မတ်-၁၀၊ ၂၀၂၆။မေရီ/People’s Spring
စစ်ကိုင်းတိုင်း၊ မုံရွာမြို့ ကမ်းနားလမ်းမှာ စက်သုံးဆီဆိုင်ရှေ့မှာ နေရာဦးရောင်းစားနေတဲ့အဖွဲ့က ဓားတွေပါ ယူဆောင်လာလို့ ဆီတန်းစီတဲ့ ပြည်သူများအကြား စိုးရိမ်မှုတွေ မြင့်တက်နေပါတယ်။
မုံရွာမြို့ ကမ်းနားလမ်းရှိ အရင်က DENKO ဆီဆိုင်ကနေ အမည်ပြောင်းထားတဲ့ စက်သုံးဆီဆိုင်ရှေ့မှာ ညဘက်ကတည်းက ကြိုးတားကာ နေရာဦးထားပြီး နောက်တနေ့မနက်မှာ ဆိုင် ကယ်တစ်စီးကို ၁,၀၀၀ ကျပ်ကနေ ၂,၀၀၀ ကျပ်အထိ နေရာခယူကာ ပြန်လည်ရောင်းစားနေခြင်းဖြစ်ကြောင်း မြို့ခံအချို့က ပြောပါတယ်။
အဲဒီလို နေရာရောင်းစားမှုတွေကြောင့် မနက်အစောပိုင်းမှာ လာရောက်တန်းစီတဲ့ ပြည်သူတွေဟာ နေရာရောင်းစားသူတွေနဲ့ မကြာခဏ စကားများ အငြင်းပွားမှုတွေ ဖြစ်ပွားနေတယ်လို့ ဒေသခံတွေက ဆိုပါတယ်။
Public Service Announcement
“ ဆိုင်ရှေ့မှာတင် ကြိုးတားပြီး ညအိပ်စောင့်။ မနက်ကျ ဆိုင်ကယ်တစ်စီးကို တစ်ထောင်နှစ်ထောင် နေရာတွေရောင်းစားနေတာ။ ဆိုင်ကယ်တစ်စီးရပ်ထားပြီး ဆိုင်ကယ်အစီး၂၀ စာနေရာရောင်းစားကြတယ်။ နေ့တိုင်းလိုလိုဖြစ်နေတယ်” လို့ ဒေသခံ အမျိုးသားတစ်ဦးက ပြောပါတယ်။
မနေ့က မနက်ပိုင်းမှာတော့ နေရာရောင်းစားသူတွေဟာ ဓါးတွေပါယူဆောင်လာတဲ့အထိ ဆိုးရွားလာတာကြောင့် လုံခြုံရေးစိုးရိမ်နေရတယ်လို့ ဒေသခံတွေက ပြောပါတယ်။
မတ်လ ၇ ရက်ကစတင်ခဲ့တဲ့ စစ်ကောင်စီရဲ့စက်သုံးဆီ ချွေတာရေး ဝယ်ယူခွင့်ကန့်သတ်ချက်ဖြစ်တဲ့ စုံ/မစနစ်ကြောင့် ပြည်သူတွေကြား အခက်အခဲတွေ ဖြစ်ပေါ်နေပြီး စက်သုံးဆီဝယ်ယူရခက်ခဲနေပါတယ်။
ဒါ့အပြင် စက်သုံးဆီ ပြင်ပပေါက်စျေးလည်း မြင့်တက်နေပြီး တစ်လီတာ ကျပ်ရှစ်ထောင်ကနေ တစ်သောင်းဝန်းကျင်အထိ စျေးပေါက်နေတဲ့အပြင် ဝယ်ယူရခက်ခဲနေကြောင်း ဒေသခံတွေက ပြောပါတယ်။
