စက်တင်ဘာ-၁၅၊၂၀၂၅။ရောင်နီ/People’s Spring
ရန်ကုန်မြို့၊ သန်လျင်မြို့၌ ယခု စက်တင်ဘာအတွင်း ပေါ်တာဆွဲ ဖမ်းဆီးမှုများပြားနေပြီး စစ်တပ် တပ်ကြပ်ကြီးတဦး ဦးဆောင်နေကြောင်း သန်လျင်မြို့နယ်သတင်းများဖော်ပြနေသည့် Thanlyin Media မှတာဝန်ရှိသူက လူထုနွေဦးသို့ပြောသည်။
“ သန်လျင်မှာက စစ်တပ်ရဲ့လက်ကိုင်တုတ် ပျူစောထီးအဖွဲတွေရှိတယ်။ စစ်တပ်က တပ်ကြပ်ကြီးအဆင့် အောင်ဇော်ဝင်း(ခ)ဂန်ကြီးဆိုတဲ့ ထောင်ကထွက်ပြီး စစ်တပ်ထဲဝင်လာတဲ့ ကောင်က သန်လျင်က လူမိုက်တွေ ပျူစောထီးတွေကို ထိန်းချုပ်ထားပြီးတော့ ပေါ်တာဆွဲတာတွေ ၊အကြွေးတောင်းတာတွေလုပ်လာတယ်” ဟု ၎င်းက ပြောသည်။
အဆိုပါတပ်ကြပ်ကြီးသည် သန်လျင်တံတားအဆင်းရှိ စစ်ကောင်စီဂိတ်တွင် တာဝန်ကျနေခြင်းဖြစ်ပြီး ပျူစောထီးများအား ပုံစံအမျိုးမျိုးဖြင့် အသွင်ယူစေကာ ပေါ်တာဆွဲနေခြင်းဖြစ်သည်ဟု ဆိုသည်။
Public Service Announcement
“ ဒီကောင်က အခုတော်တော်ဆိုးနေတာ၊ရိုင်းတာလည်းတော်တော်ရိုင်းတယ်။ထစ်ခနဲ့ဆို ရိုက်တာနှက်တာ ပြည်သူ့ကို ဒီကောင်ကမတရားလုပ်နေတာ။ ဒီရက်ပိုင်း အဖမ်းအဆီးတွေကိုလည်း ဒီကောင်ဦးဆောင်ပြီးလုပ်နေတာ။” ဟု အထက်ပါတာဝန်ရှိသူက ပြောသည်။
ထို့အပြင် ထူးခြားဖြစ်စဉ်ဖြစ်ချိန် သန်လျင်တံတားကိုပိတ်၍စစ်ဆေးပါက အမျိုးသမီးများကို ရိုင်းရိုင်းဆိုင်းဆိုင်း ပြောဆိုလေ့ရှိကြောင်း ဒေသခံများက သတင်းပေးပို့သည်ဟု ၎င်းကဆိုသည်။
သန်လျင်မြို့၌ ယခင်ကကျေးရွာများတွင်သာ ပေါ်တာဆွဲသည့်ဖြစ်စဉ်များရှိခဲ့သော်လည်း စက်တင်ဘာလအတွင်း သန်လျင်မြို့ပေါ်၌ ပေါ်တာဆွဲသည့် ဖြစ်စဉ်များကြုံနေရခြင်းဖြစ်သည်ဟု ဒေသခံများက ပြောသည်။
“ ဒီလထဲမှာ အတည်ပြုလို့ရတာ ဆယ်ဦးရှိတယ်။ဒါကျနော်တို့လက်လှမ်းမိသလောက် အတည်ပြုလိုရတာပေါ့နော်။ဒီထက်များရင်လည်းများနိုင်တယ်။” ဟု အထက်ပါတာဝန်ရှိသူကပြောသည်။
ဆိုင်ကယ်ကယ်ရီမောင်းသူများတွင်လည်း ပျူစောထီးများရှိသောကြောင့် ဆိုင်ကယ်ကယ်ရီ ငှားရာတွင် ဂရုစိုက်သင့်ကြောင်း ဒေသခံတဦးကပြောသည်။
သန်လျင်မြို့၌ ပေါ်တာဆွဲသည့် ဖြစ်စဉ်များဖြစ်နေသည်မှာ မှန်ကန်ပြီး ဖမ်းဆီးခံရပါက ပိုက်ဆံဖြင့်ပင် ပြန်ရွေး၍ မရကြောင်း ဒေသခံအမျိုးသမီးတဦးက ဆိုသည်။
“ ပြည်သူ့တွေအနေနဲ့ အလုပ်အပြန်တွေကို ဂရုစိုက်ပြန်ဖို့ ၊မိမိ မသိတဲ့ဆိုင်ကယ် ကယ်ရီတွေကို မစီးဖို့၊ လူပြတ်တဲ့နေရာတွေ ကို ရှောင်ရှားဖို့ အသိပေးချင်ပါတယ်။” ဟု အထက်ပါတာဝန်ရှိသူက သတိပေးသည်။
