Fransada ortaya çıxan mənzərə yeni hökumətin formalaşdırılmasını çətinləşdirir - Şahin Cəfərli

Fransadakı hazırkı vəziyyəti Gununsesi.info üçün şərh edən siyasi ekspert Şahin Cəfərli bildirib ki, ortaya çıxan situasiya yeni hökumətin formalaşdırılmasını çətinləşdirir. O, qeyd edir ki, heç bir blok təkbaşına çoxluğa malik deyil və koalisiya razılaşmasına ehtiyac var: “Yeni Xalq Cəbhəsinin həm öz içərisində, həm də bu ittifaqla Makronun bloku arasında ciddi siyasi-ideoloji fərqliliklər və ziddiyyətlər var. Yeni Xalq Cəbhəsinin liderləri arasında Jan Luk Melanşon (La France insoumise – Asi Fransa Partiyası) kimi ultrasolçu-populistin olması işləri daha da mürəkkəbləşdirir.  Marin Le Pen-Jordan Bardella cütlüyünün liderlik etdiyi Milli Birlik (Rassemblement National – RN) proqnozlaşdırılandan daha az – 120-150 arası yer əldə edir. Halbuki RN-in 1-ci olacağı gözlənilirdi, partiya rəhbərliyi isə təkbaşına çoxluğa nail olaraq hökuməti formalaşdıracağına inanırdı (Parlament 577 millət vəkilindən ibarətdir). Seçkilərin qalibi sol koalisiya – Yeni Xalq Cəbhəsi olub. Solçular 180-225 arası yer qazanır. Bu ittifaq sırf radikalları əngəlləmək üçün bir araya gəlmiş sosialistlər, sol liberallar, yaşıllar, kommunistlər və həmkarlar təşkilatları fəallarından ibarətdir. Yəni vahid siyasi-iqtisadi platformaya malik yekcins bir siyasi ittifaq deyil”.

Ekspert seçkilərin nəticəsinin Makron hökuməti üçün hansı nəticələrə yol açacağına da münasibət bildirib: “Prezident Makronu dəstəkləyən blok (Respublika üçün Birlikdə – Ensemble pour la Republique) ikinci olub və proqnozlaşdırılandan daha çox – 150-180 kreslo əldə edir. Fransada parlament seçkiləri majoritar sistem üzrə keçirilir və iki turludur. İlk turda hər hansı namizəd 50%-dən çox səs almırsa, həmin dairədə ən çox səs toplamış 2 namizəd, eləcə də azı 12,5% səs yığmış 3-cü namizəd arasında ikinci tur keçirilir. İlk turdan sonra sol ittifaq və makronistlər arasında razılıq əldə olundu ki, geniş respublika cəbhəsi yaradılsın və bu iki blokun 3-cü olmuş namizədləri ikincinin xeyrinə namizədliyini geri götürsün. Bu qərar ultrasağçı namizədlərin mövqelərini xeyli zəiflətdi. Düşünürəm ki, ortaya çıxan mənzərə yeni hökumətin formalaşdırmasını da çətinləşdirəcək”.

Ekspert sonda əlavə edib ki, bu mərhələdə “lepençilər”in qarşısı növbəti dəfə kəsildi:“Amma Fransa cəmiyyətində onları gücləndirən problemlər heç yerə qeyb olmayıb. Bu problemlər ağırlaşmağa davam edərsə, bundan sonrakı prezident və parlament seçkilərində radikal sağın hakimiyyətə gəlişini əngəlləmək mümkün olmaya bilər”.