▪︎ဝယ်လိုသူများနေ၍ သုံးရက်ထပ်တိုးရောင်း
ရောင်နီ/ People’s Spring
နွေဦးဖွံ့ဖြိုးရေးဘဏ်၏ဒုတိယအကြိမ်အစုရှယ်ယာ ရောင်းချသည့် အိမ်ပြန်လှိုင်းသစ် ICO Round 2 ပရောဂျက်၏ မျှော်မှန်းပမာဏ ဒေါ်လာ ဆယ်သန်းဖိုး ရောင်းပြီးဖြစ်သော်လည်း ဝယ်ယူလိုသူများနေဆဲဖြစ်ပြီး ပြည်သူများ၏တောင်းဆိုမှုကြောင့် ဝယ်ယူခွင့် ၃ ရက်တိုးမြှင့်ထားကြောင်း ယင်းဘဏ်ကအသိပေးထားသည်။
“ယနေ့ ဒီဇင်ဘာ ၅ ရက်နေ့ နေ့လည် ၃ နာရီ ခွဲ ခန့်မှာ ICO Round 2 ၏ မျှော်မှန်းပမာဏ အမေရိကန် ဒေါ်လာ (၁၀) သန်း ပန်းတိုင်ကို အောင်မြင်စွာ ရောက်ရှိ ပြည့်မီသွားပြီ ဖြစ်ပါတယ်။” ဟု နွေဦးဖွံ့ဖြိုးရေးဘဏ် (SDB) ကထုတ်ပြန်ထားသည်။
အိမ်ပြန်လှိုင်းသစ် ICO Round 2 ကို နိုဝင်ဘာ ၁၅ မှ ဒီဇင်ဘာ ၅ ရက်အထိ ရောင်းချခဲ့ခြင်းဖြစ်ပြီး စတင်ရောင်းချသည့်နေ့တွင် ၂၄ နာရီ (တစ်ရက်) အတွင်း ဒေါ်လာ ၂.၂ သန်းကျော်ဖိုးရောင်းချခဲ့ရသည်။ ဒီဇင်ဘာ ၅ ရက် ည ၁၂ နာရီအထိရောင်းရန်ကြေညာထားသော်လည်း ဒီဇင်ဘာ ၅ ရက် ညနေ ၃ နာရီကျာ်တွင် ဒေါ်လာ ၁၀ သန်းဖိုးရောင်းခဲ့ရခြင်းဖြစ်သည်။
Public Service Announcement
ဒီဇင်ဘာ ၅ ရက်တွင် မျှော်မှန်းပမာဏ ပြည့်မီရန် ဒေါ်လာ တစ်သန်းကျော် လိုအပ်နေချိန်တွင် တစ်ဦးတည်းဖြင့် ဒေါ်လာသုံးသိန်း နှင့် ဒေါ်လာတစ်သိန်းဖိုးဝယ်ယူသူများရှိခဲ့ကြောင်းသိရသည်။
“တဦးတည်း အမေရိကန်ဒေါ်လာ ၃ သိန်းဖိုး ဝယ်ယူသူလည်း ပေါ်ထွန်းလာပါပြီ..။တစ်ဆယ်၊ တစ်ထောင်၊ တစ်သောင်းကစလို့ သိန်းဂဏန်းအထိ ထောက်ပို့ကြသူအားလုံးကို တန်းတူ လေးစားတန်ဘိုးထားပါတယ်..။” ဟု NUGစီမံကိန်း ၊ဘဏ္ဍာရေးနှင့် ရင်းနှီးမြှုပ်နှံမှု ဝန်ကြီး ဦးတင်ထွန်းနိုင် ၏ ဖေ့စ်ဘွတ်ခ်၌ ရေးသားထားသည်။
လက်ရှိအချိန်အထိ အစုရှယ်ယာဝယ်ယူသူအများအပြားရှိနေပြီး SDB အသုံးပြုသူများကို ရက်တိုး မတိုး စစ်တမ်းကောက်ယူခဲ့ရာ ရက်တိုးရန် အဆိုပြုသူများသောကြောင့် အစုရှယ်ယာရောင်းချခြင်းကို ဒီဇင်ဘာ ၈ ရက်အထိ တိုးမြှင့်လိုက်ခြင်းဖြစ်ကြောင်း SDB ကအသိပေးထားသည်။
“ပိတ်ခါနီးမှ ဝယ်သူအတော်များနေလို့ ဒီနေ့ဝယ်တာ နောက်ရက်မှ လက်မှတ်ရမယ်ပြောတယ်”ဟု ဘဏ်ရှယ်ယာဝယ်ယူခဲ့သူတဦးကပြောသည်။
SDB ဘဏ်သည် ပထမအကြိမ် အစုရှယ်ယာရောင်းချခြင်းကို ၂၀၂၃ နိုဝင်ဘာ ၁၇ ရက်တွင် ပြုလုပ်ခဲ့ပြီး ဆယ်ရက်အတွင်း ဒေါ်လာ ၁၁သန်း ကျော်ဖိုးရောင်းချပေးခဲ့သည်။ အဆိုပါရှယ်ယာရှင်များကိုလည်း ဘဏ်အမြတ်ငွေ နှစ်ကြိမ် ပေးထားကြောင်း SDB မှ တာဝန်ရှိသူများကပြောကြားထားသည်။
