ဩဂုတ်−၂၇၊ ၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU) တပ်မဟာ(၆)ရှိ ကရင်အမျိုးသားကာကွယ်ရေးတပ်ဖွဲ့(KNDO) တပ်ရင်း(၈)ထံသို့ ကော်သူးလေအာမီ(KTLA) တပ်ဖွဲ့ဝင်များ ပြန်လည်ပူးပေါင်းလာဟု ကရင်သတင်းရင်းမြစ်က ပြောသည်။
တပ်မဟာ(၆)နယ်မြေရှိ ကော်ဘရာ စစ်ကြောင်း(၁)စစ်ကြောင်းမှူး ဗိုလ်စောကော်က KTLA ရဲဘော်များ KNDO တပ်ရင်း(၈)သို့ပြန်လာသည့် ရုပ်သံကိုဖော်ပြခဲ့ခြင်းဖြစ်သည်။
KNDO ထံသို့ ပြန်လည်ပူးပေါင်းလာသူများအနက် ၂ဦးက ကရင်ဘာသာဖြင့် ပြောပြခဲ့ရာ ထိုသို့ ပြောဆိုမှုသည် KNDO တပ်ရင်း(၈)ကို ပြန်လည်ပူးပေါင်းလာသည့် အကြောင်း ပြောပြခြင်းဖြစ်သည်ဟု ကရင်သတင်းရင်းမြစ်က ဘာသာပြန်ရှင်းပြပေးသည်။
Public Service Announcement
ပူးပေါင်းလာသူ ၁၃ဦးဝန်းကျင်ရှိဟုကြားသိရသော်လည်း အရေအတွက် အတိအကျ မပြောနိုင်ဟု ကရင်သတင်းရင်းမြစ်က ပြောသည်။
ယခု KNDO နှင့် ပူးပေါင်းလာသူများသည် ဇူလိုင် ၁၂ရက်က ဥကရစ်ထတပ်စခန်းကို KNLA ပူးပေါင်းတပ်က သိမ်းပိုက်စဉ် KNLA ပူးပေါင်းတပ်ရဲဘော်များအတွက် ထမင်းထုတ်ပေးရန် စီစဉ်နေသည့်နေရာမှ ကြက်ဥအပါအဝင် ရိက္ခာများ ဝင်ရောက်ယူဆောင်ခဲ့သူများပါဝင်သည်ဟု ကရင်သတင်းရင်းမြစ်က ပြောသည်။
ရှေ့တန်းရဲဘော်များအတွက် ထမင်းထုတ်ပေးရန် စီစဉ်နေခြင်းကိုအရက်မူးပြီး ရိက္ခာများယူဆောင် သောင်းကျန်းခဲ့သည့် ဖြစ်စဉ်ကြောင့် KTLA ရဲဘော်များကို KNLAက ဖမ်းဆီးထိန်းသိမ်းခဲ့သည်။
” သူပြောသွားတာကတော့ KNLAက ထိန်းသိမ်းထားတာ ဘာမှ ထိခိုက်ဒဏ်ရာတွေမထားဘူး။ သေသေချာချာ ညီအကိုမောင်နှမလိုမျိုး ထိန်းသိမ်းပြုစုတယ် အဲဒါကြောင့်မို့လို့ ဒီဘက်ကိုပြန်ပြီးတော့ KNDO နဲ့ ပြန်ပြီး ပူးပေါင်းတာ”ဟု ကရင်သတင်းရင်းမြစ်က ရုပ်သံ၌ ပါဝင်သည့် KTLA ရဲဘော်၏ကရင်ဘာသာပြောဆိုချက်ကို ရှင်းပြသည်။
KTLAသည် ယခင်က KNDO စစ်ဦးစီးချုပ်အဖြစ် တာဝန်ယူခဲ့သည့် ဗိုလ်မှူးချုပ်စောနယ်ဒါးမြက သီးခြားခွဲထွက်ဖွဲ့စည်းခဲ့သည့် တပ်ဖွဲ့ဖြစ်သည်။ ဝေါ်လေဒေသအရပ်သားများသတ်ဖြတ်ခံရမှုဖြစ်စဉ်အပေါ် ဗိုလ်မှူးချုပ်စောနယ်ဒါးမြကို KNUကစုံစမ်းစစ်ဆေးရန် စီစဉ်ရာလက်မခံဘဲ KTLAကို ထူထောင်ခဲ့၍ ဗိုလ်မှူးချုပ်စောနယ်ဒါးမြကို KNU/KNLAက ထုတ်ပယ်ခဲ့သည်။
