မေ ၂၆၊၂၀၂၅။သုည/People’s Spring
စစ်ကိုင်းတိုင်းအတွင်း သပိတ်အဖွဲ့တွေ၊ ဒေသခံပြည်သူတွေက ဒီကနေ့ (မေလ ၂၆)မှာ စစ်ရာဇဝတ်မှုတွေကျူးလွန်နေတဲ့ စစ်ကောင်စီကို အရေးယူပေးဖို့ တောင်းဆိုတဲ့ ဆန္ဒပြသပိတ်လှုပ်ရှားမှုတွေ အသီးသီး ပြုလုပ်ခဲ့ကြပါတယ်။
စစ်ကိုင်းတိုင်း ကလေးမြို့နယ်မှာ ပင်မသပိတ်အင်အားစုက ဦးဆောင်ကာ အပြည်ပြည်ဆိုင်ရာအလုပ်သမားအဖွဲ့အစည်းရဲ့ ပုဒ်မ (၃၃)အရ အကြမ်းဖက်စစ်ကောင်စီကို ချက်ချင်းအရေးယူနိုင်ရေး “ILO implement Article 33 On Myanmar Now 2025” စာသားနဲ့ တောင်းဆိုဆန္ဒပြခဲ့ပါတယ်။
လက်ပံတောင်းတောင်ဒေသမှာလည်း လူထုသပိတ်က ဦးဆောင်ပြီး ပြည်သူတွေနဲ့အတူ “Vote ILO Article 33 to save LIVES” စာသားကိုင်ဆောင်ကာ စစ်အာဏာရှင်ဆန့်ကျင်ရေးကြွေးကြော်သံတွေ ဟစ်ကြွေးကာ လူထုလှုပ်ရှားမှုပြုလုပ်ခဲ့ပါတယ်။
Public Service Announcement
အဆိုပါလှုပ်ရှားမှုဟာ ဇွန်လ၂ရက်နဲ့ ၃ ရက်နေ့မှာ မဲခွဲဆုံးဖြတ်မယ့် ILO အစည်းအဝေးကြီးကနေ လူသားမျိုးနွယ်အပေါ် စစ်ရာဇဝတ်မှုပေါင်းများစွာ ကျူးလွန်နေတဲ့ စစ်ကောင်စီကို အရေးယူနိုင်ဖို့ လူ့အသက်တွေကယ်တင်ဖို့ ILOရဲ့ ပုဒ်မ(၃၃)ကိုမဲပေးပါဆိုတဲ့ ရည်ရွယ်ချက်နဲ့ လုပ်ဆောင်ခဲ့တာ ဖြစ်ကြောင်း သပိတ်ကော်မတီဝင်က ဆိုပါတယ်။
စစ်ကိုင်းတိုင်းအတွင်းက ဒေသခံတော်လှန်ပြည်သူတွေဟာ နယ်မြေမငြိမ်သက်မှုကြားထဲကနေ အကြမ်းဖက်စစ်အာဏာရှင်ဆန့်ကျင်ရေး ဆန္ဒပြသပိတ်တွေကို နေ့စဉ်ပြုလုပ်နေကြပါတယ်။
ဓာတ်ပုံ – စစ်ကိုင်းဒေသသပိတ်အင်အားစု၊ လက်ပံတောင်းသပိတ်
