိုင်ခဲ့တယ်လို့ ပါကစ္စတန် စစ်တပ်က ကြေညာထားပြီး အိန္ဒိယကတော့ အဲဒီကိစ္စကို အတည်မပြုပါဘူး။
အစောပိုင်းမှာ အိန္ဒိယရဲ့ တိုက်ခိုက်မှုကြောင့် လူ ၈ ဦး သေဆုံးခဲ့တယ်လို့ ပါကစ္စတန်က ကြေညာထားပေမယ့် ညနေပိုင်းမှာတော့ အသေအပျောက် ဦးရေကို ၃၁ ယောက်လို့ ပြောင်းလဲ ထုတ်ပြန်ခဲ့ပါတယ်။ သေဆုံးစာရင်းမှာ အမျိုးသမီးတွေနဲ့ ကလေးတစ်ဦး ပါဝင်ခဲ့တယ်လို့လည်း ပါကစ္စတန်က ဆိုပါတယ်။ ပြီးတော့ အိန္ဒိယ စွပ်စွဲသလိုမျိုး တိုက်ခိုက်ခံရတဲ့ နေရာတွေဟာ စစ်ဘက်ဆိုင်ရာ ပစ်မှတ်တွေ မဟုတ်ဘူးလို့လည်း ပါကစ္စတန်က ပြောကြားထားပါတယ်။
အိန္ဒိယကလည်း ပါကစ္စတန်ရဲ့ လက်နက်ကြီး တုံ့ပြန် ပစ်ခတ်မှုတွေကြောင့် အိန္ဒိယ ထိန်းချုပ်ထားရာ ကက်ရှ်မီးယား ဒေသထဲမှာ အရပ်သား ၇ ဦး သေဆုံးခဲ့တယ်လို့ အတည်ပြုသွားပါတယ်။ အစောပိုင်းက အိန္ဒိယဟာ အသေအပျောက် စာရင်းကို ၃ ဦးလို့ပဲ ကြေညာထားခဲ့တာ ဖြစ်ပါတယ်။
မနက်ပိုင်းမှာ ဖြစ်ပွားခဲ့တဲ့ တိုက်ခိုက်မှုတွေ အပြီးမှာတော့ နှစ်ဖက်ကြားမှာ အခြေအနေက ပြန်လည် ငြိမ်သက်နေပြီး နောက်ဆက်တွဲ ဘယ်လို အပြောင်းအလဲတွေ ရှိလာမလဲ ဆိုတာကို နိုင်ငံတကာ အသိုက်အဝန်းက စိုးရိမ်တကြီး စောင့်ကြည့်နေပါတယ်။
ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်ရဲ့ ပြောရေးဆိုခွင့်ရ အရာရှိ စတီဖန် ဒူဂျာရစ်ကတော့ အလုံးစုံ စစ်ပွဲကြီး အဆင့်ထိ ရောက်ရှိမသွားအောင် အိန္ဒိယရော၊ ပါကစ္စတန်ပါ အစွမ်းကုန် ထိန်းထိန်းသိမ်းသိမ်း လုပ်ဆောင်ကြဖို့ ဂူတာရက်စ်က တိုက်တွန်း တောင်းဆိုထားကြောင်း မေလ ၇ ရက်နေ့မှာ ကြေညာခဲ့ပါတယ်။
ကိုးကား: Euro News
