စက်တင်ဘာ−၁၉၊ ၂၀၂၅။ ထားမြတ်/People’s Spring
အာဏာသိမ်းစစ်ကောင်စီတပ်ကို တော်လှန်ရန်အတွက် ပြည်သူ့ကာကွယ်ရေးတပ်မတော်(PDF) ဒေါနတပ်ရင်းနှင့် ပူးပေါင်းပါဝင်ရန် ဒေါနတပ်ရင်းက ကြေညာချက်ထုတ်ပြန် ဖိတ်ခေါ်သည်။
စစ်ကောင်စီတပ်ကို တော်လှန်တိုက်ခိုက်နေသည့် ဒေါနတပ်ရင်းအနေဖြင့် တိုက်ခိုက်ရေး အင်အားစုများ တိုးချဲ့စုဖွဲ့လျက်ရှိရာ ယခုရက်ပိုင်းတွင် တပ်သားသစ် ဖိတ်ခေါ်သည့်ကြေညာမှုများ ဆက်တိုက်ပြုလုပ်လျက်ရှိသည်။
“ ကျနော်တို့ပြည်တွင်းမှာရှိနေတဲ့မိဘပြည်သူတွေအနေနဲ့လည်းတက်နိုင်တဲ့ဘက်ကနေ တော်လှန်ရေးအဖွဲ့စည်းတွေကိုကူညီပေးဖို့ရယ်၊လူငယ်တွေအနေနဲ့လည်းကိုယ့်အိမ်ရှေ့မရောက်ခင်၊ကိုယ့်ကိုမထိသရွေ့နေသာသလိုမနေကြဖို့၊အခွင့်ရေးရတုန်းစစ်ကော်မရှင်ကိုတော်လှန်ဖို့ရဲရဲဆုံးဖြတ်ချက်ချဖို့လိုပါတယ် လို့ပြောချင်ပါတယ်” ဟု ဒေါနတပ်ရင်း ဒုတပ်ရင်းမှူး ရဲဘော်ဝေကြီးက တပ်သားသစ်များ ဖိတ်ခေါ်နေသည့် အပေါ် မှတ်ချက်ပြု ပြောသည်။
Public Service Announcement
ဒေါနတပ်ရင်းမှ တပ်သားသစ်များခေါ်ယူရာတွင် စစ်အာဏာရှင်အမြစ်ပြတ်ရေးနှင့် ဖက်ဒရယ်ဒီမိုကရေစီ စနစ်တည်ဆောက်ရေးအတွက် ဆုံးဖြတ်ထားသူဖြစ်ရမည်ဆိုသည့် အချက်အပါအဝင် သတ်မှတ်ချက်များ ထုတ်ပြန်ထားသည်။
တပ်သားသစ်အဖြစ်ပါဝင်လိုပါက အသက် (၁၈)နှစ်နှင့် (၃၅)နှစ်အတွင်း၊ ကျန်းမာရေးကောင်းမွန်ပြီး၊ စိတ်ဓာတ်ကြံ့ခိုင်ရမည်ဖြစ်ကြောင်း၊ ဆုံးဖြတ်ချက်ပြတ်သားရမည်ဖြစ်ကြောင်း ဖော်ပြသည်။
ထို့ပြင် အခြေခံစစ်ပညာသင်တန်း၊ အထူးစစ်ဆင်ရေးသင်တန်းနှင့် လိုအပ်ပါက မွမ်းမံသင်တန်းများ ပြီးဆုံးအောင်မြင်သည်အထိ တက်ရောက်နိုင်ရမည် ဖြစ်ကာ သင်တန်းပြီးဆုံးပါက တပ်ဖွဲ့မှပေးအပ်သည့် တာဝန်နှင့်စုဖွဲ့မှုအတိုင်း မည်သည့်နေရာမဆို တာဝန်ထမ်းဆောင်နိုင်ရမည်ဟု ဆိုသည်။
ပြည်သူ့ကာကွယ်ရေးတပ်မတော်မှ ချမှတ်သည့်စစ်စည်းကမ်းကျင့်ဝတ်များ၊ ဒေါနတပ်ရင်းမှ ချမှတ်သည့် မူဝါဒ၊ စည်းကမ်းကျင့်ဝတ်များ အားတိကျစွာ လေးစားလိုက်နာရမည်ဖြစ်ကြောင်းနှင့် အနည်းဆုံး (၂) နှစ်တာဝန်ထမ်းဆောင်ရမည်ဖြစ်ပြီး လိုအပ်၍ တာဝန်ပေးအပ်ပါက နောက်ထပ်(၂)နှစ်အထိ ဆက်လက်တာဝန်ထမ်းဆောင်နိုင်ရမည်ဟု အသိပေးသည်။
ထို့ပြင် အထက်ကွပ်ကဲမှု အဆင့်ဆင့်၏ အမိန့်ကိုနာခံ၍ တာဝန်ကိုကျေပွန်စွာ ထမ်းဆောင်နိုင်သူ ဖြစ်ရမည်ဖြစ်ကာ ရာဇဝတ်ပြစ်မှုကင်းရှင်းသူဖြစ်ရမည်ဟု ထုတ်ပြန်ထားသည်။
တပ်ဖွဲ့ဝင်အဖြစ် ပါဝင်လိုသူများအနေဖြင့် တပ်ရင်းအမှတ်-၉၉၀၂ ဒေါနတပ်ရင်း Dawna Column page messenger https://www.facebook.com/share/1BLVfcBGjt/ နှင့် Telegram No +660656530290 သို့ ဆက်သွယ်နိုင်သည်ဟု ထုတ်ပြန်ထားသည်။
