ဟန်နွေ/People’s Spring
ကချင်လွတ်လပ်ရေးတပ်မတော်(KIA)နှင့် မဟာမိတ်များက ဗန်းမော်မြို့သိမ်းတိုက်ပွဲဆင်နွှဲလျက်ရှိရာ မြို့ဧရိယာ အများစုကို သိမ်းပိုက်ထိန်းချုပ်ထားနိုင်ပြီဖြစ်ကြောင်း ကချင်စစ်ရေးသတင်းရင်းမြစ်အချို့ကပြောသည်။
ဒီဇင်ဘာ ၄ ရက်မှစတင်၍ ဗန်းမော်မြို့သိမ်းတိုက်ပွဲနှင့် မံစီ မြို့နယ်ရှိ စစ်ကောင်စီ လက်ကျန်စခန်းများကို KIAနှင့် မဟာမိတ်တပ်များက တပြိုင်တည်း ထိုးစစ်ဆငိတိုက်ခိုက်နေခြင်းဖြစ်သည်။မြို့သိမ်းတိုက်ပွဲ ၉ ရက်ရှိလာချိန်တွင်စစ်ကောင်စီတပ်စွဲရာနေရာအများအပြားကို KIAက သိမ်းပိုက်ထားနိုင်ပြီဖြစ်ကြောင်း စုံစမ်းသိရသည်။
“မြို့တွင်း ၇၅ရာခိုင်နှုန်းလောက်ပဲ သိမ်းနိုင်သေးတယ်လို့ ဒေသခံတွေရဲ့ ပြောဆိုချက်အရ သိရပါတယ်။ ဗန်းမော်မြို့ရဲ့ အဓိက စကခ(၂၁)နဲ့ ခလရ(၄၇) တော့ ဝင်ရောက်နိုင်တာ မကြားသေးပါဘူး။ တိုက်ပွဲ ဆက်ဖြစ်နေဆဲ။ မြေပြင် အခြေအနေကို စောင့်ကြည့်နေဆဲပါ” ဟု ကချင်စစ်ရေးလေ့လာသူ ဦးဇော်ဆန်က ပြောသည်။
Public Service Announcement
အခြား ကချင်စစ်ရေးသတင်းရင်းမြစ်တဦးကလည်း ဒီဇင်ဘာ ၁၁ရက် တိုက်ပွဲတွင် KIA သိမ်းပိုက်ထားပြီးဖြစ်သည့် ဗန်းမော် တက္ကသိုလ်မှ ရှေ့ဆက်တိုးနိုင်ခဲ့ပြီး ၊မြို့တွင်း အောင်မြေချဲ့နေဗကာ စစ်သုံ့ပန်းနှင့် လက်နက်များထပ်မံရရှိခဲ့ကြောင်း ဖော်ပြသည်။ ၎င်းက ဗန်မော်မြို့သိမ်းတိုက်ပွဲအခြေအနေကိုနေ့စဥ် အသိပေးနေခြင်းဖြစ်သည်။
ဒီဇင်ဘာ ၁၀ရက် တိုက်ပွဲတွင်လည်း စစ်ကောင်စီတပ် ခြေကုပ် ယူထားသည့် နေရာ ၈နေရာကိုသိမ်းထားနိုင်ခဲ့ပြီး စစ်ကောင်စီ ခြေကုပ်ယူရာ ဟိုတယ်အချို့ကိုလည်း ရှင်းလင်း သိမ်းပိုက်နိုင်ခဲ့သည်ဟု အထက်ပါစစ်ရေးရင်းမြစ်ကဆိုသည်။
ဗန်းမော်-မိုးမောက်ကြားတွင်လည်း တိုက်ပွဲဖြစ်ပွားခဲ့ပြီး စစ်ကောင်စီ အလောင်းနှင့်ခဲယမ်းများ ရရှိခဲ့ဟုလည်း သိရသည်။
KIA အနေဖြင့် ဗန်းမော်မြို့သိမ်းတိုက်ပွဲ ဖော်ဆောင်နေစဉ် တရုတ်အစိုးရသည် KIO ဥက္ကဋ္ဌ ဗိုလ်ချုပ်ကြီးအင်ဘန်လကို တရုတ်နိုင်ငံ ကူမင်းမြို့သို့ ဖိတ်ခေါ်ပြီး ဆွေးနွေးခဲ့သည်။KIO ဥက္ကဋ္ဌ၏ တရုတ်ခရီးစဉ် ဆွေးနွေးမှု အခြေအနေများကိုဆက်လက်စုံစမ်းနေဆဲဖြစ်သည်။ တရုတ်အစိုးရသည် မြစ်ကြီးနားနှင့် ဗန်းမော်ကို တိုက်ခိုက်ခြင်းမပြုရန် KIA အား ဖိအားပေးမှု ရှိခဲ့ကြောင်း သတင်းရင်းမြစ်အချို့က ယခင်ပြောကြားထားသည်။
ထိုသို့ တရုတ်ဘက်က ဖိအားရှိသော်လည်း KIA အနေဖြင့် ဗန်းမော် အပါအဝင် မြစ်ကြီးနား၊ ဖားကန့်၊ ဝိုင်းမော်မြို့များကို ဆက်လက်တိုက်ခိုက်သိမ်းပိုက်နိုင်ခြေရှိကြောင်း ကချင်စစ်ရေးလေ့လာသူ ဦးဇော်ဆန်ကသူ၏အမြင်ကိုပြောသည်။
“တရုတ် ဘာပြောပြော KIO ဘက်ကတော့ သူလုပ်စရာရှိတာကို ဆက်လုပ်သွားလိမ့်မယ်လို့ သုံးသပ်ပါတယ်။ တရုတ်အစိုးရရဲ့ ဖိအားနဲ့ လွှမ်းမိုးမှုဟာ ဘယ်လောက်အထိ သက်ရောက်မှု ရှိမရှိဆိုတာ ဗန်းမော်တိုက်ပွဲ အခြေအနေ ကို ကြည့်ခြင်းအားဖြင့် ကျနော်တို့ သိနိုင်မှာ ဖြစ်တယ်။” ဟု ဦးဇော်ဆန်က ဆက်ပြောသည်။
KIA အနေဖြင့် ဗန်းမော်မြို့သိမ်းတိုက်ပွဲနှင့်အတူ ဆင်နွှဲနေသည့် မံစီမြို့ လက်ကျန် စစ်ကောင်စီတပ်များကိုလည်း ပိတ်ဆို့တိုက်ခိုက်နေဆဲဖြစ်သည်ဟု စစ်ရေးသတင်းရင်းမြစ်က အသိပေးထားသည်။
