မီးသတ်နှင့် လူမှုကူညီရေးအသင်းသားအချို့ ဒဏ်ရာရဟုဆို
သတိုး၊သုည/People’s Spring
ရန်ကုန်မြို့ ဒဂုံမြို့သစ်အရှေ့ပိုင်းမြို့နယ် စက်မှုဇုန်၌ မီးလောင်မှုဖြစ်ပွားနေရာ မီးလောင်ချိန် ၃နာရီကျော်သည်အထိ မငြှိမ်းနိုင်သေးကြောင်း မီးသတ်တပ်ဖွဲ့က အသိပေးထားသည်။
ဒီဇင်ဘာ ၅ ရက် ညနေ ၆ နာရီခန့်တွင် ဒဂုံအရှေ့စက်မှုဇုန် ပြင်စည်မင်းသားကြီးလမ်း၌ မီးလောင်မှုဖြစ်ပွားနေခြင်းဖြစ်ပြီး Level 2 အဆင့်မီးငြှိမ်းသတ်ယာဉ်များ ထွက်ခွာမီးငြှိမ်းသတ်နေရကြောင်း မီးသတ်တပ်ဖွဲ့က သတင်းထုတ်ပြန်ထားသည်။
မီးသတ်တပ်ဖွဲ့က တိုက်ရိုက်ထုတ်လွှင့်ထားသည့် ဗီဒီယိုဖိုင်များ၌ ကျူးကျော်အိမ်ကဲ့သို့ လူနေအိမ် အများအပြားမီးလောင်နေသည်ကို တွေ့မြင်ရသည်။
Public Service Announcement
မီးလောင်မှုဖြစ်ပွားသည့်နေရာသည့် ကော်စက်ရုံဖြစ်ပြီး လောင်စာများသောကြောင့် မီးလောင်ချိန်ကြာမြင့်ခြင်းဖြစ်ကြောင်း ဒေသခံများကပြောသည်။
မီးလောင်မှုအချိန်ကြာသည်အထိ Level 1 အဆင့်မီးငြှိမ်းသတ်ယာဉ်များဖြင့် မီးငြှိမ်းသတ်ခဲ့သောကြောင့် အချိန်ပိုမိုကြာမြင့်ခြင်းဖြစ် နိုင်သည်ဟု ဒေသခံ အချို့က ဝေဖန်ထားသည်။
“မီးက လောင်နေတာတော်တော်ကြာပြီ။ ၇နာရီလောက်ထဲကနေ အခုထိ ၂ နာရီကျော်ကြာ လောင်နေတုန်းပဲ။ မီးကတော်တော်များတယ်။ ကော်စေ့စက်ရုံအတွင်းထဲကနေ လှိုက်လောင်နေတာလို့ သိရတယ်။ အနီးအနားရပ်ကွက်တွေဆို ကော်နံ့တွေကို ရတယ်။ အခုကျွန်တော်တို့ ဒဂုံတက္ကသိုလ်ဘက်ကနေ မီးသတ်ကား၊ လူနာတင် ကားတွေ တောက်လျှောက်သွားနေတာ တွေ့နေရတယ်”ဟု ဒဂုံမြို့သစ်(အရှေ့ပိုင်း)နေ ပြည်သူတစ်ဦးက ပြောသည်။
အဆိုပါ မီးလောင်မှုဖြစ်စဥ်တွင် မီးသတ်တပ်ဖွဲ့ဝင်အချို့နှင့် လူမှုကူညီရေးအသင်းသားအချို့ ထိခိုက်ဒဏ်ရာရရှိနေကြောင်း သွားရောက်ကူညီနေသူတစ်ဦးက ဆိုသည်။
” မငြိမ်းသေးဘူး။ အတွင်းမှာ လှိုက်လောင်နေတယ်။ မီးသတ်တပ်ဖွဲ့ဝင်အချို့ ညှော်နံ့တွေ အရမ်းမွန်းပြီး အသက်ရှုကြပ်တာတွေ မီးဟတ်တာတွေ ထိခိုက်မှုအချို့ရှိနေတယ်။ လူနာတင်ကားတွေရော ကူညီပေးသူတွေရောတော့ အားလုံးအသင့်ရှိနေကြပါတယ်” ဟု ၎င်းက ပြောသည်။
