ဇွန်-၈၊၂၀၂၅။ရောင်နီ/People’s Spring
ရန်ကုန်မြို့၊ဗိုလ်တထောင်မြို့နယ် ၄၃ လမ်းတွင် တိုက်ခန်းတစ်ခန်း၌ ဟင်းအိုးတည်ကာ အဲကွန်းဖွင့်အိပ်ရာမှ အသက်ရှုကြပ်၍ အမျိုးသမီးနှစ်ဦးသေဆုံးခဲ့ကြောင်း ဒေသခံတစ်ဦးကပြောသည်။
“သူတို့က ဟင်းအိုးတည်ထားတာကိုမေ့ပြီး တူးသွားတာ။ အဲကွန်းခန်းထဲမှာဆိုတော့ အဲဒီ့အနံ့ကိုရှုမိပြီး အဆိပ်သင့်သွားတာပါ” ဟု ယင်းနေရာသို့ သွားရောက်ကူညီခဲ့သည့် ပရဟိတအဖွဲ့ဝင်တစ်ဦးကပြောသည်။
ဇွန် ၈ ရက် နံနက် ၁၀ နာရီခန့်တွင် သတင်းရခဲ့ခြင်းဖြစ်ပြီး ယင်းအိမ်ရှိ အမျိုးသမီး နှစ်ဦးသေဆုံးကာ အမျိုးသားတစ်ဦးကို ဂျပန်ဆေးရုံသို့ ပို့ဆောင်ပေးခဲ့ရသည်ဟုဆိုသည်။
Public Service Announcement
“အမျိုးသားကတော့ ICU ထဲမှာပဲရှိပါသေးတယ်” ဟုအထက်ပါပရဟိတအဖွဲ့ဝင်ကပြောသည်။
အဆိုပါဖြစ်စဉ်သို့ဘိုကလေးဈေးပရဟိတအသင်း ၊အဖြူရောင်ကမ်းလက် ၊လင်းလက်၊ ရှင်သန်ရေး ၊ ပီတိမေတ္တာ လူမှူကူညီရေး အသင်းတို့ သွားရောက်ကူညီခဲ့ကြောင်းသိရသည်။
ပြီးခဲ့သည့် လပိုင်းကလည်း ရန်ကုန်မြို့ရှိ မြို့နယ် နှစ်ခုတွင် မီးပျက်နေ၍ မီးစက်မောင်းကာ အဲကွန်းဖွင့် အိပ်ရာမှ ကာဘွန်မိုနောက်ဆိုက် အဆိပ်သင့်ပြီးလူသေဆုံးခဲ့သည်။
