စက်တင်ဘာ-၁၃၊၂၀၂၅။ဆဏ်း/People’s Spring
အမေရိကန်နိုင်ငံ နယူးယောက်မြို့မှာ ပြုလုပ်တဲ့ ရောင်နီ ဖျော်ဖြေပွဲမစတင်မီ ဒေါ်အောင်ဆန်းစုကြည် ကျန်းမာစေကြောင်း တစ်မိနစ် ငြိမ်သက်ဆုတောင်းပြီးမှ ပွဲစတင်ခဲ့တယ်လို့ သိရပါတယ်။
“လူထုခေါင်းဆောင် အမေဒေါ်အောင်ဆန်းစုကြည် ကျန်းမာပါစေကြောင်း အားလုံးငြိမ်သက်ဆုတောင်း ခဲ့ကြပြီး ဖျော်ဖြေမှုအစီအစဉ်ကို စတင်ခဲ့ပါတယ်” လို့ ရောင်နီ Tour ရဲ့ဖေ့စ်ဘွတ်ခ်မှာ အသိပေးထားပါတယ်။
ဒီပွဲကို စက်တင်ဘာ ၁၃ ရက်ညမှာ ပြုလုပ်ခဲ့တာဖြစ်ပြီး အမေရိကန်နိုင်ငံမှာ ပြုလုပ်တဲ့ ရောင်နီ ရဲ့ ခုနစ်ပွဲမြောက် ဖျော်ဖြေပွဲဖြစ်ပါတယ်။
Public Service Announcement
ဒီပွဲမှာလည်း အရင်ပွဲတွေလိုပဲ လင်းလင်းက မြေပြင်မှာ ဆောင်ရွက်နေတဲ့ ပံ့ပိုးမှု လုပ်ငန်းစဉ်တွေကို ရှင်းပြခဲ့ပြီး မြေပြင်မှာဆောင်ရွက်နေသူတွေကိုလည်း မိတ်ဆက်ပေးခဲ့တယ်လို့ သိရပါတယ်။
“တောတွင်းတစ်နေရာ မြေပြင်မှာရောက်ရှိနေတဲ့ ၈၈ ကျောင်းသားခေါင်းဆောင် မနီလာသိန်းက အားလုံးကိုယ်စား အမှာစကားပြောကြားခဲ့ပါတယ်။” လို့ ရောင်နီ Tour မှာဖော်ပြထားပါတယ်။
ဒီပွဲကို သံအမတ်ကြီး ဦးကျော်မိုးထွန်းလည်းတတ်ရောက်ခဲ့ပြီး ခွန်အားဖြည့်စကားပြောကြားခဲ့တယ်လို့ ဆိုပါတယ်။
ဒီပွဲမှာ လင်းလင်း ချစ်သုဝေတို့ နဲ့အတူ ဧည့်သည်အနေနဲ့ The Durgas အဖွဲ့က ဂီတပညာရှင် BENJII လည်း ပါဝင် ဖျော်ဖြေခဲ့ပါတယ်။
ဒီပွဲကရရှိတဲ့ ငွေစာရင်းကိုတော့ သတင်းဖော်ပြချိန်အထိ တရားဝင်ကြေညာခြင်းမရှိသေးပါဘူး။
ရောင်နီပွဲတွေကို ဧပြီ ၁၂ ရက်က Maryland ၊ မေ၂၄ က Boston ၊ ဇွန် ၁၄ က San Francisco (Bay Area) ၊ ဇွန် ၂၈ ရက်က Florida ၊ဇူလိုင် ၁၉ က Texas နဲ့ ဩဂုတ် ၁၆ က Milwaukee မှာပြုလုပ်ခဲ့ပါတယ်။
ရောင်နီပွဲအနေနဲ့ ယခင်ပြုလုပ်ခဲ့တဲ့ ဖျော်ဖြေပွဲတွေကနေ အမေရိကန်ဒေါ်လာလေးသိန်းကျော်ရရှိခဲ့ပြီး ရရှိငွေတွေကိုတော့ အရေးပေါ်သဘာဝဘေးနှင့်စစ်ရှောင်များ ကဏ္ဍ၊ ကျန်းမာရေး ကဏ္ဍ၊ပညာရေး ကဏ္ဍ၊တောင်ပေါ်တောင်အောက် လူ့အခွင့်အရေးလှုပ်ရှားမှုများကဏ္ဍ အသီးသီးအတွက် အချိန်မဆိုင်းဘဲ လွှဲပြောင်းစီးဆင်းနေတယ်လို့ ဆိုပါတယ်။
