ကျောင်းသားတွေရဲ့အုပ်စုဖွဲ့ရန်ပွဲဟန့်တားခဲ့တဲ့ ဆရာတော်ကို ၇ တန်း‌ကျောင်းသား၂ဦးကသတ်ဖြတ်ခဲ့တာလို့​ဒေသခံ​တွေ​​ပြော

ဇန်နဝါရီ-၃၀၊၂၀၂၆။ဇော်ရမ်း/People’s Spring

စစ်ကောင်စီပြန်ထိန်းချုပ်ထားတဲ့ ရှမ်းပြည်နယ်မြောက်ပိုင်း၊ လားရှိုးမြို့မှာဆရာတော်တစ်ပါးသတ်ဖြတ်ခံရမှုဟာ သတ္တမတန်းကျောင်းသား၂ဦးကျုးလွန်တာလို့ ဒေသခံတွေကပြောပါတယ်။

လားရှိုးမြို့၊ရပ်ကွက် (၄)ကမဟာဗောဓရုံ ကျောင်းတိုက်မှာ သတင်းသုံးနေတဲ့ ဆရာတော်တစ်ပါးဟာ ဇန်နဝါရီလ ၂၈ရက်နေ့က သတ်ဖြတ်ခံရတာဖြစ်ပါတယ်။

” သတင်းကြားကြားချင်း မယုံနိုင်ဘူး။ သတ်သွားတာက ကျောင်းသားတွေ။ ၇တန်းကျောင်းသား၂ယောက်တဲ့။ ဖမ်းတော့မှ သိရတာ။ တကယ့်ကို စည်းမဲ့ကမ်းမဲ့တွေဖြစ်နေတာ” လို့ ရပ်ကွက်(၄)မှာနေသူတစ်ဦးကပြောပါတယ်။

Public Service Announcement

ဇန်နဝါရီလ ၂၇ ရက်က မဟာဗောဓရုံကျောင်းတိုက်အနီးမှာ လားရ်ှိုးမြို့ အထက(၆)က ကျောင်းသားတချို့ ရန်ပွဲဖြစ်ခဲ့ကြပါတယ်။ ဆရာတော်က ဟန့်တားခဲ့ပြီးလေးခွဖြင့် ပစ်ခတ်ခြောက်လှန့်ခဲ့တာကို မကျေနပ်တဲ့ကျောင်းသား ၂ယောက်က နောက်တစ်နေ့မှာ လာပြီးသတ်ဖြတ်တာလို့ ဒေသခံတစ်ဦးကပြောပါတယ်။

“ ကြားရတာကဆရာတော်ကို တော်တော်မကျေနပ်လို့လာသတ်တာပေါ့။ဆွမ်းကပ်မယ်လို့ပြောပြီးပန်းစည်းခြားထဲ ဓားထည့်လာတာ။ဆရာတော်ကိုသတ်ပြီး ပြန်သွားပေမယ့် သူတို့ဖုန်းက ကျကျန်နေခဲ့တယ်။ အဲ့ဒီလိုနဲ့ တရားခံမိတာ” လို့ အထက်ပါ​ဒေသခံကပြောပါတယ်။

အဲဒီကျောင်းသားနှစ်ဦးကို အခင်းဖြစ်ရာနေရာမှာ ကျကျန်ခဲ့တဲ့ ဖုန်းကနေတဆင့်‌ခြေရာခံပြီး စစ်ကောင်စီတပ်ဖွဲ့ဝင်တွေကဇန်နဝါရီလ၂၉ရက်နေ့ညနေပိုင်းမှာ ဖမ်းဆီးသွားတယ်လို့ မြို့ခံတစ်ဦးကပြောပါတယ်။ဒါ​ပေမယ့်အသေးစိတ်အခြေအနေကိုတော့ သီးခြားအတည်ပြုနိုင်သေးပါဘူး။

ဆရာတော်က သက်တော် ၆၀ ခန့်ရှိပြီးဒေသခံတွေက ကြည်ညိုကြပါတယ်။ အသတ်ခံရတဲ့ဖြစ်စဉ်အပေါ် ဒေသခံတွေက ထိန့်လန့်နေကြပါတယ်။

အ​ရှေ့​မြောက်တိုင်းစစ်ဌာနချုပ်(ရမခ)ရှိတဲ့လားရှိုးမြို့ဟာ ၁၀၂၇ စစ်ဆင်ရေးနဲ့အတူ ကိုးကန့်တပ်(MNDAA)နဲ့ မဟာမိတ်တပ်​တွေက ၂၀၂၄ သြဂုတ်လဆန်းမှာသိမ်းပိုက်ထိန်းချုပ်ခဲ့ပါတယ်။ဒါ​ပေမယ့် တရုတ်အစိုးရက MNDAA ကို စစ်​ကောင်စီဆီပြန်လွှဲ​ပေးဖိူ့ ဖိအား​ပေးတာ​ကြောင့် ၂၀၂၅ ဧပြီလမှာစစ်ကောင်စီကို ပြန်လွှဲ​ပေးခဲ့ရပါတယ်။ လားရှိုးမြို့ထဲ စစ်တပ်ပြန်ဝင်လာပြီး​နောက် လုယက်မှုတွေ၊ ဓားပြမှုတွေ၊ ပြန်ပေးဆွဲမှု​တွေ၊ခိုးမှုတွေ မကြာခဏဖြစ်ပွား​နေပြီး ရာဇဝတ်မှု​တွေထူ​ပြောနေပါတယ်။

ဒါ့အပြင် စစ်ကောင်စီထိန်းချုပ်မြို့တွေက စာသင်ကျောင်းတစ်ချို့မှာဒီနှစ်ပိုင်းအတွင်း ကျောင်းသားတွေအုပ်စုဖွဲ့ရန်ဖြစ်တာတွေ မကြာခဏဖြစ်နေပါတယ်။ ဇန်နဝါရီ ၂၇ရက်နေ့က ရွှေပြည်သာမြို့နယ် အထက (၁) ကျောင်းအတွင်း ကျောင်းသားချင်းရန်ဖြစ်ပြီး Grade-7 ကျောင်းသားတစ်ဦး သေဆုံးခဲ့ပါတယ်။နယ်မြို့အချို့မှာလည်းကျောင်းသားတွေ ချိန်းပြီး အုပ်စုဖွဲ့ ထိုးကြိတ်တာတွေ ဖြစ်နေပါတယ်။

မန္တလေးမြို့က ကျောင်းသားမိဖတစ်ဦးက” ကျောင်းထားပေမယ့် အပြင်မှာထက် စိတ်ပူနေရပြီ။ စာသင် ကျောင်းတွေထဲမှာ လူသတ်ပွဲဖြစ်နေတာကို ဘယ်လိုစိတ်ဖြောင့်မလဲ။ တကယ့်ပဲ ပရမ်းပတာဖြစ်နေတာပါ။ ကျောင်းနှုတ်(ထုတ်) ရမလားတောင် စဉ်းစားနေရပြီ” လို့ ပြောပါတယ်။