မတ်-၁၀၊ ၂၀၂၆။ထားမြတ်/People’s Spring
တနင်္သာရီမြို့နယ်က တကူကျေးရွာကို အာဏာသိမ်းစစ်တပ်က လေကြောင်းကနေ ဗုံးကြဲတိုက်ခိုက်ခဲ့လို့ ကလေးငယ်အပါအဝင် ၄ဦး သေဆုံးပြီး ၁၂ဦး ဒဏ်ရာရရှိခဲ့ကြောင်း ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က သတင်းထုတ်ပြန်ပါတယ်။
ကရင်အမျိုးသားအစည်းအရုံး(KNU) အုပ်ချုပ်နယ်မြေ သတ်မှတ်ချက်အရ မြိတ်ထားဝယ်ခရိုင် လယ်မူလားမြို့နယ် တကူရွာကို စစ်ကောင်စီက မတ်လ ၁၀ရက် နေ့လည် ၁၂နာရီကျော်မှာ တိုက်လေယာဉ်နဲ့ ပေါင် ၂၅၀ ဗုံးကြဲချတိုက်ခိုက်ခဲ့တာလို့ ဆိုပါတယ်။
စစ်တပ်ဟာ မနေ့က မတ်လ ၉ရက်မှာလည်း တနင်္သာရီမြို့နယ်က တဖီလေးခိုကျေးရွာကို လေကြောင်းကနေ ဗုံးကြဲခဲ့လို့ ကလေးငယ် ၃ဦး အပါအဝင် ၆ဦး သေဆုံးကာ ကလေးငယ် ၃ဦး ဒဏ်ရာရခဲ့ပါတယ်။
Public Service Announcement
တိုက်ပွဲဖြစ်ပွားမှုမရှိဘဲ KNUထိန်းချုပ်နယ်မြေက ရွာကို စစ်တပ်လေကြောင်းဗုံးကြဲတိုက်ခိုက်နေတာလို့ KNLA သတင်းရင်းမြစ်က ပြောပါတယ်။
စစ်တပ်ဟာ အုပ်ချုပ်ရေးယန္တရားလစ်ဟာတဲ့နေရာတွေက ပြည်သူတွေကို ပစ်မှတ်ထား တိုက်ခိုက်နေခြင်းဖြစ်တယ်လို့ သတင်းရင်းမြစ်က ပြောပါတယ်။
စစ်တပ်ဟာ KNU တပ်မဟာ အသီးသီးနယ်မြေတွေကို လေကြောင်းဗုံးကြဲတိုက်ခိုက်တာတွေ စစ်ကြောင်းထိုးတာ ပြည်သူတွေကို ဖမ်းဆီးသတ်ဖြတ်တာတွေ ဆက်တိုက်ကျူးလွန်လျက်ရှိပါတယ်။
