အကြီးစား ဒုံးကျည်တွေနဲ့ တိုက်ခိုက်လာမှုကို မျှော်လင့်ထားဖို့ အီရန်က အမေရိကန်ကို ခြိမ်းခြောက် သတိပေးလိုက်ပါတယ်။
အစ္စရေးနဲ့ အမေရိကန်တို့ရဲ့ ပြင်းထန်တဲ့ တိုက်ခိုက်မှုတွေကြောင့် အီရန်ရဲ့ ခဲယမ်းမီးကျောက်တွေ လျော့နည်းလာသလို အီရန် ဒုံးကျည် စီမံကိန်းလည်း ပျက်စီးသွားပြီဖြစ်ကြောင်း အမေရိကန် အစိုးရရဲ့ မှတ်ချက်ကို အီရန်ရဲ့ အင်အားအကြီးဆုံး လက်နက်ကိုင် တပ်ဖြစ်တဲ့ အစ္စလာမ်မစ် တော်လှန်ရေး အစောင့်တပ် (IRGC)က ပယ်ချခဲ့ပါတယ်။
အဲဒီအစား အီရန်ဟာ ပိုမိုများပြားတဲ့ ဒုံးကျည်တွေကို ဖြန့်ကျက် အသုံးပြုတော့မှာဖြစ်ပြီး အဲဒီထဲမှာ ထိပ်ဖူး အလေးချိန် ၁ တန်အထက် ဒုံးကျည်တွေ ပါဝင်လာမယ်လို့ IRGCက ဆိုပါတယ်။
IRGCရဲ့ လေကြောင်းတပ်ဖွဲ့ အကြီးအကဲ မာဂျစ် မူဆာဗီက နောက်ထပ် အီရန်က ပစ်ခတ်မယ့် ဒုံးကျည်တွေဟာ ၁ တန်ထက် ပိုပြီးပေါ့ပါးတဲ့ ထိပ်ဖူးမျိုးကို တင်ဆောင်လာတော့မှာ မဟုတ်ဘူးလို့ ပြည်တွင်းမီဒီယာတွေကို မတ်လ ၉ ရက်နေ့မှာ ပြောကြားခဲ့ပါတယ်။
Public Service Announcement
ဒါ့အပြင် အစ္စရေးနဲ့ အီရန်တို့ရဲ့ စစ်ရေးပစ်မှတ်တွေကို ဦးတည်မယ့် အီရန်ရဲ့ ဒုံးကျည်တိုက်ခိုက်မှုတွေဟာ လာမယ့်ရက်ပိုင်းတွေမှာ ပိုမို ပြင်းထန်လာလိမ့်မယ်လို့ သူက ဆိုပါတယ်။
အီရန်ဟာ ဗုံးပဒေသာလို့ ခေါ်ဝေါ်တဲ့ ဆင့်ပွားပေါက်ကွဲတတ်တဲ့ လက်နက်တွေကို စစ်ပွဲမှာ စတင်အသုံးပြုနေကြောင်း စွပ်စွဲခံထားရပြီး မူဆာဗီ ရည်ညွှန်းတဲ့ ပိုကြီးတဲ့ ဒုံးကျည်တွေ ဆိုတာကရော အဲဒီလို လက်နက် အမျိုးအစားတွေ ပါဝင်မလား ဆိုတာကို မသိရသေးပါဘူး။
အမေရိကန် သမ္မတ ဒေါ်နယ်လ်ထရမ့်ကတော့ အီရန်ရဲ့ ရေတပ်၊ လေတပ်နဲ့ ဒုံးကျည်တိုက်ခိုက်နိုင်စွမ်းတွေဟာ လုံးဝနီးပါး ပျက်သုဉ်းနေပြီဖြစ်ကြောင်း ပြောကြားထားပါတယ်။ အီရန်သာ နိုင်ငံတကာ ရေနံသယ်ယူပို့ဆောင်ရေး အချက်အခြာ ရေလမ်းကြောင်းဖြစ်တဲ့ ဟောမုဇ် ရေလက်ကြားကို ခေါင်းမာမာနဲ့ ပိတ်ထားဦးမယ် ဆိုရင်တော့ လက်ရှိ အမေရိကန် ဆင်နွှဲနေတဲ့ စစ်ဆင်ရေးတွေထက် အဆ ၂၀ လောက် ပိုပြင်းထန်တဲ့ အခြေအနေကို မျှော်လင့်ထားသင့်ကြောင်းလည်း မတ်လ ၉ ရက်နေ့မှာ ထရမ့်က သတိပေးသွားခဲ့ပါတယ်။
ကိုးကား: Al Jazeera
ဓာတ်ပုံ – AP
