စက်တင်ဘာ-၁၉၊၂၀၂၅။လူအေး/People’s Spring
ကန့်ဘလူမြို့နယ် ၊ဇီးကုန်းမြို့ရဲစခန်းကို ပြည်သူ့ကာကွယ်ရေးတပ်ဖွဲ့ (ပကဖ)ပူးပေါင်းတပ်တွေကတိုက်ခိုက်သိမ်းပိုက်စဉ် ဒဏ်ရာရရှိခဲ့တဲ့ စစ်ကောင်စီတပ်မိသားစုဝင်ကိုယ်ဝန်သည်အပါအဝင် အမျိုးသမီးတွေနဲ့ ကလေးငယ်တွေကို ကျန်းမာရေးစောင့်ရှောက်မှုတွေပေးနေတယ်လို့ ကန့်ဘလူမြို့နယ် ပြည်သူ့အုပ်ချုပ်ရေးအဖွဲ့ (ကန့်ဘလူ ပအဖ)က ထုတ်ပြန်ပါတယ်။
တိုက်ပွဲဖြစ်တဲ့နေ့က ထုတ်ပြန်တဲ့ ရုပ်သံမှာပါတဲ့ စစ်ကောင်စီတပ်ဖွဲ့ဝင်နဲ့ ကိုယ်ဝန်ဆောင် ဇနီးသည်ကိုထုတ်ပြန်ချက်မှာ ဖော်ပြထားပါတယ်။ဒါအပြင် အခြား ကလေးမိခင်တဦး နဲ့ ကလေးငယ် နှစ်ဦးတို့ကိုလည်း ဆေးဝါးကုသစောင့်ရှောက်မှုပေးနေတာကို ထုတ်ပြန်ချက်မှာတွေ့ရပါတယ် ။
မြို့နယ်ကျန်းမာရေးတာဝန်ခံဦးဆောင်တဲ့ ဆေးအဖွဲ့က လိုအပ်တဲ့ ဆေးဝါးကုသမှုတွေ ဆောင်ရွက်ပေးနေပြီး မီးဖွားဖို့လိုအပ်တဲ့ ကိုယ်ဝန်ဆောင်အမျိုးသမီကိုလည်း ကောင်းမွန်စွာစောင့်ရှောက်ကုသပေးလျှက်ရှိတယ်လို့ ဆိုပါတယ်။
Public Service Announcement
စစ်ကောင်စီဟာပြီးခဲ့တဲ့ ဇူလိုင်လ ၂၉ ရက်နေ့တုန်းက ကန့်ဘလူမြို့နယ်၊ကျန်းမာရေးဆေးရုံကို လေကြောင်းကနေ ဗုံးကြဲခဲ့ပါတယ်။ အဲ့ဒီတိုက်ခိုက်မှုမှာ လူနာစောင့်အပါအဝင် ငါးဦး သေဆုံးခဲ့ပါတယ်။ ဆေးရုံလုံးဝပျက်စီးခဲ့ပေမယ့် CDM(စစ်တပ်ကို အကြမ်းမဖက်အာဏာဖီဆန်မှု ပြုလုပ်ထားတဲ့) ကျန်းမာရေးဝန်ထမ်း တွေဟာ စိတ်ဓာတ်ကျလက်လျော့အရှုံးပေးခြင်းမရှိပဲ အများပြည်သူကျန်းမာရေးစောင့်ရှောက်မှုအပြင် စစ်ကောင်စီဘက်တော်သား တရားခံတွေကိုပါ လူသားချင်းစာနာမှုအပြည့်နဲ့ ဆေးဝါးကုသမှုများ ပေးလျက်ရှိတယ်လို့ကန့်ဘလူမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။
ဇီးကုန်းမြို့ရဲစခန်းကို ကန့်ဘလူခရိုင်ပကဖ က ဦးဆောင်ပြီး ရေဦးဓူဝံပကဖနဲ့ နယ်မြေခံပကဖတွေ ပူး ပေါင်းပြီး စက်တင်ဘာလ ၁၇ ရက်နေ့ ညနေမှာ စီးနင်းတိုက်ခိုက်ခဲ့ကြတာပါ။အဲ့ဒီစစ်ဆင်ရေးမှာ စစ်ကောင်စီအရာရှိအပါအဝင်၆ဦးသေဆုံးပြီး ၁၁ဦး ဖမ်းမိခဲ့တယ်လို့ ကာကွယ်ရေးတပ်ဖွဲ့တွေက ထုတ်ပြန်ထားပါတယ်။
