စစ်တပ်က ညောင်လေးပင်မြို့နယ်ကိုစစ်​ကြောင်းထိုး ပြည်သူဆယ်ချီသတ်ပြီး ဒေသခံ ၁၀၀ခန့်ကို ဖမ်းထား

မတ်-၈၊ ၂၀၂၆။ ဒလပန်း/People’s Spring

စစ်တပ်စစ်ကြောင်းထိုး အကြမ်းဖက်နေတဲ့ ပဲခူးတိုင်း၊ညောင်လေးပင်မြို့နယ်မှာ ဒေသခံ ပြည်သူ ဆယ်နဲ့ချီအသတ်ခံရသလို ​ဒေသခံ ၁၀၀ နီးပါး ဖမ်းဆီးခံထားရတယ်လို့ ဒေသခံအချို့က​ပြောပါတယ်။

မတ်လ ၅ ရက် မနက် ၇ နာရီအချိန်ကစပြီး အင်အား ၄၀၀ ဝန်းကျင်ရှိတဲ့ စစ်တပ်စစ်ကြောင်းဟာ ညောင်လေးပင်မြို့နယ် ရေတွင်းကုန်းနဲ့ ​ကျောင်းကုန်းကျေးရွာတွေဘက်ကို စစ်ကြောင်းထိုး ဝင်ရောက်ခဲ့တာလည်းဖြစ်ပါတယ်။

စစ်တပ်ကစစ်ကြောင်းထိုးရင်း​ရွာ​တွေကကိုယ်ဝန်ဆောင် အမျိုးသမီးနဲ့ ကလေးငယ်တွေအပါအဝင် ဒေသခံ ၃၀ နီးပါးကိုသတ်ဖြတ်ခဲ့တယ်လို့ စုံစမ်းသိရပါတယ်။​သတ်ဖြတ်ခံရတဲ့ပြည်သူ​တွေထဲမှာ က​လေးငယ် ၊အမျိုးသမီး ၊ရဟန်း​တော်​တွေပါ ပါဝင်တယ်လို့ ဖြစ်စဥ်သိတဲ့အခြားရွာက​ဒေသခံတဦးက​ပြောပါတယ်။

Public Service Announcement

ဒါ​ပေမယ့် ​​စစ်တပ်ကဖမ်းဆီးသတ်ဖြတ်တာခံရတဲ့ ​​ရွာ​တွေက​ဒေသခံ​တွေကိုဆက်သွယ်​မေးမြန်းဖို့ခက်ခဲ​နေတာ​ကြောင့်အ​သေးစိပ်အ​ခြေအ​နေကို​တော့ မသိရ​သေးပဲ စုံစမ်း​နေဆဲဖြစ်ပါတယ်။

အဲ့ဒီလို စစ်ကြောင်းထိုးချိန်မှာ ကျေးရွာအတွင်း ပိတ်မိနေတဲ့ ဒေသခံ ၁၀၀ နီးပါးကို စစ်တပ်တပ်ဖွဲ့ဝင်တွေက ဖမ်းဆီးထားတာလည်းဖြစ်ပါတယ်။

“ စစ်ကြောင်းထိုးတဲ့ချိန်မှာ ပိတ်မိသွားကြတာ။ ၁၀၀နီးပါးလောက်ရှိတယ်။ တချို့ကိုကြတော့ တခြားသူတို့အထိုင်ချထားတဲ့ ရွာတွေကို ခေါ်သွားကြတာမျိုးရှိတယ် ” လို့ ဒေသခံတစ်ဦးက ပြောပါတယ်။

ဒါအပြင် စစ်တပ်တပ်ဖွဲ့ဝင်တွေဟာ ရေတွင်းကုန်းနဲ့ ​ကျောင်းကုန်းကျေးရွာအပါအဝင်အနီးနာရွာ ​တွေက ပြည်သူနေအိမ်က ပစ္စည်းတွေကိုလည်း ခိုးယူနေတယ်လို့ ဒေသခံတစ်ဦးက ပြောပါတယ်။

” ဖမ်းခံထားရတဲ့သူတွေဆီက ဖုန်းတွေယူတာရှိတယ်။ နောက်ပြီး ရွာမှာကျန်ခဲ့တဲ့ စပါးတွေ ပဲတွေနဲ့ ကျန်ခဲ့တဲ့ ပစ္စည်းတွေကို ခိုးယူပြီး ရောင်းနေကြတာ” လို့ပြောပါတယ်။

စစ်တပ်ဟာ ညောင်လေးမြို့နယ်ကို မြေပြင်အင်အားအလုံးအရင်းအပြင် လေကြောင်း ဒရုန်း၊ လက်နက်ကြီးတွေနဲ့ပါ တပြိုင်တည်း စစ်ကြောင်းထိုးဝင်ရောက်ခဲ့တာလည်းဖြစ်ပါတယ်။

စစ်ကြောင်းထိုးနေတဲ့နေရာအနီးဝန်းကျင်ကိုလည်း ပိန်းဇလုတ်မြို့အခြေစိုက် ခမရ ၂၆၄ တပ်ရင်း၊ ပဲနွယ်ကုန်းမြို့ ၊ ရွှေဝါကျေးရွာအခြေစိုက် ခမရ – ၃၀၇ တပ်ရင်းနဲ့ ကျောက်တံခါးမြို့မှာတပ်စွဲထားတဲ့ စစ်တပ်တပ်ဖွဲ့ဝင်တွေက လက်နက်ကြီးနဲ့ ပစ်ကူပေးခဲ့ကြတာပါ။

စစ်ကြောင်းထိုးလာတဲ့ စစ်တပ်တပ်ဖွဲ့ဝင်တွေနဲ့ ကာကွယ်ရေးတပ်ဖွဲ့တွေကြား တိုက်ပွဲဖြစ်ပွါးနေပြီး နှစ်ဖက်ထိခိုက်သေဆုံးမှုတွေရှိနေတယ်လို့ ကာကွယ်ရေးတပ်ဖွဲ့ဝင်တွေဆီက သိရပါတယ်။

အခုလို စစ်တပ်က စစ်ကြောင်းထိုးတာအပြင် ဒေသခံတွေကိုပါ ဖမ်းဆီး သတ်ဖြတ်နေတာကြောင့်ရေတွင်းကုန်း၊ ကျောင်းကုန်း၊ ခရုကုန်း၊ အင်ကုန်း၊ ကျေးရွာအပါအဝင် ကျေးရွာ ၉ ရွာက ဒေသခံ ထောင်ချီဟာ ဘေးလွတ်ရာကို ထွက်ပြေးနေကြရပါတယ်။

ညောင်လေးပင်မြို့နယ်ဟာ ကရင်အမျိုးသားအစည်းအရုံး KNU တပ်မဟာ ၃ ထိန်းချုပ်နယ်မြေလည်းဖြစ်ပါတယ်။

ညောင်လေးပင်မြို့နယ်ကို စစ်တပ်က စစ်ကြောင်းထိုးဝင်ရောက်ကာ အရပ်သားပြည်သူတွေကို ဖမ်းဆီးသတ်ဖြတ်နေတဲ့ အခြေအနေနဲ့ပတ်သက်ပြီး KNU ဘက်ကတော့ ဒီကနေ့ မနက်ပိုင်းထိ တစုံတရာထုတ်ပြန်ထားတာမျိုးမရှိပါဘူး။