ပါကစ္စတန်ဖက်က ပစ်ချမှုကြောင့် အိန္ဒိယရဲ့ Rafale တိုက်လေယာဉ် အနည်းဆုံးတစ်စီး ပျက်ကျခဲ့တယ်လို့ ပြင်သစ် ထောက်လှမ်းရေးက ပြောကြားခဲ့ပါတယ်။
ဒါဟာ ပြင်သစ်နိုင်ငံမှာ ထုတ်လုပ်တဲ့ ကမ္ဘာ့ထိပ်တန်းအဆင့် တိုက်လေယာဉ် အမျိုးအစားအတွက် စစ်မြေပြင်မှာ ပထမဆုံးအကြိမ် ဆုံးရှုံးမှုလို့လည်း သတ်မှတ်နိုင်ပါတယ်။ အိန္ဒိယဟာ လေတပ်ရဲ့ သက်တမ်းအိုဟောင်းနေတဲ့ တိုက်လေယာဉ်တွေ နေရာမှာ အစားထိုးဖို့အတွက် Rafaleတွေကို ပြင်သစ်ဆီကနေ မှာယူထားတာ ဖြစ်ပါတယ်။
မေလ ၇ ရက်နေ့ မနက်ပိုင်းမှာတော့ အိန္ဒိယဟာ ဆင်ဒူးစစ်ဆင်ရေးကို ဆင်နွှဲပြီး အိမ်နီးချင်း ပါကစ္စတန် နိုင်ငံရဲ့ မြို့တချို့နဲ့ ပါကစ္စတန် ထိန်းချုပ်ထားရာ ကက်ရှ်မီးယားဒေသ အစိတ်အပိုင်းတွေကို လေကြောင်းကနေ တိုက်ခိုက်ခဲ့ပါတယ်။
ပါကစ္စတန်က အိန္ဒိယရဲ့ Rafale ၃ စီးအပါအဝင် တိုက်လေယာဉ် စုစုပေါင်း ၅ စီးကို ပစ်ချနိုင်ခဲ့တယ်လို့ ကြွေးကြော်ထားပြီး အိန္ဒိယ စစ်တပ်ကတော့ အတည်မပြုပါဘူး။ ပါကစ္စတန် စစ်တပ်က ဘာတင်ဒါ၊ ဂျမူး၊ အက်ခ်နော၊ ဆရီနာဂါနဲ့ အေဗန်တီပူရတို့မှာ အိန္ဒိယရဲ့ Rafale ၃ စီး၊ MiG-29 ၁ စီးနဲ့ SU-30 ၁ စီးတို့အပြင် အစ္စရေးလုပ် Heron စစ်သုံးဒရုန်း ၁ စီးကိုပါ ပစ်ချနိုင်ခဲ့တယ်လို့ ထုတ်ပြန်ထားပါတယ်။
Public Service Announcement
အိန္ဒိယရဲ့ ရန်လိုမှုကို တုံ့ပြန်ဖို့အတွက် တိုက်လေယာဉ်တွေကို အရေးတကြီး ပျံတက်စေခဲ့ပြီး နှစ်ဖက် စုစုပေါင်း တိုက်လေယာဉ် ၁၂၅ စီးလောက် ပါဝင်တဲ့ ရင်ဆိုင် တိုက်ပွဲဟာ ခေတ်သစ် စစ်သမိုင်းမှာ အရေအတွက် အများဆုံးနဲ့ အချိန်အကြာဆုံး ဝေဟင်စီးချင်းထိုးပွဲ ဖြစ်ခဲ့တယ်လို့ ပါကစ္စတန်က ပြောပါတယ်။
ဒါပေမဲ့ နှစ်နိုင်ငံစလုံးရဲ့ တိုက်လေယာဉ်တွေဟာ နယ်စပ်စည်းကို မကျော်ဘဲ နယ်စပ်မျဉ်းရဲ့ ကီလိုမီတာ ၁၆၀ လောက် ရှည်လျားတဲ့ ဖြတ်ပိုင်းဇုန် တလျှောက်မှာသာ ဒုံးကျည်တွေနဲ့ အပြန်အလှန် လှမ်းပစ်ခဲ့ကြတာလို့ သိရပါတယ်။ ထွက်ပေါ်နေတဲ့ သတင်းတွေမှာတော့ တရုတ်လုပ် PL-15 အမျိုးအစား ဝေဟင်ကနေ ဝေဟင်ပစ်ဒုံးကျည်တွေဟာ တိုက်ပွဲဝင်အဆင့် ပထမဆုံး လက်တွေ့ အသုံးပြုမှုမှာတင် ပါကစ္စတန်အတွက် ကြီးမားတဲ့ အောင်ပွဲကို ဆောင်ယူပေးနိုင်ခဲ့တာ ဖြစ်တယ်လို့ ဖော်ပြထားကြပါတယ်။ အဲဒီ ဒုံးကျည်တွေဟာ ကီလိုမီတာ ၁၅၀ လောက်ထိ ပျံသန်းနိုင်စွမ်းရှိပြီး ပါကစ္စတန် လေယာဉ်တွေဟာ နယ်စပ်ထိ ချဉ်းကပ်စရာ မလိုဘဲ ရန်သူ ပစ်မှတ်တွေကို အဝေးကနေ ပစ်ခတ်ခဲ့တာ ဖြစ်ပါတယ်။
CNNနဲ့ အင်တာဗျူးမှာတော့ ပြင်သစ် ထောက်လှမ်းရေး အရာရှိ တစ်ဦးက ရရှိထားတဲ့ လေယာဉ်ပျက် အစိတ်အပိုင်း ဓာတ်ပုံ မှတ်တမ်းတွေအရ Rafale အနည်းဆုံး ၁ စီး ပစ်ချခံခဲ့ရတယ်လို့ နားလည်ထားကြောင်း ပြောကြားသွားပါတယ်။ လောလောဆယ်တော့ ပြင်သစ် အာဏာပိုင်တွေဟာ ပါကစ္စတန် ပစ်ချတာကို ခံခဲ့ရတဲ့ Rafaleက ၁ စီးထက် ပိုသလား ဆိုတာကို စုံစမ်းနေဆဲလို့လည်း သူက ဆက်ပြောပါတယ်။
Rafaleတစ်စီး ဆုံးရှုံးခဲ့တယ် ဆိုတဲ့ ကိစ္စကို သတိပြုမိကြောင်း၊ နောက်ထပ် Rafaleတွေပါ ပစ်ချခံရတယ်ဆိုတဲ့ သတင်းဖော်ပြချက်တွေကိုတော့ ဆက်လက် စုံစမ်းနေဆဲဖြစ်ကြောင်း အဲဒီ အရာရှိက မှတ်ချက်ပေးသွားခဲ့ပါတယ်။
ကက်ရှ်မီးယား ဒေသရဲ့ အိန္ဒိယ ထိန်းချုပ်ထားတဲ့ ဂျမူးနဲ့ ကက်ရှ်မီးယား ဒေသထဲမှာ ပျက်ကျထားတဲ့ လေယာဉ် အစိတ်အပိုင်းတွေမှာ ပြင်သစ်ထုတ်ကုန်ဆိုတဲ့ စာတွေ ရေးသား ပါရှိကြောင်း သတင်းတွေက ဖော်ပြခဲ့ပါတယ်။ တစ်ဖက်မှာလည်း လေကြောင်း နည်းပညာ ပါရဂူတွေက ဒီအချက်အလက်လောက်နဲ့ ပျက်ကျလေယာဉ်ဟာ Rafaleဖြစ်တယ် ဆိုတာကို အတည်ပြုဖို့ မလုံလောက်နိုင်ကြောင်း CNNကို မှတ်ချက်ပေးခဲ့ပါတယ်။
Rafaleတွေဟာ ပါကစ္စတန်ရဲ့ ပစ်ချမှုကို ခံခဲ့ရတယ်ဆိုတဲ့ သတင်းတွေ ထွက်ပေါ်လာတဲ့နောက် လေယာဉ်တွေကို ထုတ်လုပ်တဲ့ ပြင်သစ် လေကြောင်း နည်းပညာ လုပ်ငန်းစုကြီး Dassaultရဲ့ ရှယ်ယာတွေပါ ကျဆင်းကုန်ပါတယ်။ စျေးကွက် သုတေသီတွေက Rafaleတွေရဲ့ တိုက်ပွဲဝင်အဆင့် ယုံကြည်စိတ်ချရမှုကို ဝယ်လက်တွေက ကြီးကြီးမားမား သံသယ ဖြစ်သွားပြီဆိုရင် Dassaultရဲ့ ရှယ်ယာတန်ဖိုးဟာ ၅ ရာခိုင်နှုန်း အထက်ထိ ဆက်လက် ကျဆင်းနိုင်ကြောင်း မှတ်ချက်ပေးထားပါတယ်။
ကိုးကား: CNN
