သြဂုတ်-၂၅၊ ၂၀၂၅။ရဲခေါင် /People’s Spring
မန္တလေးတိုင်း၊ နွားထိုးကြီးမြို့နယ်တိုက်ပွဲအတွင်းမှာ စစ်ကောင်စီတပ်သား ၁၀ဦးခန့်သေဆုံးပြီး ဒရုန်းပစ်လက်နက်အပါအဝင် သေနတ်နှစ်လက်နဲ့ စစ်သုံးပစ္စည်းတွေ သိမ်းရတယ်လို့ နွားထိုးကြီးမြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ရှိသူက ပြောပါတယ်။
အခု ဩဂုတ်လဆန်းကစပြီး မြင်းခြံမြို့ဘက်ကနေ အင်အားရာကျော်နဲ့စစ်ကြောင်းထိုးလာတဲ့ စစ်ကောင်စီတပ်သားနဲ့ ပျူစောထီးအဖွဲ့တွေကို သြဂုတ် ၂၀ရက်က နွားထိုးကြီးမြို့နယ် မာန်လည်ကျေးရွာမှာ တိုက်ခိုက်ခဲ့တာလို့ ဆိုပါတယ်။
“တိုက်ခိုက်ခံရပြီး အထိနာလို့ သူတို့ပြန်ဆုတ်သွားပြီ”လို့ အထက်ပါတာဝန်ရှိသူက လူထုနွေဦးကို ပြောပါတယ်။
Public Service Announcement
စစ်ကောင်စီရဲ့ ရွေးကောက်ပွဲမတိုင်မီ နယ်မြေစိုးမိုးရေးအတွက် စစ်ကြောင်းထိုးလာတာကို ခုခံနိုင်ခဲ့တယ်လို့လည်း ၎င်းက ဆက်ပြောပါတယ်။
အဲဒီတိုက်ခိုက်မှုကို နွားထိုးကြီးမြို့နယ် ပြည်သူ့ကာကွယ်ရေးအဖွဲ့ (ပ.က.ဖ)နဲ့ အတူ မြင်းခြံခရိုင် တပ်ရင်းတပ်ဖွဲ့တွေ ပူးပေါင်းတိုက်ခိုက်ခဲ့ရာ စစ်ကောင်စီတပ်သားမျက်မြင် ၁၀ဦး သေဆုံးပြီး ၈ဦးခန့် ပြင်းထန် ဒဏ်ရာရခဲ့တယ်လို့လည်း နွားထိုးကြီး ပကဖက ဒီကနေ့ ညပိုင်းက သီးခြားထုတ်ပြန်ထားပါတယ်။
ဒါ့အပြင် MA 11 နှစ်လက်၊ Drone Shooter တစ်လက် ၊ ငါးကြင်းမြီးပြောင်းတစ်ချောင်း၊ လက်ပစ်ဗုံး သုံးလုံး ၊ Starlink တစ်လုံး၊ ငွေသားအချို့၊ ကျည်ဘောက် နှစ်ခုနှင့်အတူ ကျည်အချို့ကိုပါ သိမ်းဆည်းရမိခဲ့တယ်လို့ ဖော်ပြပါတယ်။
ဩဂုတ် ၅ ရက်ကလည်း နွားထိုးကြီးမြို့နယ်မှာ စစ်သားတွေပါတဲ့ ကားတိုက်ခိုက်ခံရပြီး သုံးဦးသေဆုံးကာ လက်နက် လေးလက်သိမ်းရတယ်လို့ မြင်းခြံခရိုင် အမှတ် (၄-၁၀) တပ်ရင်းက အသိပေးထားပါတယ်။
