မေ၄၊ ၂၀၁၅။ရဲခေါင်/People’s Spring
ရခိုင်ပြည်နယ်၊ အမ်းမြို့သိမ်းနှင့် အနောက်ပိုင်းတိုင်းစစ်ဌာနချုပ်(နပခ) သိမ်းတိုက်ပွဲအတွင်း စစ်ဆင်ရေးတာဝန်ထမ်းဆောင်ခဲ့သော ရဲဘော်များ မိခင်တပ်ရင်းသို့ပြန်လာကြရာ ဒေသခံပြည်သူများမှ ကြိုဆိုခဲ့ကြောင်း စလင်းမြို့နယ်ပြည်သူ့ကာကွယ်ရေးအဖွဲ့ (ပကဖ)က ထုတ်ပြန်သည်။
စလင်းမြို့နယ်ပကဖမှ ရဲဘော်အင်အား ၁၀၀သည် မဟာမိတ်တပ်ရင်းတပ်ဖွဲ့များ၊ အာရက္ခတပ်တော် (AA)နှင့်အတူ အမ်းမြို့သိမ်း စစ်ဆင်ရေးနှင့် အနောက်ပိုင်းတိုင်းစစ်ဌာနချုပ် (နပခ) သိမ်းစစ်ဆင်ရေးတို့အတွင်း တာဝန် ကျေပွန်စွာတာဝန်ထမ်းဆောင်နိုင်ခဲ့ပြီးပြန်လည်ရောက်ရှိလာသည်ဟု ဆိုသည်။
အဆိုပါ တိုက်ပွဲများအတွင်း စလင်းမြို့နယ် ပကဖမှ ရဲဘော်ရှစ်ဦး ကျဆုံးခဲ့ရပြီး၊ ရဲဘော် တစ်ဦး ကိုယ်လက်အင်္ဂါဆုံးရှုံးခဲ့ရကြောင်း အသိပေးသည်။
Public Service Announcement
အမိမြေပြန်ရောက်လာသော ရဲဘော်များအား ဒေသခံ ပြည်သူများက ဝမ်းပန်းတသာကြိုဆိုဂုဏ်ပြုရင်း ကျဆုံးရဲဘော်များအား အလေးနီပြုဦးညွှတ်ကြောင်း ဖော်ပြသည်။
“စစ်ဆင်ရေးအကျိုးအမြတ်အနေနဲ့ရဲဘော်တွေအနေနဲ့ တိုက်ပွဲအတွေ့အကြုံစစ်ရေးအတွေ့အကြုံနဲ့ အာရက္ခတပ်တော်ရဲ့လေ့ကျင့်ရေးစစ်ရေးအတွေ့အကြုံများစွာရခဲ့ပါတယ်”ဟု စလင်း မြို့နယ်ပကဖ တာဝန်ရှိသူက လူထုနွေဦးသို့ ပြောသည်။
၎င်းဆက်လက်၍”အဓိကရည်ရွယ်ချက်အနေနဲ့ ဖက်ဒရယ်ဒီမိုကရေစီနိုင်ငံတည်ဆောက်ရေးအဓိကမဏ္ဍိုင်တစ်ခုနဲ့ယှဉ်ပြီး အခုလိုကာလမှာ နယ်မြေပိုင်းခြားကွဲခြားမှုမရှိပဲ မဟာမိတ်ဆက်ဆံရေးတစ်ရပ်ပေါ်ထွန်းရေးကိုဦးတည်တာ”ဟု အမ်းနှင့် နပခ သိမ်းပိုက်မှုတွင် ပါဝင်ခဲ့မှုအပေါ် ၎င်းက ရှင်းပြသည်။
အာရက္ခတပ်တော်(AA)နှင့် မဟာမိတ်များပူးပေါင်း၍ အမ်းမြို့နှင့် မြို့နယ်အခြေစိုက် အနောက်ပိုင်းတိုင်းစစ်ဌာနချုပ် (နပခ)ကို ၂၀၂၄ ဒီဇင်ဘာ ၂၀ ရက်တွင် အပြီးသတ်သိမ်းပိုက်နိုင်ခဲ့ခြင်းဖြစ်သည်။
အမ်းမြို့နယ်တွင် စစ်ကောင်စီ၏ နပခ ဌာနချုပ် အပြင် ၊ ခြေမြန်တပ်ရင်းများဖြစ်သည့် ခမရ(၃၇၁)၊( ၃၇၂)၊(၃၇၃)(၃၇၄)အမြောက်တပ် ရင်းများ အခြေစိုက်သည်။
ထို့အပြင် အမှတ်(၂) ကုတင် ၃၀၀စစ်ဆေးရုံ၊ အမှတ် (၉၄၆) ဆောက်လုပ်ရေး အင်ဂျင်နီယာတပ်ခွဲ၊ အမှတ် (၃၄၅) စက်လက်နက်ပစ္စည်းတပ်ခွဲ၊ စစ်ဖက်ရေးရာလုံခြုံရေးတပ်ဖွဲ့ (နပခ)၊ အမှတ်(၈) အဆင့်မြင့်ဆက်သွယ်ရေးတပ်ရင်း၊အမှတ် (၉၂၆)၊ ထောက်ပံ့နှင့် ပို့ဆောင်ရေးတပ်ခွဲ၊ အမှတ်(၉၁၉) စစ်မြေပြင်အင်ဂျင်နီယာတပ်ရင်း၊ အမှတ် ၇၅၇ အလုပ်ရုံတပ်ခွဲ (လျှပ်စစ်)နှင့် အမှတ်(၁၀)တပ်ထိန်းတပ်စသည့် အခြေစိုက်တပ်ဖွဲ့များ ရှိသည်။
ရုပ်သံ – စလင်း ပကဖ
