ဖေဖော်ဝါရီ-၁၉၊၂၀၂၆။ဇေအောင်/People’s Spring
နေ့ရောညပါ ပေါ်တာဆွဲဖမ်းဆီးမှုကြမ်းနေတဲ့ မုံရွာမြို့မှာ အာဏာသိမ်းစစ်တပ်က ညစျေးဖွင့်ဖို့ စီစဥ်နေတယ်လို့ မြို့ခံတွေက ပြောပါတယ်။
စစ်ကိုင်းတိုင်း၊ မုံရွာမြို့က ကန်သာယာမှာ အာဏာသိမ်းစစ်တပ်က ယခုဖေဖော်ဝါရီအတွင်း ညစျေးစတင်ဖွင့်လှစ်ဖို့ စီစဥ်နေကြောင်း မြို့ခံတွေက ပြောပါတယ်။ စစ်တပ်ဟာ မုံရွာမြို့ပေါ်မှာ နေ့ခင်းမှာတောင် ပေါ်တာဆွဲနေတာဖြစ်ကြောင်း၊ ဒါ့အပြင် သီတင်းကျွတ်ကာလကနေ ပွဲလမ်းသဘင်တွေ တောက်လျှောက်လုပ်ပြီး ပွဲတော်ပြန်တွေကို ပေါ်တာဆွဲနေချိန် ညစျေးလုပ်ဖို့ စီစဥ်နေတာဖြစ်ကြောင်း မြို့ခံတွေက ပြောပါတယ်။
“ ဒီလိုလုပ်လိုက်ရုံနဲ့ မြို့ခံပြည်သူတွေပျော်ရွှင်မသွားပါဘူး။နေ့ခင်းတောင် ကျနော်တို့လို လူငယ်တွေမပြောနဲ့ လူလတ်ပိုင်း တွေတောင် အပြင်ရဲရဲတင်းတင်း ဝေးဝေးလံလံ မသွားရဲဘူးဖြစ်နေတယ်” လို့ မုံရွာမြို့ခံလူငယ်တစ်ဦးက ပြောပါတယ်။
Public Service Announcement
ညဈေးဖွင့်ခဲ့ရင်လည်း အနီးနားနေထိုင်သူ တွေပဲသွားကြမှာမို့ ဆိုင်ရှင်တွေအနေနဲ့ ရေရှည်ရပ်တည်ဖို့ ခက်ခဲမှာဖြစ်ကြောင်း မြို့ခံတွေက မှတ်ချက်ပြုပြောပါတယ်။
အဲဒီ ကန်သာယာညစျေးမှာ ဆိုင်ခန်းပေါင်းတစ်ရာကျော်ပါမယ်လို့ စစ်အုပ်စုက အသိပေးထားပါတယ်။
စစ်တပ်ရဲ့ပေါ်တာဆွဲမှုတွေကြောင့် အလုပ်သမားနဲ့ ပုဂ္ဂလိကဝန်ထမ်းတွေ အလုပ်သွားဖို့ခက်ခဲနေပြီး စားဝတ်နေရေး ကျပ်တည်းနေတယ်လို့ မြို့ခံတွေဆီက သိရပါတယ်။
